Inkomoko n’Impamvu by’igitabo Duhimbaze Misa uko bikwiye, cyamuritswe ku mugaragaro

Ni igitabo gikubiyemo amabwiriza agamije gukosora no gukumira imyitwarire n’imigirire idakwiye byagiye bigaragara hirya no hino mu mihimbarize y’Igitambo cya Misa. Nk’uko bigaragara mu nteruro yacyo, kirimo amabwiriza y’Abepiskopi Gatolika mu Rwanda yibutsa imihimbarize iboneye y’Igitambo cy’Ukaristiya.

Musenyeri Vincent Harolimana yasobanuye ko inkomoko y’iki gitabo ishingiye ku nshingano z’Abepiskopi zo gufasha umuryango w’Imana guhimbaza neza Misa, gusenga mu mutuzo no guhura n’Imana hatabayeho akajagari cyangwa kubusanya. Yavuze ko kandi kigamije gukumira amakosa no gukosora ibyangirijwe mu rwego rwa Liturujiya.

Yagize ati “Abepiskopi Gatolika mu Rwanda bafite gahunda yo gufasha umuryango w’Imana mugari kunoza Liturujiya. Ubu hari byinshi byakosorwa hifashishijwe aka gatabo, kuko kari muri uwo murongo wo kugarura imihimbarize iboneye ya Misa.”

Yakomeje abishimangira avuga ko mu isi igenda itera Imana n’ibyayo umugongo, ari ngombwa kugaruka ku cyubahiro cy’Imana n’ibyayo, ari byiza kugaruka ku cyubahiro cy’Imana n’ibyayo ntibibe mu magambo ahubwo bigashyirwa mu bikorwa bifatika.

Musenyeri Vincent yagaragaje ko Inama y’Abepiskopi Gatolika mu Rwanda yasanze ari ngombwa kugaruka ku mihimbarize iboneye y’Igitambo cya Misa, bitewe n’uko hari ahagaragaye gutandukira bitera urujijo, akajagari n’ukudasobanukirwa, nyamara Misa ari ishingiro ry’ubumwe mu migirire no mu mibereho y’abakiristu, by’umwihariko mu murongo wa Sinodi utoza abantu kugendera hamwe.

Ati “Iki gitabo kizadufasha gukosora imigirire idahwitse, gufata umurongo muzima no gufasha umuryango w’Imana gutura Igitambo kiyinogeye.”

Yakomeje avuga ko n’ubwo hari byinshi byagezweho mu Liturujiya mu myaka isaga 125 ishize inkuru nziza igeze mu Rwanda, hakiri icyifuzo cyo gukomeza kuyinoza.

Ati “’Hari byinshi byagezweho muri uru rwego, muri iyi myaka iri imbere turifuza kunoza Liturujiya Imana igahabwa icyubahiro na Muntu akitagatifuza.”

Musenyeri Vincent agaruka mu bikorwa bimwe na bimwe bigaragara muri iki gihe mu mihimbarize ya Misa bishobora gutera urujijo cyangwa akajagari, yibukije ko atari ngombwa gucira abantu urubanza kuko impamvu ziba zitandukanye zirimo kutamenya, kwibeshya, kumenyera ibidakwiye byakozwe igihe kirekire, uburangare cyangwa kudaha iby’Imana agaciro.

Yagize ati “Nta muntu wacira urubanza kuko impamvuzishobora kuba ari nyinshi, yewe hari n’impamvu zoroshye, umuntu yavuga nko kuitabimenya, hari ukwibeshya no guteshuka bikugwiririye, hari n’ibindi bishobora guturuka kukamenyero cyangwa se ibyo umuntu abona bikozwe igihe kirekire umuntu agacyeka ko ariko ibintu bikorwa.

Hari uburangare bushobora kubaho no kudaha iby’Imana agaciro. Ibyo byose hari igihe bishobora gutuma dukora amakosa ya Liturujiya cyangwa se bikakuviramo kubahuka ibintu by’Imana bitagatifu.”

Musenyeri Vincent yongeyeho ko hari n’aho umuntu ashobora gukora ibikorwa yumva ko ari ibya Liturujiya, nyamara bidafite agaciro kuko byakozwe nabi cyangwa habuzemo icyangombwa. Yatanze urugero avuga ko umuntu adashobora kuvuga ko yahimbaje Misa mu gihe Umugati na Divayi bidahari, kuko byaba ari ukwiyitirira no kuyobya abantu, kuko bitakozwe nkuko Kiliziya ibiteganya.

Yanavuze ko hari n’ibikorwa binyuranyije n’amategeko ya Kiliziya bishobora no gutuma hafatwa ingamba z’ibihano, cyane cyane mu rwego rw’ubusaserdoti, aho umuntu ashobora gukora ibikorwa birenze ububasha bwe.

Yatanze urugero agira ati “Ntushobora kuvuga ko ufite ibitabo, ukaba uzi uko Umwepiskopi atanga Ubusaserdoti noneho ukaba ufite n’amafuta ya Krisma, ukabona nk’umupadiri aha umudiyakoni ubupadiri ni igikorwa kidafite agaciro kubera ko Kiliziya ntabwo ariko ibiteganya. Iyo bigeze aha hazamo n’ibihano biteganywa n’amategeko ya Kiliziya mu gitabo kivuga ubucamanza n’ibihano muri Kiliziya.”

Musenyeri Vincent yatangarije kandi itangazamakuru ko ibikubiye muri aka gatabo byatoranyijwe, nyuma yo kuganirwaho n’Inama y’Abepiskopi Gatolika mu Rwanda.

Ati “Abepiskopi babigiyeho inama inshuro nyinshi mbere y’uko gasohoka, ibirimo bikaba ari ibyo twumvikanyeho bifite inkomoko zizewe, kakaba kandi kagenewe abantu bose, baba abasaserdoti nk’abibanze mu gufasha abantu guhimbaza Imana no gufasha umuryango w’mana kwitagatifuza ndetse n’abakiristu uhereye no ku matsinda afite uruhare mu bijyanye na Liturujiya nka Korali kuko hari ibyo bagomba kujya bitondera bakurikije aka gatabo.”

Agaruka ku mvugo zikoreshwa hakurikijwe uturere nk’abavuga ngo Kuvuga Misa, Kumva Misa, Kwiga Misa n’andi menshi , Musenyeri Vincent yavuze ko byarushaho kuba byiza hakoreshejwe Guhimbaza Misa, Gutura Igitambo cya Misa cyangwa se Gutura igitambo cy’Ukarisitiya kuko ayo magambo yumvikanisha neza ko icyo gikorwa gihuriweho n’ikoraniro ryose nta ndorerezi.

Igitabo Duhimbaze Misa uko bikwiye cyasohotse mu Ugushyingo 2025. Kigizwe n’intangiriro, umugereka, imitwe (chapters) 50 n’ingingo 283, kikaba kigamije gufasha Kiliziya Gatolika mu Rwanda gukomeza kunoza Liturujiya uko bikwiye.