Inama Nyafurika y'Urunana Mpuzamahanga rw'Isengesho rya Papa irimo kubera mu Rwanda

Iyi nama ibaye ku nshuro ya gatandatu, ihuje abayobozi n'abahuzabikorwa b'urunana mpuzamahanga rw'isengesho rya Papa mu bihugu bitandukanye by'Afurika ndetse n'abahagarariye uturere kuri uyu mugabane. Mu bandi bitabiriye iyi nama harimo umuhuzabikorwa w'umushinga Inzira y'Umutima, uvuka mu gihugu cy'Argentina ndetse n'umuhuzabikorwa w'uyu mushinga muri Afurika. Akaba ari na bo batanze inyigisho mu mwiherero wagarutse ku mushinga wiswe Inzira y'Umutima.

Padiri Fabien Gasigwa, Umuyobozi w'umuryango w'Abayezuwiti mu Rwanda no mu Burundi ni we watangije iyi nama ku mugaragaro, bikaba binateganyijwe ko Musenyeri Serviliyani Nzakamwita, Perezida wa Komisiyo y'Abepiskopi ishinzwe iyogezabutumwa ry'urubyiruko azatura igitambo cya Misa isoza iyi nama tariki 28 Nyakanga 2022.

Nk'uko twabitangarijwe na Padiri Martin Murekezi, Umuhuzabikorwa w'urunana mpuzamahanga rw'Isengesho rya Papa n'umuryango w'inkoramutima z'Ukarisitiya mu Rwanda, iyi nama yagarutse ku mikorere y'uru runana mu bihugu bitandukanye by'Afurika, irebera hamwe uko ibihugu byakunganirana mu gusangira ubumenyi n'ibikoresho. Iyi nama kandi yaranzwe n'umwiherero wagarutse ku nzira y'umutima, mu ntera zayo zose uko ari icyenda.

Urunana Mpuzamahanga rw'Isengesho rya Papa ni serivisi ya Kiliziya ifite ubutumwa bwo gukora ubukangurambaga mu isengesho ndetse n'ibikorwa ku bakristu gatolika, cyane cyane ku kwita ku bibazo byugarije umuntu dusanga mu Isengesho rya Papa rya buri kwezi no kwita ku butumwa bwa Kiliziya. Urunana rufite ishami ry'abana n'urubyiruko ari ryo umuryango w'inkoramutima z'Ukarisitiya. Uyu muryango ubarizwa mu maparuwasi agera ku 186 mu madiyosezi yose. Mu Rwanda, Urunana rw'isengesho rya Papa, rufite abanyamuryango ibihumbi 30, barimo abagera ku bihumbi 20 bo mu muryango w'inkoramutima z'Ukarisitiya n'abagera ku bihumbi 10 bo mu runana mpuzamahanga rw'isengesho rya Papa.

Nk'uko Padiri Martin Murekezi, Umuhuzabikorwa w'urunana mpuzamahanga rw'Isengesho rya Papa n'umuryango w'inkoramutima z'Ukarisitiya mu Rwanda yabidutangarije, kimwe mu byo iyi nama yashimangiye ni uguteza imbere imishinga itandukanye y'ubukangurambaga bw'isengesho rya Papa, usanga mu bihugu bimwe by'Afurika yaradindiye.

Muri iyo mishinga harimo videwo ya Papa isohoka buri kwezi igasobanura birambuye isengesho rya buri kwezi. Harimo kandi umushinga watangijwe na Papa witwa "Click to play" irimo ibijyanye n'amasengesho ya Papa byose. Harimo kandi "Click to play E Rosary" irimo Rozari mu mashusho amajwi no mu nyandiko. Harimo kandi "Chemin du coeur" ari na yo yagarutsweho muri iyi nama. Iyi mishinga yose y'ubukangurambaga bujyanye n'isengesho rya Papa bayobozi bakaba basabwa kuyimenye kugira ngo bayiteze imbere mu bo bahagarariye kandi banayimenyeshe abakristu muri rusange.

Iyi nama yitabiriwe n'ibihugu 15 byahagarariwe n'abantu bagera kuri 55. U Rwanda rubaye igihugu cya gatandatu cyakiriye. Izabanje zikaba zarabereye mu bihugu bya Tanzaniya, Nijeriya, RDC, Kameroni na Kenya. Muri 2020 inama nk'iyi yagombaga kubera muri Etiyopiya ariko ntiyaba kubera icyorezo cya Covid-19. Mu bihugu byitabiriye iyi nama harimo u Rwanda, u Burundi, Angola, Afurika y'Epfo, Burkina Faso, Kameroni, Cote d'Ivoire, Kenya, Madagascar, RDC, Uganda, Gabon, Etiyopiya na Argentine.