Nyiricyubahiro Antoine Karidinali Kambanda, Arkiyepiskopi wa Kigali yujuje imyaka 68 y’amavuko

Antoine Karidinali Kambanda ni umwe mu bashumba bakomeye muri Kiliziya Gatolika mu Rwanda no ku rwego rw’Isi, aho amaze imyaka myinshi akora ubutumwa bw’iyogezabutumwa, ayobora abakristu kandi agira uruhare mu bikorwa bitandukanye bigamije guteza imbere Kiliziya n’imibereho myiza y’abaturage.

Urugendo rwe mu buyobozi bwa Kiliziya rwagiye rurangwa n’inshingano zitandukanye, zirimo iz’ubusaserdoti, iz’Ubwepiskopi n’iz’ubuyobozi bwa Arkidiyosezi ya Kigali.

Ku wa 8 Nzeri 1990 ni bwo Antoine Karidinali Kambanda yahawe ubusaserdoti, ahabwa inshingano zo gukomeza umurimo wo kwamamaza Ivanjili no gukorera Imana n’abagize umuryango wayo.

Nyuma y’imyaka isaga 22 ari umupadiri, ku wa 7 Gicurasi 2013, yagizwe Umwepiskopi wa kane wa Diyosezi ya Kibungo. Yimikwa ku mugaragaro ku wa 20 Nyakanga 2013, atangira kuyobora iyo Diyosezi, ashinzwe gukomeza ubutumwa bwa Kiliziya Gatolika muri iyo Diyosezi.

Nyuma y’imyaka itanu ayoboye Diyosezi ya Kibungo, ku wa 19 Ugushyingo 2018, Papa Fransisiko yamugize Arkiyepiskopi wa Kigali. Yimitswe ku mugaragaro kuri uwo mwanya ku wa 27 Mutarama 2019.

Indi ntambwe ikomeye yaranze urugendo rwe muri Kiliziya ni iyo kugirwa Karidinali. Ku wa 28 Ugushyingo 2020, yashyizwe mu rwego rw’Abakaridinali na Papa Fransisiko, bimuha umwanya wihariye mu buyobozi bwa Kiliziya Gatolika ku rwego rw’Isi.

Kugirwa Karidinali ni imwe mu nshingano n’icyubahiro gikomeye muri Kiliziya Gatolika, kuko Abakaridinali bafasha Papa mu miyoborere ya Kiliziya ndetse n’abujuje ibisabwa bakagira uruhare mu matora y’Umushumba wa Kiliziya Gatolika ku Isi.

Intego ye bwite ni “Ut Vitam Habeant”, amagambo y’Ikilatini asobanura ngo “Kugira ngo bagire ubuzima.” Iyi ntego igaragaza ubutumwa bushingiye ku guharanira ko abantu bahabwa ubuzima busesuye, binyuze mu kwemera no mu murimo wa Kiliziya.

Kuri iyi tariki y’isabukuru ye y’imyaka 68, abakirisitu n’abandi bakurikirana ibikorwa bye barabona umwanya wo kuzirikana urugendo rwe rw’ubutumwa muri Kiliziya Gatolika, kuva ahawe ubusaserdoti mu 1990, akayobora Diyosezi ya Kibungo, kugeza abaye Arkiyepiskopi wa Kigali na Karidinali.

Ni imyaka 68 y'ubuzima, irimo imyaka isaga 36 mu murimo w'ubusaserdoti, n'urugendo rw'imyaka isaga 13 mu nshingano z'ubwepiskopi.