Diyosezi ya Kabgayi yifatanyije n’Isi kwizihiza Umunsi mpuzamahanga w’abantu bafite Ubumuga

Mu nyigisho ye, Musenyeri Balthazar yagaragaje ko uyu munsi ufite agaciro gakomeye muri Diyosezi ya Kabgayi. Ati “Ni umunsi mpuzamahanga, ariko by’umwihariko ni n’umunsi wacu muri Diyosezi kuko abantu bafite ubumuga bafite umwanya mu mutima wa Kiliziya.”

Yibukije ko abantu bafite ubumuga atari abanyantege nke mu mahirwe, ahubwo ari abafite impano n’ubwitange byungura umuryango. Ati “Batwigisha kwihangana, bakatwibutsa agaciro gahoraho k’ubuzima bwa muntu.”

Myr Baltazar yashimangiye ko Kiliziya izakomeza kuba hafi y’abantu bafite ubumuga binyuze mu miryango y’abihayimana, inzego za Diyosezi n’amashyirahamwe abegamiyeho.

Yagize ati “Uruhare rwacu ni ugukomeza ibikorwa by’urukundo n’impuhwe Yezu ubwe yadusigiye, ntasige inyuma umuntu ufite ubumuga uwo ari we wese.”

Musenyeri Balthazar yakomeje avuga ko uyu munsi ari umunsi ucyeye isi yose yahariye abantu bafite ubumuga kugira ngo umuryango mugari wongere kuzirikana inshingano zawo mu kubitaho , mu kurengera mu kubungabunga no guteza imbere abantu bafite ubumuga kandi no kugira ngo abantu bafite ubumuga ubwabo bongere bumve uruhare bafite mu guteza imbere imiryango yabo, igihugu ndetse no muri Kiliziya, uruhare bafite mu gufatanya n’abandi mu kwiteza imbere no guteza imbere n’abandi.

Mu buhamya bwatanzwe n’abantu bafite ubumuga, Hategekimana Jean de Dieu ufite ubumuga bw’ingingo yashimangiye ko kuba umuntu afite ubumuga bidakuraho ubushobozi, ahereye ku mirimo yihangiye aho ubu afite salo y’ubwiza itanga akazi no ku bandi.

Ati "ubu mfite salo y’ubwiza isuka abakobwa ndetse tukanogosha, nishimira ko ngeze ku rwego rwo kuba mpa akazi n’abandi nkagiramo n’abimenyereza umwuga mfasha.’

Ni ibyo yahurijeho na Nyiransabimana Louise, wiga umwuga w’ubudozi, wavuze ko ubumuga butamubujije kwiteza imbere. Ati “Nagiye kwiga umwuga w’ubudozi ndabimenya ubu ngeze ku rwego rwiza rwo gukorera amafaranga ibizamfasha kuva mu bwigunge kandi ubumenyi mfite burimo kunyubakira ejo hazaza.”

Uwiringira Marie Jose, Umuyobozi w’Akarere ka Kamonyi wungirije ushinzwe imibereho myiza y’abaturage, yashimiye Diyosezi ku ruhare rwayo mu guteza imbere abantu bafite ubumuga, ati “Ibikorwa dukorana bituma twongera gutekereza no gushyira mu igenamigambi ibyagirira akamaro abantu bafite ubumuga.”

Imibare y’Inama y’Igihugu y’Abantu bafite Ubumuga mu Rwanda (NCPD), by'umwihariko iy’ibanze y’ubushakashatsi ku bantu bafite ubumuga mu Rwanda yo muri Kamena 2025, igaragaza ko mu Rwanda hari abantu bafite ubumuga 562,184. Muri bo, 25.8% bafite akazi, mu gihe 56.4% batagafite.

Umunsi Mpuzamahanga w’Abantu bafite Ubumuga washyizweho mu mwaka wa 1992 n’Inteko Rusange y’Umuryango w’Abibumbye (UN) hagamijwe kumvikanisha ibibazo Abantu bafite Ubumuga bahura nabyo, kugaragaza ko nabo bashoboye, kubaha amahirwe angana n’ayabandi mu kugira uruhare mu bibakorerwa muri sosiyete, kubaha agaciro no guteza imbere uburenganzira n’imibereho myiza yabo.

Insanganyamatsiko y’uyu mwaka iragira iti “Dushyigikire umuryango udaheza abantu bafite Ubumuga, duteze imbere imibereho myiza.”