DRC: Abepiskopi Gatolika bongeye gushimangira ko batazaceceka ku ntambara n’akarengane bikomeje kuzahaza igihugu
Inama y’Abepiskopi Gatolika bo muri Repubulika Iharanira Demokarasi ya Congo (CENCO) yongeye gushimangira ko izakomeza, nta kudohoka, ubutumwa bwayo bwo kuvugira rubanda no guharanira icyubahiro cya muntu, inamagana akarengane n’ibibazo by’umutekano bikomeje kuzahaza igihugu
Ibi bikubiye mu itangazo ryasohotse nyuma y’inama y’Inteko rusange idasanzwe yabereye i Kinshasa kuva ku wa 23 kugeza ku wa 25 Werurwe 2026, aho Abakaridinali, Abarkiyepiskopi n’Abepiskopi bagize CENCO baganiriye ku butumwa bwabo bwa gishumba ndetse n’ubumwe bwabo.
Bagaragaje ko intego yabo ari uguteza imbere icyubahiro kidashobora kuvogerwa cy’umuntu no guteza imbere imibereho myiza y’abaturage ba Congo. Muri urwo rwego, bagaragaje impungenge zikomeye ku bibazo by’umutekano n’ubutabazi bikomeje kwibasira abaturage, bashimangira ko batazaceceka imbere y’ibi bibazo.
Bagize bati “Kiliziya ntishobora kwirengagiza cyangwa ngo iceceke imbere y’akarengane n’imibabaro byibasira abaturage, bagendeye ku butumwa bwa Papa Fransisiko wigeze kubigarukaho mu ruzinduko rwe muri icyo gihugu.”
Abepiskopi banagarutse ku mubano hagati ya Kiliziya n’inzego za politiki, bavuga ko n’ubwo buri ruhande rwigenga mu nshingano zarwo, rufite inshingano yo gukorana ku nyungu rusange z’abaturage. Bashimangiye ko Kiliziya ifite uburenganzira bwo kwamamaza ukwemera mu bwisanzure, kwigisha inyigisho mbonezamubano no gutanga ibitekerezo ku bibazo bireba imibereho rusange igihe uburenganzira bwa muntu bubangamiwe.
Ku kibazo cy’amahoro, Abepiskopi bashimangiye ko ibiganiro ari byo byiza kurusha intambara, bibutsa ko “intambara ari igihombo cya politiki n’ubumuntu, kandi ari ugutsindwa gukomeye,” nk’uko byagiye bigarukwaho kenshi na Papa Fransisiko.
Bashishikarije kandi gushyigikira gahunda y'Amasezerano rusange yo guteza imbere amahoro n’imibereho myiza y’abaturage “Pacte social pour la paix et le bien-vivre ensemble” igamije amahoro n’ubwiyunge muri RDC no mu karere k’Ibiyaga Bigari, ariko bagasaba ko itagomba kwitiranywa n’ibiganiro bigamije gusangira ubutegetsi.
Mu gusoza, basabiye umugisha igihugu cya Repubulika Iharanira Demokarasi ya Congo n’abaturage bacyo, cyane cyane muri ibi bihe byegereza Pasika, babinyujije mu isengesho rya Bikira Mariya, Umwamikazi w’Amahoro.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
