Icyo Vatikani yatangaje ku rupfu rw’Umwepiskopi wo muri Mozambike wishwe arashwe

Mu butumwa bwatangajwe n’Ibiro Ntaramakuru bya Vatikani binyuze ku muyoboro wa Telegram w’Ibiro Ntaramakuru bya Nyirubutungane, Papa Lewo wa XIV yavuze ko yakiranye agahinda kenshi inkuru y’urugomo” rwahitanye uyu mushumba wa Kiliziya. Yatangaje kandi ko yifatanyije n’abakristu ba Diyosezi za Quelimane na Beira, ndetse n’abaturage bose ba Mozambike, muri iki gihe cy’akababaro n’urujijo ku rupfu rw’uyu Mwepiskopi.

Papa Lewo wa XIV yagize ati “Nakiranye agahinda inkuru y’iki gikorwa cy’urugomo cyahitanye Nyiricyubahiro Myr Osório Citora Afonso, Umwepiskopi wa Quelimane n’Umuyobozi wa Kiliziya wa Beira. Nifatanyije n’abaturage b’izo diyosezi ndetse n’aba Mozambike bose mu isengesho muri iki gihe cy’urujijo, ndasaba Imana kubahumuriza, kurinda buri mugabo n’umugore mu rukundo rwayo no guhagarika ukuboko kw’abanyarugomo

Ubu butumwa bwatangajwe na Dr. Matteo Bruni, Umuyobozi w’ibiro Ntaramakuru bya Vatikani, mu gihe Papa yari mu rugendo rw’ubutumwa bwa gishumba muri Espagne.

Amakuru yatangajwe n’inzego z’ubugenzacyaha za Mozambike agaragaza ko Myr Afonso yishwe arashwe amasasu menshi mu gituza no hafi y’umutima, bikamuviramo urupfu ako kanya. Abagabye icyo gitero bivugwa ko binjiye mu rugo rw’Umwepiskopi rwa Quelimane mu masaha ya mu gitondo cya kare. Kugeza ubu ntiharamenyekana impamvu nyayo y’ubu bwicanyi cyangwa ababugizemo uruhare.

Inzego za SERNIC, urwego rushinzwe iperereza ku byaha muri Mozambike, zatangaje ko iperereza rikomeje kugira ngo hamenyekane impamvu n’abakoze ubu bwicanyi bwateye ubwoba abakristu n’abaturage benshi b’icyo gihugu.

Urupfu rwa Musenyeri Afonso rwateje agahinda gakomeye muri Kiliziya Gatolika ya Mozambike. Musenyeri Inácio Saúre, Arikiyepisikopi wa Nampula akaba na Perezida w’Inama y’Abepiskopi Gatolika ba Mozambike, yasabye abakristu gukomeza kugira ukwizera no kugaragaza ubuvandimwe muri iki gihe gikomeye.

Musenyeri Osório Citora Afonso yari afite imyaka 54. Yari umwe mu bashumba bazwi cyane muri Kiliziya ya Mozambike, akaba yari anasanzwe ari Umunyamabanga Mukuru w’Inama y’Abepiskopi ba Mozambike. Mbere yaho, hagati ya 2017 na 2023, yakoreye muri Dikasteri ya Vatikani ishinzwe Iyogezabutumwa (Dicastery for Evangelization), aho yagize uruhare mu bikorwa byo gushyigikira Kiliziya ziri mu bihugu bikiri mu nzira y’iyogezabutumwa.

Abamuzi bavuga ko yari umushumba wicishaga bugufi, wegereye abakene kandi uhora aharanira amahoro n’ubwiyunge mu gihugu cye cyugarijwe n’ibibazo by’umutekano mucye mu bice bitandukanye.

Perezida wa Mozambike, Daniel Francisco Chapo, na we yagaragaje akababaro ke avuga ko urupfu rwa Musenyeri Afonso ari igihombo gikomeye kuri Kiliziya no ku gihugu cyose. Yashimangiye ko uyu mushumba yari umuntu waharaniraga amahoro, ubwiyunge n’iterambere ry’abaturage.

Ku rwego rwa Afurika, Ihuriro ry’Inama z’Abepiskopi Gatolika muri Afurika na Madagasikari (SECAM) ryamaganye ryivuye inyuma ubu bwicanyi, ribwita “icyaha ndengakamere” cyibasiye ubuzima bw’umuntu, amahoro, ubutabera n’ubwisanzure bw’idini. Ryasabye kandi leta ya Mozambike gukora iperereza ryimbitse kandi riboneye kugira ngo ukuri kujye ahagaragara.

Mu gihe iperereza rikomeje, ubutumwa bwa Papa Leo wa XIV bwabaye ijwi ry’ihumure ku bakristu ba Mozambike no kuri Kiliziya yose. Papa yasabye abakristu gukomeza gusenga no kwiringira Imana, anasaba ko urugomo rwugarije ibice byinshi bya Afurika rwahagarara.