Inteko Rusange ya 63 y’Abepiskopi bo muri Congo yasojwe, isaba amahoro n’ubumwe bw’Abanyekongo

Mu ijambo rye ryo gusoza inama yabaye kuva ku wa 23 kugeza ku wa 28 Gashyantare, Perezida wa CENCO, Musenyeri Fulgence Muteba Mugalu, yashimiye abitabiriye inama bitewe n’umwuka mwiza waranze ibiganiro.

Yagize ati“Turashimira Imana Ishoborabyose yaduhaye kurangiza iyi nama mu muco w’ubuvandimwe, urukundo, ituze n’ubwisanzure mu gutanga ibitekerezo. Byatumye dusohoza inshingano zacu neza. Ni umwanya ukomeye w’ubufatanye bw’Abepiskopi twasangiyemo isengesho, Ijambo ry’Imana n’Ukaristiya.”

Musenyeri Muteba yasobanuye ko iyi nama yari ifite insanganyamatsiko igira iti “Gukorera hamwe dushaka kwimakaza muri Kiliziya, Umuryango w’Imana muri Congo.”

Muri iyi minsi itandatu, abitabiriye inama bakiriye raporo zaturutse mu makomisiyo 12 ya Kiliziya, basuzuma kandi dosiye zatanzwe na Komite Ihoraho.

Abepiskopi bohereje ubutumwa bwihariye ku bantu biyeguriye Imana, babasaba gukomeza kuba abahamya n’abubatsi b’icyizere binyuze mu murimo wo gukorera hamwe.

Inteko Rusange yanagarutse ku ruhare rw’imiryango y’abalayiki, by’umwihariko ishimangira akamaro k’Umuryango w’Ababyeyi b’Abagatolika (Catholic Mothers) mu buzima bwa Kiliziya n’imibereho y’igihugu.

Abepiskopi babashishikarije gukomeza guharanira indangagaciro za gikiristu, no kwishyira hamwe mu mashyirahamwe akorera munsi y’ubuyobozi bwa buri Diyosezi.

Mu byemezo by’ingenzi byatangajwe harimo; Kwemeza amategeko y’Inama y’Ubukungu ya Sinodi, Kwemeza amabwiriza ya Komite ya Tewolojiya ya Sinodi no Kwemeza gahunda y’inyigisho y’amasomo y’iyobokamana mu mashuri abanza ya Kiliziya Gatolika muri RDC, mu gihe cy’igerageza cy’imyaka 10.

Abepiskopi kandi bahawe raporo zituruka mu nzego zitandukanye zirimo Ubunyamabanga Bukuru bwa Sinodi, Ibikorwa bya Misiyoni bya Papa, n’Ikigo cy’Imari gishinzwe Iterambere (IFOD).

Inteko yanakiriye raporo ku Ngoro y’Igihugu yitiriwe Umuhire Marie-Clémentine Anuarite Nengapeta, maze ifata icyemezo cyo gushishikariza buri mwepisikopi gutanga umusanzu ku giti cye mu kubaka iyi Ngoro, nk’ikimenyetso cyo gushyigikira ibikorwa bya Kiliziya.

Ku birebana n’imibereho rusange y’igihugu, Musenyeri Muteba yagaragaje ko Abepiskopi bongeye kwita ku bibazo byugarije RDC, birimo ibya politiki, ubukungu, umutekano, ibibazo by’ubutabazi n’uburenganzira bwa muntu.

Yagize ati “Izi mbogamizi zibangamiye ubumwe bw’igihugu n’ubusugire bwacyo. Turahamagarirwa gukomeza kuba maso no gukora ibishoboka byose, tuyobowe na Roho Mutagatifu, kugira ngo amahoro arambye agerweho mu gihugu cyacu no mu karere k’Ibiyaga Bigari.”

Abepiskopi bagaragaje kandi ko bifatanyije n’abaturage bakomeje guhura n’ingaruka z’intambara n’ibikorwa by’imitwe yitwaje intwaro, yaba iyo mu gihugu imbere cyangwa ituruka hanze.

Mu gusoza, Musenyeri Muteba yasabye Umubyeyi Bikira Mariya gukomeza kurinda igihugu, anasengera umugisha w’Imana ku Banyekongo bose.