DRC: Padiri Ilunga wa Diyosezi ya Mbujimayi ari mu bitaro nyuma y'igitero yagabweho n’abitwaje intwaro bamwambura moto n'amadolari ya Amerika 2,000
Padiri Jean-Richard Ilunga, Umusaseridoti wa Paruwasi yitiriwe Umutima Mutagatifu wa Bikira Mariya yo muri Diyosezi ya Mbujimayi, muri Repubulika Iharanira Demokarasi ya Congo (RDC), yagabweho igitero gikomeye n’abantu bitwaje intwaro ku itariki ya 24 Mutarama, bamusiga ari intere.
Iki gitero cyabereye ku muhanda uhuza Bena Mbuyi na Kalambayi, aho Padiri Ilunga yari yagiye gufata inkunga ingana n’amadolari ya Amerika 2,000, yari agenewe ibikorwa byo kubaka Kiliziya ya paruwasi ayobora.
Nk’uko byatangajwe na televiziyo La Dépêche TV, abo bagizi ba nabi bamwambuye ipikipiki ye, igikapu cye bwite, telefone igendanwa n’amafaranga, mbere yo kumuboha bakamusiga aho mu gihuru.
Nyuma yaje kubonwa n’abaturage bo muri ako gace, bahita bamujyana byihuse kuri Paruwasi ya Mutagatifu Alberiti i Kabimba, aho yaje gukomeza kuvurirwa mu mujyi wa Mbujimayi . Kugeza ubu, ameze neza ugereranyije n’uko yari ameze, ariko arakitabwaho n’abaganga.
Diyosezi Gatolika ya Mbujimayi yasohoye itangazo risaba ubuyobozi bw’intara kwihutira kwinjira muri iki kibazo, igasaba ko ubutabera bukorwa, kandi igasaba Imana kurinda abagaragu bayo bayizera.
Iri tangazo rigaragaza ko igitero cyarimo ibitutsi bikomeye byibasira abapadiri bagerageje kumutabara, ibintu byashenguye cyane Kiliziya n’abakirisitu bo muri ako gace. rigaragaza ko, “n’ubwo abantu bagira intege nke z’abantu, abapadiri bakomeza kuba abagaragu b’Imana, kandi ubuzima n’icyubahiro cyabo bigomba kubahwa.”
Abayobozi ba Kiliziya n’abakirisitu barahamagarira abantu bose gusengera Padiri Ilunga, ndetse n’abandi bapadiri bose bakorerwa ihohoterwa hirya no hino ku isi. Iyo raporo inasaba ubuyobozi gufasha mu gushakisha ipikipiki ye no gufata abagize uruhare muri icyo gitero.
Kubera gukangurwa cyane n’iki gikorwa cy’ubugizi bwa nabi, Guverineri w’Intara ya Kasaï Oriental, Jean-Paul Mbwebwa Kapo, yasuye Padiri Ilunga ku Cyumweru, tariki ya 25 Mutarama, agaragaza ubufatanye bwe bwite n’ubw’intara
Guverineri yamaganye bikomeye ibi bikorwa by’ubugizi bwa nabi, anategeka inzego zibishinzwe gushakisha no gukurikirana abakoze icyo cyaha, ashimangira ko umuco wo kudahana utazihanganirwa. Yongeye kwemeza ko ubuyobozi bw’intara bwiyemeje guteza imbere amahoro, umutekano n’ubumwe bw’abaturage mu Ntara ya Kasaï Orienta
Ibitekerezo (0)
- Nta gitekerezo kirahaba. Ba uwa mbere utanga igitekerezo.
