Inkoranyabitabo y’Igihugu yatangiye kubika ibitabo mu buryo bw’amajwi

Iri murikabikorwa ryateguwe n’Inteko y’Umuco binyuze mu Ishami rya Serivisi z’Inkoranyabitabo y’Igihugu (National Library), rikaba ari ryo ryamurikiwemo ku mugaragaro gahunda nshya yo gushyingura no kubika ibitabo mu buryo bw’amajwi.

Mu kiganiro n’itangazamakuru, Ambasaderi Masozera Robert, Intebe y’Inteko y’Umuco, yasobanuye impamvu iyi nteko yatangije gahunda nshya yo kubika ibitabo mu buryo bw’amajwi, no kubishyira mu ikoranabuhanga muri rusange, agaragaza ko bigamije korohereza Abanyarwanda kugera ku bitabo no ku bumenyi bubitse mu Nkoranyabitabo y’Igihugu.

Yagize ati “Uyu munsi twongeye gukora bwa kabiri iki gikorwa cyo kumurikira Abanyarwanda serivisi z’inkoranyabitabo, ni igikorwa n’ubundi dukora kugira ngo tunamurike ibyo tubitse hano mu bubiko bwacu. By’umwihariko rero igikorwa gihari ni ukumurika ibitabo bimwe na bimwe twahisemo gushyira mu buryo bw’amajwi, mu buryo bw’ikoranabuhanga.”

yongeyeho ati "Byose tugendera ku makuru cyangwa ubushakashatsi dukora aho ibitabo tubitse hano bigera ku 16,330. Iyo urebye abatugana, 98% baciye mu buryo bw’ikoranabuhanga naho 2% ni bo baza ku isomero ry’Inkoranyabitabo y’Igihugu. Ibi bisobanuye ko ikoranabuhanga ari ryo rituma ibyo tubitse bigera kure. Ni yo mpamvu twahisemo gushyira imbaraga mu bitabo by’amajwi, cyane cyane mu rwego rwo korohereza abasomyi no kugendana n’igihe.”

Mu cyiciro cya mbere, Inteko y’Umuco yatangiriye ku bitabo bitatu birimo Imyambarire y’Abanyarwanda:Indorerwamo y’Umuco n’Iterambere, Indangagaciro z’Umuco w’u Rwanda: Igitabo Nyobozi ndetse n’igitabo kivuga ku bukwe Nyarwanda, byose bikaba bigamije gufasha Abanyarwanda kumva no gusigasira umuco wabo mu buryo bugezweho.

Mu gusobanura ibi ambasaderi Masozera yagize ati “Twahereye ku bitabo bitatu twifuza ko byagera kure. Ariko si byo byonyine kuko tuzakomeza, nubwo bisaba amikoro. Igitabo kiri mu majwi kirihuta kugera ku muntu; ushobora kugishyira muri telefone yawe ukagenda ucyumva, ukagera aho ujya wakirangije. Mu gihe impapuro zishobora kugutwara iminsi myinshi, amajwi yo aguha uburyo bwo gusoma n’igihe gito.”

Ambasaderi Masozera yasobanuye ko kandi iyi gahunda yatekerejwe hashingiwe ku bushakashatsi bwerekanye ko urubyiruko ruri hagati y’imyaka 15 na 25 ari rwo ruri ku isonga mu gusoma, ku kigero cya 77%, kandi rukaba rukunze gukoresha ikoranabuhanga cyane cyane ibitabo by’amajwi.

Yongeyeho ko iyi gahunda igamije no gukangurira abanditsi n’abasohora ibitabo gushyira imirimo yabo mu buryo bw’ikoranabuhanga no gutanga kopi ku Nkoranyabitabo y’Igihugu, bityo bigasakara bikagera kuri benshi.

Ati “Ntabwo hakiri ka kamenyero ka kera ko abantu bajya mu masomero gusa bagasoma. Ubu basomera mu ikoranabuhanga. Ni yo mpamvu dushishikariza abanditsi n’abasohora ibitabo gutekereza uko babishyira mu majwi no mu buryo bw’ikoranabuhanga, kuko ari bwo bizasakara bigere kure kandi badufashe no kubona kopi zabyo mu bubiko bw’igihugu.”

Abitabiriye iki gikorwa barimo abarimu, abashinzwe amasomero y’abaturage, abafatanyabikorwa batandukanye barimo za kaminuza, imiryango itari iya Leta n’abanyamakuru, bashimye iyi gahunda nshya.

Cecile Batamuriza, umuhuzabikorwa w’Isomero Rusange ryo mu Murenge wa Gasange mu Karere ka Gatsibo, yavuze ko ibitabo by’amajwi bigiye gukemura ikibazo cy’abantu batabona umwanya uhagije wo gusoma impapuro.

Ati “Bizaba byiza cyane kuko hari abantu batabona umwanya wo gusoma ibitabo byanditse mu mpapuro kubera akazi bakora. Ariko igitabo kiri mu majwi ashobora kujya kukazi acyumva atwaye imodoka, akagerayo akirangije. Ni gahunda nziza izorohereza abantu gusoma no kwiyungura ubumenyi.

Ibitabo bitatu byamuritswe mu buryo bw’amajwi byamaze gushyirwa ku rubuga rw’Inteko y’Umuco, aho Abanyarwanda bashobora kubisanga bakabikurikirana mu buryo bworoshye. Inteko y’Umuco ivuga ko iyi ari intangiriro, kandi ko izakomeza kwagura umubare w’ibitabo by’amajwi mu rwego rwo gusigasira no gusakaza umuco nyarwanda hifashishijwe ikoranabuhanga rigezweho