Inzitizi zikibangamiye ubumwe n’ubudaheranwa bw’abanyarwanda ziri gushakirwa umuti.

Ni ikiganiro cyateguwe na Komisiyo y’ubutabera n’amahoro ya Diyosezi ya Butare ku bufatanye n’Akarere ka Huye, iki gikorwa cyahuje bamwe mu baturage barimo n’urubyiruko bibumbiye mu matsinda y’Ubumwe n’ubudaheranwa.

Padiri Rutayisire Josbert Umuyobozi wa komisiyo y’ubutabera n’amahoro ya Diyosezi Gatolika ya Butare yavuze ko iki Kiganiro cyateguwe bagamije kureba uburyo bwo gukomeza kurebera hamwe ubufatanye bwabo n’akarere ka Huye bimakaza umuco nyarwanda n’indangagaciro na Kirazira bareba uko byakoreshwa neza ngo bibafashe kwimakaza Ubumwe n’Ubudaheranwa bw’abanyarwanda.

Yakomeje avuga ko Komisiyo y’Ubutabera n’amahoro ifite imfashanyigisho zirimo kwigisha kugaruka ku ndangagaciro, umuco nyarwanda, na Kirazira basakaza amahoro mu bantu no gukora ubuvugizi mu bantu bita mu guhugura inzego zitandukanye zibarizwa muri iyi Komisiyo, bakibanda kandi ku bwiyunge no gufasha abantu gukira ibikomere byatewe na Jenoside yakorewe abatutsi bunga abantu n’Imana. Yagize ati” Tunigisha n’amateka yacu mu Rwanda n’ingaruka za Jenoside, ibikomere abantu bafite, ni gute abantu bakira ari nacyo gituma dufite iyo gahunda y’isanamitima ifata amezi arenga 6 kugira ngo dutegure abo bantu tubakire neza mu muryango nyarwanda tubibutse indangagaciro bataye, umuco nyarwanda na Kirazira kugira ngo bagaruke ku isoko bityo bashobore gusaba imbabazi, abahemukiwe nabo bazitange hanyuma twese nk’abanyarwanda twubake ubwo bumwe n’Ubudaheranwa.’’

Agaruka ku bantu bafungiye icyaha cya Jenocide yakorewe abatutsi yavuze ko urugendo rw’Isanamitima iyo barurangije bashyirwa mu matsinda bagahurira mu bikorwa by’iterambere cyane cyane iby’ubuhinzi n’ubworozi, bagashaka n’abapadiri mu Paruwasi babaherekeza kugira ngo bakomeze icyo gihango.

Umuyobozi w’Akarere ka Huye wungirije ushinzwe iterambere ry’ubukungu Kamana André, yavuze ko bishimira urwego bagezeho muri gahunda y’ubumwe n’Ubudaheranwa bw’abanyarwanda gusa ko hakiri inzitizi nazo ziri gushakirwa umuti.

Yagize ati ‘’Inzitizi ntabwo zavuyeho kuko hasigaye n’inkovu nubwo hari izamaze gusibangana ariko haracyari ibisigisi bishamikiye mu guhungabana kw’abantu, ibisigisigi by’amoko n’ivangura, imvugo zihembera urwango ku mbuga nkoranyambaga, imyemerere idahura n’indangagaciro zacu, abarangiza ibihano bagasanga abandi bateye intambwe ariko bo ugasanga yabaswe n’ingengabitekerezo cyangwa se bikamunanira kubana n’uwo bashakanye n’ibindi.’’

Yakomeje avuga ko kandi bakomeje gushakira hamwe umuti urambye w’inzitizi bagihura nazo mu bumwe n’ubudaheranwa bahereye mu gufasha abafungiye icyaha cya Jenoside bakabaherekeza kugeza barangije ibihano byabo, n’abagifite ibikomere byatewe na Jenoside.

Bamwe mu bagenerwabikorwa bahawe inyigisho z’isanamitima bavuze ko bari mu batangiye barwanya inzira y’ubumwe n’Ubwiyunge kuko bumvaga ababiciye batabaha imbabazi, naho abakoze icyaha cya Jenoside n’abavuka mu miryango y’abakoze Jenoside bakagira ipfunwe no kumva badashaka guhura n’imiryango bahemukiye ariko nyuma yo kwigishwa batangiye no gufasha abandi kurangiza imanza, ndetse ubu basigaye bafatanya no mu bikorwa bibateza imbere.

Burizihiza Rose aganira na Kinyamateka yagize ati “Nakoraga ku buryo abana banjye batazahura n’imiryango yaduhemukiye, aho wasangaga ikibazo nari mfitanye n’abakuru cyarageze no mu bana, bigatuma na babana bato bambona bakampunga bagahunga n’akagari kabo, ibitekerezo byanjye byabaga ari ibyo kumva ko nshaka kubafungisha bose, ubu narakijijwe kandi naranakize, ubu urubyiruko tubanye neza, nkunda abana ntakintu ngendeyeho mu gihe mbere ibyo ntabyumvaga.’’

Masengesho Melikisedeki umwe mu rubyiruko ufite se wakoze icyaha cya Jenoside yavuze ko mbere batarigishwa byari bigoye kuba bahura n’abahemukiwe n’imiryango yabo, ubu bakaba bishimiye ko kuri ubu mu matsinda yabo bafatanya mu bikorwa by’iterambere ndetse bari gukomeza gufatanya guhangana n’abakigaragarwaho n’ingengabitekerezo ya Jenoside.

Bamwe mu batanze ibitekerezo bavuze ko ibikibangamiye iyi gahunda y’Ubumwe n’ubudaheranwa harimo guhabwa amakuru atariyo ku bavutse nyuma ya Jenoside, bavuga ko bifuza ko nabo bajya bahabwa ibi biganiro kugira ngo bafatanye kurwanya abari bo bose bashaka kubayobya n’abagifite ingengabitekerezo ya Jenoside.