Diyosezi ya Cyangugu yatangiye urugendo rwa Yubile y'imyaka 50 na 75 ya Paruwasi Katedrali ya Cyangugu zizizihizwa mu 2031

Ni umuhango wabereye muri Paruwasi Katedrali ya Cyangugu mu munsi mukuru wayo, uhurirana n'uwa Diyosezi yose, zombi ziragijwe Umutima Mutagatifu utagira inenge wa Bikira Mariya. Witabiriwe n'imbaga y'abakristu, abapadiri, abihayimana n'abayobozi batandukanye ba Diyosezi, bateraniye hamwe gushimira Imana ku rugendo rw'imyaka imaze iyobora Paruwasi na Diyosezi, banatangiza ku mugaragaro imyaka itanu yo kwitegura izo Yubile.

Paruwasi Katedrali ya Cyangugu yashinzwe mu 1956, ivuka kuri Paruwasi ya Mibilizi, mu gihe Diyosezi ya Cyangugu yashinzwe ku wa 5 Ugushyingo 1981, ibyawe na Diyosezi ya Nyundo.

Mu butumwa bwatanzwe mu izina ry'abakristu ba Diyosezi, Uwamariya Consolée, uhagarariye abakristu muri Diyosezi Gatolika ya Cyangugu, yavuze ko kwizihiza umunsi mukuru wa Paruwasi na Diyosezi byabaye intangiriro y'urugendo rugamije gutegura neza Yubile zombi zizizihizwa mu 2031.

Yagize ati"Twifuza ko imyitozo twakoze twitegura guhimbaza umunsi mukuru wa Paruwasi Katedrali wahuriranye n'uwa Diyosezi yacu ya Cyangugu, zombi ziragijwe Umutima Mutagatifu utagira inenge wa Bikira Mariya, yatubera intangiriro y'indi myinshi, twategurirwa cyangwa tugafashwa gutegura, cyane cyane muri uru rugendo dutangiye rutuganisha mu guhimbaza mu mwaka wa 2031 Yubile y'imyaka 75 Paruwasi Katedrali ya Cyangugu imaze ishinzwe n'imyaka 50 ya Diyosezi yacu."

Yakomeje agaragaza icyizere ko uru rugendo rwose ruzafasha abakristu kurushaho kuvugurura ukwemera kwabo. Ati"Turizera tudashidikanya ko uru rugendo dutangiye hamwe na Bikira Mariya Umubyeyi wacu ruzadufasha kuvugurura ubukristu bwacu."

Musenyeri Edouard Sinayobye: "Ntidushaka ko Yubile izaba umunsi w'ibirori gusa"

Yagize ati"Bavandimwe, dutangije urugendo rw'imyaka itanu rwa Yubile zizizihizwa mu 2031, aho Diyosezi yacu izaba yujuje imyaka 50, naho Paruwasi Katedrali ya Cyangugu ikazaba imaze imyaka 75."

Mu butumwa bwe bwo gutangiza uru rugendo rwa Yubile, Umwepiskopi wa Diyosezi ya Cyangugu, Myr Edouard Sinayobye, yavuze ko imyaka itanu iri imbere ari igihe gikomeye mu buzima bwa Diyosezi n'ubwa Paruwasi Katedrali.

Musenyeri Sinayobye yasabye abakristu kutazategereza umunsi wa Yubile ahubwo bagatangira kuwitegura kuva ubu.Yagize ati"Turagomba rero kwitegura. Ni igihe gikomeye mu buzima bw'uyu muryango w'abana b'Imana. Niyo mpamvu tudashaka kuzatungurwa n'uwo munsi ngo ube umunsi w'ibirori gusa bivugwamo ingoma n'ibindi biranga umunsi mukuru. Ntabwo twaba twizihije Yubile kuko ari Yubile y'ubukristu tuzaba twizihiza."

Yasobanuye ko gucana itara ry'urumuri byabaye ikimenyetso cyo gutangira urugendo rwo gukura mu kwemera no kurushaho gukurikira Kristu.Ati "Niyo mpamvu y'uru rugendo dutangije uyu munsi, tukarutangiza gucana itara ry'urumuri ritwibutsa ko twiyemeje kurushaho guhata inzira ibirenge no kwitegura buhoro buhoro kugenda dusa n'urwo rumuri."

Yashimangiye kandi ko iyo myiteguro izashingira mbere na mbere ku isengesho no gushaka kumenya icyo Imana ishaka kuri Diyosezi.Ati "Turatangira uru rugendo turarusabira twese kugira ngo ibyo tuzakora byose amaso yacu n'imbaraga zacu tubyerekeze ku kumva icyo Imana ishaka muri iyi Diyosezi."

Mu gusoza ubutumwa bwe, Myr Sinayobye, yasabye abakristu bose, kuva ku bana kugeza ku bakuru, kwifatanya muri iryo sengesho kugira ngo imyaka itanu iri imbere izavemo imbuto nyinshi z'ukwemera.

Diyosezi Gatolika ya Cyangugu ni imwe mu madiyosezi icyenda ya Kiliziya Gatolika mu Rwanda. Yashinzwe ku wa 5 Ugushyingo 1981 na Mutagatifu Papa Yohani Pawulo II, ayikura kuri Diyosezi ya Nyundo

Ibarizwa mu Ntara y’Iburengerazuba bw'u Rwanda, ikaba ikubiyemo uturere twa Rusizi na Nyamasheke ku buso bungana na kilometero kare 1,125.

Mu myaka isaga 44 ishize, Diyosezi Gatolika ya Cyangugu yayobowe n'Abepisikopi batatu bagize uruhare rukomeye mu kuyubaka no kuyiteza imbere. Umwepiskopi wa mbere ni Musenyeri Thaddée Ntihinyurwa, wayiyoboye kuva yashingwa mu 1981 kugeza mu 1996. Mu gihe cy'ubuyobozi bwe, yashyize imbaraga mu kubaka inzego z'ibanze za Diyosezi, guteza imbere iyogezabutumwa no kwagura ibikorwa bya Kiliziya. Mu 1996 yagizwe Arikiyepisikopi wa Kigali.

Nyuma y'urupfu rwa Myr Bimenyimana, Diyosezi yayobowe by'agateganyo na Musenyeri Célestin Hakizimana, Umwepiskopi wa Diyosezi ya Gikongoro, kugeza igihe Papa Fransisiko yagennye Myr Edouard Sinayobye ku wa 6 Gashyantare 2021 ngo abe Umwepiskopi wa gatatu wa Diyosezi ya Cyangugu. Yahawe inkoni ya gishumba ku wa 25 Werurwe 2021, akaba ari we uyiyoboye kugeza ubu, akomeje gushimangira iyogezabutumwa, ivugururwa ry'ubukristu, ubumwe bw'abakristu n'iterambere ry'umuryango.

Myr Ntihinyurwa, yasimbuwe na Myr Jean Damascène Bimenyimana, wagizwe Umwepiskopi wa Cyangugu ku wa 2 Mutarama 1997, ayobora Diyosezi imyaka irenga makumyabiri. Muri iyo myaka, yagaragaje uruhare rukomeye mu gushinga amaparuwasi mashya, guteza imbere amashuri, ibigo nderabuzima n'ibindi bikorwa by'iterambere, kugeza yitabye Imana ku wa 11 Werurwe 2018 akiri mu nshingano.

Yavuze ko imyaka itanu iri imbere ikwiye kuberamo igihe cyo kwitegura mu buryo bwa Roho, kugira ngo Yubile itazaba umunsi w'ibirori gusa, ahubwo ibe umwanya wo gushimira Imana no kongera gukomera mu kwemera.

Diyosezi Gatolika ya Cyangugu ifite amaparuwasi 22. Ikorera ubutumwa bwayo mu turere twa Rusizi na Nyamasheke mu ntara y’Iburengerazuba, ikaba yita ku bakristu Gatolika basaga ibihumbi maga tatu batuye mu baturage basaga 804.811 b’utu turere twombi. Iyi mibare igaragaza uruhare runini iyi Diyosezi ikomeje kugira mu iyogezabutumwa no mu kwita ku buzima bwa roho n'iterambere ry'abakristu bo mu Burengerazuba bw'u Rwanda.

Gutangiza uru rugendo rw'imyaka itanu ntabwo ari ugutegura ibirori gusa, ahubwo ni uguhamagarira buri mukristu kwisubiraho no kuvugurura ubuzima bwe bwa gikristu. Ni yo mpamvu ubutumwa bwatangiwe muri uwo muhango bwose bwagarutse ku isengesho, ukwemera, ubumwe no kwitegura kwakira neza Yubile.

Mu mwaka wa 2031, Paruwasi Katedrali ya Cyangugu izaba yizihiza imyaka 75 imaze ishinzwe, naho Diyosezi ya Cyangugu ikizihiza imyaka 50 imaze ishinzwe. Iyo Yubile izaba ari umwanya wo gushimira Imana ku mateka y'iyogezabutumwa muri aka gace k'u Rwanda no kongera kwiyemeza gukomeza ubutumwa bwa Kiliziya mu bihe biri imbere