Ihuriro ry’Abepiskopi muri Afurika na Madagascar n’Umuryango w’Ubumwe bw’Afurika bagiye gushyira umukono ku masezerano mashya agamije amahoro n’iterambere

Nk’uko bigaragara mu itangazo rigenewe abanyamakuru ryashyizwe ahagaragara n’Ibiro bya SECAM bishinzwe umubano n’Umuryango w’Ubumwe bw’Afurika kuri uyu wa Gatatu, tariki ya 11 Gashyantare 2026, ayo masezerano azasinyirwa ku cyicaro gikuru cya Komisiyo y’Umuryango w’Ubumwe bw’Afurika kiri i Addis Ababa muri Ethiopia, ku wa Gatanu tariki ya 13 Gashyantare 2026.

Ku ruhande rw’ihuriro ry’Abepiskopi Gatolika muri Afrika na Madagascar (SECAM), amasezerano azashyirwaho umukono na Nyiricyubahiro Fridolin Karidinali Ambongo Besungu, Arikiyepisikopi wa Kinshasa muri Repubulika Iharanira Demokarasi ya Congo akaba na Perezida wa SECAM. Ku ruhande rw ’Umuryango w’Ubumwe bw’Afurika(AU), azashyirwaho umukono na Ambasaderi Bankole Adeoye, Komiseri ushinzwe Politiki, Amahoro n’Umutekano muri Komisiyo y’uwo muryango.

Aya masezerano mashya aje asimbura ayari yarashyizweho umukono ku wa 19 Kanama 2015, agamije kurushaho kunoza no kuvugurura ubufatanye hagati y’impande zombi, hashingiwe ku mavugurura n’imiterere mishya y’inzego z’Umuryango w’Ubumwe bw’Afurika.

Mu ntego z’aya masezerano harimo gushimangira ibikorwa byo guteza imbere no kurengera uburenganzira bwa muntu n’ubw’abaturage, guteza imbere imiyoborere myiza, demokarasi n’iyubahirizwa ry’amategeko. Harimo kandi gushyigikira ibikorwa byo kubaka amahoro, kwimakaza ubwiyunge n’ubumwe mu bihugu bya Afurika.

Byongeye kandi, aya masezerano ateganya ubufatanye mu guhangana n’ibibazo by’ubutabazi bwihuse, kurengera impunzi n’abandi bantu bari mu kaga, no kurushaho kwita ku bidukikije no guhangana n’imihindagurikire y’ikirere binyuze mu micungire irambye y’umutungo kamere. Ibi byose bigamije guteza imbere imibereho myiza ya muntu, bijyanye n’Icyerekezo cya Afurika 2063 cyiswe “Afurika twifuza”, kigamije umugabane wunze ubumwe, utera imbere kandi utekanye, utwarwa n’abaturage bawo.

Gushyira umukono kuri aya masezerano bifite akamaro kihariye, kuko bibaye hashize iminsi mike SECAM ifatanyije na AU gutegura inama yihariye ku kurengera umutungo w’amazi n’isuku, yabaye ku wa 7 Gashyantare 2026 i Addis Ababa. Iyo nama yahuje abafatanyabikorwa batandukanye ku rwego rwa Afurika n’isi yose, harimo n’intumwa za Vatikani.

Aya masezerano kandi azasinywa mbere y’umunsi umwe gusa ngo habe Inama ya 39 ihuza Abakuru b’Ibihugu na za Guverinoma zigize Umuryango w’Ubumwe bw’Afurika, iteganyijwe ku wa 14 na 15 Gashyantare 2026.

Ubu bufatanye bugaragaza uruhare Kiliziya Gatolika ikomeje kugira mu gushyigikira gahunda zigamije iterambere ry’umugabane wa Afurika. Bugaragaza kandi ko gukorera hamwe hagati y’imiryango mpuzamahanga, za guverinoma, imiryango itegamiye kuri Leta n’ishingiye ku myemerere ari ingenzi mu guteza imbere ubutabera, amahoro n’iterambere rya muntu.

Ibi bishimangira ihame rivuga ko ibibazo bya Afurika bikwiye gushakirwa ibisubizo n’Abanyafurika ubwabo, bishingiye ku bufatanye, gusangira inshingano no kugira icyerekezo rusange cy’ejo hazaza h’umugabane wa Afurika.