Imitwe yitwaje intwaro muri Cameroun yatangaje agahenge k’iminsi itatu kubera uruzinduko rwa Papa Lewo wa XIV

Mu itangazo ryasohotse ku wa 13 Mata 2026, Inama iyobora ibyo bice izwi nka Ambazonia Governing Council yavuze ko yashyizeho gahunda y'agahenge k'ituze yiswe “Safe Travel Passage” izamara iminsi itatu, kuva ku wa 15 kugeza ku wa 17 Mata 2026.

Iyi nama yavuze ko iki cyemezo cyafashwe mu rwego rwo guha umutekano abaturage, abemera, abayobozi ba Kiliziya ndetse n’abandi bose bifuza kwitabira ibikorwa biteganyijwe mu ruzinduko rwa Papa.

Mu butumwa bwabo, aba bitwaje intwaro bagize bati“Uru ruzinduko rufite agaciro gakomeye mu rwego rwa roho. Turifuza ko abaturage bashobora kugenda no kugaruka mu mutekano, bitabira amasengesho n’ibikorwa bya Kiliziya nta nkomyi.”

Bakomeje bavuga ko nubwo bakomeje guharanira ubwigenge bw’utwo turere, bemera ko hari ibihe bisaba gushyira imbere inyungu rusange z’abaturage, cyane cyane mu bihe bifite igisobanuro gikomeye mu buzima bwa roho.

Ku ruhande rwa Leta ya Cameroon, abayobozi bagaragaje ko bishimiye iki cyemezo, bavuga ko gishobora kuba intambwe iganisha ku mahoro arambye. Bamwe mu bayobozi bagaragaje ko kuba imitwe irwanya Leta ishobora kwemera guhagarika imirwano, n’iyo byaba ari by’agateganyo, ari ikimenyetso cy’uko ibiganiro bishoboka.

Mu itangazamakuru ryo muri Cameroun, bamwe mu basesenguzi bagaragaje ko uru ruzinduko rwa Papa rushobora kugira uruhare rukomeye mu kugarura ituze muri utu turere tumaze imyaka igera ku icumi mu makimbirane yatangiye mu 2017.

Abasesenguzi mu bya politiki bavuga ko ubutumwa bwa Papa Leo XIV buzibanda ku mahoro, ubwiyunge n’ubutabera, bushobora gutanga icyizere gishya ku baturage bugarijwe n’aya makimbirane.

Uru ruzinduko rwa Papa muri Cameroun ni icyiciro cya kabiri cy’urugendo rwe rwa tariki ya 13 kugeza ku ya 23 Mata 2026, aho aturutse muri Algeria mbere yo gukomereza muri Angola na Equatorial Guinea.

N'ubwo aka gahenge ari ak’igihe gito, karatanga icyizere ko amahoro ashobora kugerwaho binyuze mu biganiro, cyane cyane iyo hari ubushake bw’impande zose.