Diyosezi ya Ruhengeri yahimbaje umunsi w'uburezi Gatolika, Musenyeri Vincent agaragaza uko uburezi buhagaze

Ni ibirori kandi bahuje no guhimbaza Mutagatifu Antoni wa Paduwa waragijwe G.S Busogo II byitabiriwe n’inzego zitandukanye zirimo iza Kiliziya, ababyeyi barerera mu mashuri ya Kiliziya Gatolika ya Ruhengeri, abarezi ndetse n’inzego za Leta zari zihagarariwe n’Umuyobozi w’Akarere ka Musanze, Nsengimana Claudien.

Musenyeri Vincent Harolimana, Umwepiskopi wa Diyosezi ya Ruhengeri, yagaragaje isura y’uburezi muri Diyosezi ayoboye, haba mu mubare w’abanyeshuri barererwa mu mashuri yayo ndetse n’abarezi babafasha.

Yagize ati ‘’Diyosezi yacu ifite amashuri 152 abarizwa mu maparuwasi 19. Mu Ntara y’Amajyaruguru harimo amashuri 37 abarizwa mu Karere ka Burera, 56 abarizwa mu Karere ka Musanze, 47 abarizwa mu Karere ka Gakenke, n’ishuri 1 ribarizwa mu Karere ka Rulindo. Mu Ntara y’Uburengerazuba dufite amashuri 11 abarizwa mu Karere ka Nyabihu.’’

Yavuze kandi ko muri ayo mashuri, Diyosezi ya Ruhengeri ifitemo ayigenga n’ayo ifatanya na Leta ku bw’amasezerano, harimo amashuri y’incuke n’abanza, afite uburezi bw’ibanze bw’imyaka icyenda n’ubw’imyaka 12, amashuri yisumbuye acumbikira abanyeshuri ndetse n’amashuri y’imyuga.

Yagize ati ‘’Muri uyu mwaka w’amashuri wa 2025–2026, abanyeshuri biga mu mashuri ya Diyosezi ya Ruhengeri ni ibihumbi ijana na mirongo ine n’umunani n’ijana n’umunani (148,108); abarimu dufite ni 4,438. Amashuri y’imyuga ni 9, ayigenga ni 13, ayisumbuye acumbikira abanyeshuri ni 7, ayisumbuye adacumbikira abanyeshuri ni 7, naho abanza ni 52.’’

Yavuze kandi ko muri ayo mashuri yose bagerageza gutanga uburere bwuzuye, barera umwana ushoboye kandi ushobotse nk’uko bikubiye mu nsanganyamatsiko ihoraho igira iti ‘’Kiliziya Gatolika mu gutanga uburere buhamye: Umwana ushoboye kandi ushobotse.’’

Mu butumwa bwe, Musenyeri Vincent Harolimana yasabye ababyeyi n’abarezi guhora bazirikana ko umwana ajya ku ishuri guhaha ubumenyi, ariko akaba akeneye umusingi wubakirwa mu muryango, bityo ishuri rikaba ahantu abato bavoma uburere n’imico myiza bibafasha kuzigirira akamaro no kugira ejo heza hazaza.

Yagize ati ‘’Ishuri rigomba gutanga ubumenyi buvomwa mu masomo, ariko si mu masomo gusa, ahubwo umurezi mwiza yigisha anerekera, maze ishuri ryacu rigakomeza kuba isoko ry’uburere bwuzuye aho umwana yubakira ejo hazaza binyuze mu gukuza ubuvandimwe kandi batozwa indangagaciro za Gikirisitu, iza Kinyarwanda n’iza kimuntu.’’

Ku bayobozi b’amashuri, yavuze ko buri muyobozi wese agomba gukora ku buryo amashuri Gatolika arera abana bafite uburere bwiza, bafite ikinyabupfura n’urukundo, bikazatuma bagira akamaro mu muryango nyarwanda.

Avuga ku bana, yabasabye kugira indangagaciro zibaranga zirimo gufasha ababyeyi, kubaha, kugira isuku, kugira ikinyabupfura, kumvira, gukunda kwiga no gufasha bagenzi babo, ibyo byose biherekezwa n’umuco wo gusenga.

Ati ‘’Ni mwirinde ingeso mbi zose zakwangiza ejo hazaza hanyu, mwirinde ibibarangaza mu myigire byatuma mutsindwa cyangwa mugata ishuri. Bana bacu, ni mwirinde kubaho nk’abantu badafite icyerekezo; mube abana bafite icyerekezo cy’ubuzima kandi baharanira kukigeraho.’’

Yasoje ashimira abantu bose bagira uruhare mu guteza imbere uburezi Gatolika muri Diyosezi ya Ruhengeri, cyane cyane ababyeyi babugirira icyizere bagafatanya kurera, abarezi ndetse n’abafatanyabikorwa bakomeza gufasha guteza imbere amashuri yabo.