Ibyaranze uruzinduko rw’ubutumwa Papa Leo XIV yagiriye muri Angola

Papa Leo XIV yageze ku kibuga cy’indege mpuzamahanga cya Luanda ku gicamunsi cyo kuwa 18 Mata 2026, yakirwa n’abayobozi bakuru b’igihugu cya Angola ndetse n’abahagarariye Kiliziya Gatolika muri iki gihugu.

I Luanda, hatangijwe ku mugaragaro igice cya gatatu cy’uruzinduko rwe muri Afurika, aho yatangiye ubutumwa bushimira abaturage ba Angola ku kwakira neza abashyitsi no ku murage wo gukomeza kwimakaza amahoro nyuma y’amateka y’intambara igihugu cyanyuzemo.

Ubutumwa nyamukuru Papa yagejeje ku baturage, yashimangiye ko amahoro n’ubwiyunge ari inkingi z’iterambere rirambye, asaba Abanyafurika gukomeza kubaka ejo hazaza hashingiye ku bwubahane no ku butabera.

Yagize ati“Umuryango ni wo gicumbi cy’umuco n’uburere bwiza, nyamara muri iki gihe ufite ibibazo byinshi mu babyeyi no ku bana. Bimwe mu bibazo bigaragara cyane cyane harimo ibishingiye ku mibanire mibi. Usanga amakimbirane n’ihohoterwa ari byinshi, rimwe na rimwe bikarangira habayeho za gatanya ndetse bikaba bibabaje hari n’aho usanga umuntu avutsa ubuzima uwo bashakanye.”

Ku munsi wakurikiyeho, kuwa 19 Mata 2026, Papa Leo XIV yatuye igitambo cya Misa i Luanda cyitabiriwe n’imbaga y’abakirisitu n’abihaye Imana baturutse hirya no hino mu gihugu.

Muri iyi Misa, yibanze ku rubyiruko, arushishikariza kwirinda ibishuko birimo ruswa, ihohoterwa n’ibiyobyabwenge, ahubwo bagaharanira kuba abubatsi b’amahoro.

Yagize ati “Urubyiruko rwa Afurika rufite imbaraga zo guhindura amateka y’umugabane warwo, igihe rwiyemeje gukorera mu kuri no mu rukundo.”

Muri uru ruzinduko kandi, Papa Leo XIV yasuye ibigo byita ku barwayi ndetse anaganira n’imiryango itishoboye, abaha ihumure n’icyizere.

Abibutsa ko gukorera abakene n’abarwayi ari ugukorera Kristu ubwe, asaba abakirisitu kudatererana abafite intege nke.

Kuwa 20 Mata 2026, Papa Leo XIV yagiranye ibiganiro n’abayobozi b’igihugu ndetse n’abahagarariye amadini atandukanye.

Ibiganiro byibanze ku ruhare rw’amadini mu kwimakaza amahoro, kurwanya ubukene no guteza imbere uburenganzira bwa muntu.

Papa yaboneyeho kubasaba ko habaho ubufatanye busesuye hagati ya Leta n’amadini mu gushakira hamwe ibisubizo by’ibibazo bibangamiye abaturage.

Uruzinduko rwa Papa Leo XIV muri Angola rwasize ubutumwa bukomeye ku bijyanye no; Gukomeza kubaka amahoro n’ubwiyunge, gushyira imbere urubyiruko nk’imbaraga z’ejo hazaza, kwita ku batishoboye no kubarengera no gukomeza ubufatanye hagati ya Kiliziya na Leta.