Gakenke: Meya yasabye abagore n’abakobwa barangije Ubuforomo n’Ububyaza muri RHIH kwirinda inzara z’inkorano

Yabitangaje ku wa 18 Kamena 2026, mu muhango wo gutanga impamyabumenyi ku banyeshuri 239 barangije amasomo yabo mu mashami y’Ubuforomo (General Nursing) n’Ububyaza (Midwifery) mu Ishuri Rikuru ry’Ubuzima rya Ruli (RHIH Sainte Rose de Lima), wabereye muri Centre Saint Paul i Kigali.

Mbere yo guhabwa impamyabumenyi, aba banyeshuri bakoze indahiro y’umwuga, biyemeza kurinda ubuzima bw’abarwayi, kubahiriza amahame ngengamyitwarire y’abaforomo n’ababyaza no gukorera igihugu mu bunyangamugayo no mu bwitange.

Mu butumwa bwe, Mukandayisenga Vestine yavuze ko umwuga w’ubuforomo n’ububyaza usaba kubahiriza amahame y’isuku, umutekano w’abarwayi n’imyitwarire iranga ubunyamwuga. Yavuze ko hari imyitwarire imwe n’imwe ikomeje kugaragara mu bakozi bamwe bo mu rwego rw’ubuzima ishobora kubangamira inshingano zabo, agaruka cyane ku gukoresha inzara z’inkorano.

Yabwiye aba barangije ko bagomba kwirinda ikintu cyose cyabangamira akazi kabo cyangwa cyashyira ubuzima bw’abarwayi mu kaga, cyane cyane mu kazi k’ububyaza aho umubyeyi n’umwana baba bakeneye kwitabwaho mu buryo bwitondewe kandi bwubahiriza amahame y’isuku.

Aha ni ho yatanze urugero rw’ibyo yiboneye ubwe, agira ati “Twagiye tubona ko harimo igitsina gore kandi ari na bo benshi muri mwe mwarangije uyu munsi, ariko hari ibintu byateye muri iyi minsi umuntu asigaye agenda bakamuteraho izindi nzara. Mutekereze namwe umuforomo n’umubyaza bateyeho izindi nzara no kwambara uturindantoki bikagora, akajya kubyaza umuntu. Impamvu mbivuze ni uko byabaye.”

Meya Mukandayisenga yasobanuye ko nubwo bamwe babifata nk’uburyo bwo kwirimbisha, mu rwego rw’ubuvuzi bishobora kugira ingaruka ku murimo bakora. Inzara ndende cyangwa iz’inkorano zishobora kubangamira ikoreshwa ry’uturindantoki, kongera ibyago byo gukwirakwiza umwanda cyangwa mikorobe, ndetse zikaba zanakomeretsa umurwayi.

Mu rwego rw’ububyaza by’umwihariko, inzara z’inkorano zishobora guteza impanuka yo gukomeretsa umubyeyi uri kubyara cyangwa umwana uvuka, ari na yo mpamvu abasabye guha umwanya wa mbere umutekano w’abarwayi kurusha ibindi byose.

Yanaboneyeho kwibutsa aba barangije ko ibikorwa byabo bizahora bifitanye isano n’izina ry’ishuri bizeho, abasaba kuzaribera ba ambasaderi beza aho bazakorera hose.

Yagize ati “Icyo nashakaga kongeraho ni uko twifuza ko mujye mwitondera no kwirinda kuvuga aho wize. Rwose umuntu waba atazakora inshingano nk’uko muzirahiriye, uzumva atabasha kubahiriza amahame ngengamyitwarire y’umwuga nk’uko murahiriye, azajye yirinda kuvuga ko yize i Ruli, atazatuma abandi bagira ubwoba bwo kuhiga bagira ngo ni zo ndangagaciro bahakuye.”

Ibi byashimangiwe kandi na Dr Habimana Olivier, Umuyobozi w’Ishami rishinzwe Ikoranabuhanga n’Ubushakashatsi mu Rwego rw’Igihugu Rushinzwe Amashuri Makuru na Kaminuza (HEC), wari uhagarariye Minisiteri y’Uburezi muri uwo muhango.

Yavuze ko umukozi w’ubuzima ushyira imbere imyitwarire ibangamira inshingano ze aba atarasobanukiwe neza amasomo ajyanye n’imyitwarire n’ubunyamwuga yigishijwe.

Ati “Meya yatanze urugero rw’umuganga wateye inzara ku zindi kandi agomba kujya kubyaza. Uwo muganga aba atarumvise neza isomo rya Ethics and Professionalism. Ibyo biratanga urugero kandi bikaduha umukoro natwe nk’abarezi aho tugomba gushyira imbaraga.”

Uretse kubasaba kubahiriza amahame y’umwuga,umuyoboi w'akarere ka Gakenke, Mukandayisenga Vestine yanagaragaje ko aba barangije bakeneyewe cyane ku isoko ry’umurimo, by’umwihariko mu Karere ka Gakenke gafite icyuho cy’abaforomo 68 n’ababyaza 46.

Yagize ati “Dufite icyuho cy’abaforomo 68, mwe murangije tubahaye ikaze. Abashaka kuza i Gakenke muze. Ababyaza na bo dufite icyuho cy’abagera kuri 46.”

Yongeyeho ko aka karere gafite poste de santé zigera kuri 67, ariko kubona abakozi b’ubuzima bazikoramo bikiri ikibazo, bigatuma zimwe zitabasha gutanga serivisi uko bikwiye.

Ishuri Rikuru ry’Ubuzima rya Ruli (RHIH Sainte Rose de Lima) ni ishuri rikuru ryigenga ryashinzwe na Arkidiyosezi Gatolika ya Kigali rifite ikicaro gikuru mu Murenge wa Ruli, Akarere ka Gakenke. Ryatangiye ari ishuri ryisumbuye ryitwaga ESSA Sainte Rose de Lima mu 2001 mbere yo kuzamurwa rikaba ishuri rikuru mu 2013. Ubu ritanga amasomo mu mashami y’Ubuforomo n’Ububyaza ku rwego rw’ikiciro cya mbere cya kaminuza (Diploma) n’icya kabiri cya Kaminuza (Bachelor’s Degree), ndetse rifite n’ishami rikorera muri Centre Saint Paul i Kigali