Diyosezi ya Cyangugu yiyemeje guhagurukira ibibazo byugarije umuryango
Mu gikorwa cyo gutangiza umwaka w'Ikenurabushyo wahariwe umuryango muri Diyosezi ya Cyangugu, cyabereye muri paruwasi ya Runyanzovu, kuri uyu wa 24 Nzeri 2023, Myr Edouard Sinayobye yasabye abakristu gufungura amaso bakabona, bakitegereza ibibazo byugarije umuryango kandi bagahagurukira kubishakira umuti.
Yagize ati"Bavandimwe ndabasaba gufungura amaso bihagije tukabona. Twirebe, twibaze, tubone uburyo umuryango, ingobyi y'ubuzima ukaba n'igicumbi cy'ubukristu wibasiwe n'ibyonnyi bitagira ingano kandi bifite ubumara bukaze. Murebe za gatanganya ziyongereye, uburere butakitabwaho, gucana inyuma, ibyateye twumva hirya no hino aho umugabo ashakana na mugenzi we, umugore na we ntabitinye. Turarye turi menge, turinde tudahumbya icyo cyago ntikizaduce murihumye ngo kidusenyere umuryango."
Nk'uko Myr Edouard abisobanura, icyemezo cyo guharira uyu mwaka guhangana n'ibibazo byugarije umuryango cyavuye ku rugendo rwakozwe muri Sinodi, muri gahunda yiswe "Kristu muri buri rugo". Muri iyi gahunda, abasaserdoti bagize umwanya wo gutega amatwi abakristu, babagezaho byinshi bibaremereye, bibabuza amahoro n'ituze mu miryango yabo.
Myr Edouard avuga ko muri uyu mwaka wihariye w'umuryango Diyosezi ya Cyangugu izakora ibikorwa bijyanye n'Iyogezabutumwa rivuguruye riherekeza by'umwihariko abato n'urubyiruko kandi rikegera imiryango rikayiherekeza mu buzima bwa buri munsi.
Padiri Tadeyo Nsengumuremyi, ushinzwe ikenurabushyo ry'Umuryango muri Diyosezi ya Cyangugu, mu kiganiro yagiranye na Kinyamateka, yagarutse ku bikorwa bitandukanye bizaranga uyu mwaka birimo: Gushishikariza abakristu guhesha umugisha ugenewe umuryango n'aho batuye, ingendo nyobokamana, amahugurwa azafasha umuryango hakazakorwa n'amarushanwa ashingiye ku muco n'iyobokamana azaba arimo ababyeyi, urubyiruko n'abana.
Mu mirongo migari izibandwaho mu bikorwa by'uyu mwaka harimo: Gutegura abagiye kurushinga, Guherekeza abahanye isakaramentu ry'ugushyingirwa, Kwita by'Umwihariko ku ngo zifite ibibazo byihariye, Kwita ku burere bw'Abana no guherekeza abashakanye badahuje idini.
Bahereye ku byababayeho, bavuze uko bagitangira urugo byageze hagati ubushobozi buba buke batangira kwibaza aho bajyaga, barinubirana ndetse batangira no kwiheba.Nyamara bafashijwe na Paruwasi baje gutangira urugendo rwo kwisuzuma no guhinduka bagira urugo rwiza ndetse banahabwa ubutumwa bwo gufasha izindi ngo zifite ibibazo.
Musabyimana Jean de Dieu na Uwizeyimana Beatha, mu buhamya batanze mu gikorwa cyo gutangiza umwaka w'umuryango bagaragaje ko hari abantu benshi bari mu ngo zibagoye nyamara ariho bakagombye gushakira umunezero n'ituze. Bavuga ko abenshi babayeho mu ngo bababaye kandi baganya, bakaba bakeneye gutabarwa.
kugera ubu Komisiyo y'Ikenurabushyo ry'umuryango muri Diyosezi ya Cyangugu imaze guhugura imiryango irenga 260, bayifasha mu butumwa bwo guherekeza ingo bazitega amatwi kandi bazifasha gusohoka mu bibazo by'ingutu biba bizugarije.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
