Papa Leo XIV yatangiye urugendo rw’iminsi 12 muri Amerika y’Epfo

Indege ya sosiyete ITA Airways yari itwaye Papa Leo XIV n’abanyamakuru bamuherekeje yahagurutse ku Kibuga Mpuzamahanga cy’Indege cya Fiumicino i Roma mu Butaliyani, saa moya n’iminota itanu za mu gitondo cyo ku wa Gatanu tariki ya 6 Ugushyingo 2026, itangiza ku mugaragaro uru rugendo rw’ubutumwa.

Biteganyijwe ko Umushumba wa Kiliziya Gatolika agera ku Kibuga Mpuzamahanga cy’Indege cya Montevideo-Carrasco muri Uruguay ahagana saa kumi n’igice z’umugoroba, aho aza kwakirwa mu muhango wemewe na Leta.

Muri Montevideo, ibikorwa bye biratangirira mu muhango wo kumwakira ubera mu Rukiko rw’Ubwigenge (Independence Square) saa kumi n’imwe n’igice z’umugoroba. Nyuma yaho, ahure n’abahagarariye inzego z’ubuyobozi, sosiyete sivile ndetse n’abadipolomate bahagarariye ibihugu byabo muri icyo gihugu.

Papa Leo XIV kandi azasura Perezida wa Repubulika ya Uruguay. Nyuma y’uru ruzinduko, azayobora amasengesho ya nimugoroba (Vespers) muri Katedrali ya Bikira Mariya Utasamanywe Icyaha n’Abatagatifu Filipo na Yakobo, aherekejwe n’Abepiskopi, Abapadiri, Abadiyakoni, abiyeguriye Imana n’abanyeshuri biga mu iseminari.

Urugendo ruzakomereza muri Argentine na Peru

Nyuma ya Uruguay, Papa Leo XIV azakomereza urugendo rwe muri Argentine, aho azasura imijyi ya Buenos Aires, Córdoba na Luján.

Azahava yerekeza muri Peru, igihugu cya nyuma azasura muri uru rugendo. Muri icyo gihugu, ateganya kugera mu mijyi ya Lima, Chiclayo, Cusco na Pucallpa.

Uru rugendo ruzasozwa ku wa 17 Ugushyingo 2026, nyuma y’iminsi 12 Papa Leo XIV azaba amaze mu bihugu bitatu. Biteganyijwe ko azakora ingendo zigera kuri 12 mu ndege, agasura imijyi icumi, ndetse akageza ku bo azahura na bo ubutumwa bugera kuri 40, bwose azatanga mu rurimi rw’Icyesipanyolo.