Iseminari Nto ya Rwesero yatangiye urugendo rw’imyaka 5 rwo kwizihiza Yubile y’imyaka 75 izizihizwa mu 2031

Uyu muhango wabaye ku wa 07 Werurwe 2026, uhurirana n’umunsi ngarukamwaka wo guhimbaza Mutagatifu Dominico Savio, umutagatifu iri shuri ryisunze, bikaba byanahuriranye n’uko iri shuri ryari rimaze imyaka 70 rishinzwe kuva mu 1956.

Ibirori byabimburiwe n’Igitambo cya Misa cyatuwe na Nyiricyubahiro Myr Papias Musengamana, Umwepisikopi wa Diyosezi ya Byumba, ari kumwe na Myr Servilien Nzakamwita uri mu kiruhuko cy’izabukuru. Uyu muhango witabiriwe n’ababyeyi barerera muri iri shuri, abaryize mu myaka yatambutse, abarezi ndetse n’abashyitsi barimo n’abahagarariye inzego za Leta.

Mu butumwa bwatanzwe muri ibi birori, hibanzwe ku gushimira uruhare iri shuri rimaze kugira mu burezi n’uburere by’abana baryigamo kuva ryashingwa mu mwaka wa 1956. By’umwihariko hagaragajwe ko iri shuri ryagiye ritanga uburere bufasha abanyeshuri kurangwa n’ubumenyi, ubuhanga n’imico myiza.

Padiri Mukurizehe Sébastien, umuyobozi wa Seminari nto ya Rwesero, yashimiye by’umwihariko abanyeshuri bakoze ibizamini bya Leta mu mwaka wa 2025, avuga ko bose batsinze neza kandi bagira amanota ari hejuru. Yashishikarije abanyeshuri bazakora ibizamini bya Leta uyu mwaka gukurikiza urugero rwiza rw’abababanjirije.

Yanagarutse ku kuba hari bamwe mu barangije amashuri yisumbuye basabye gukomeza inzira yo kuba Abasaseridoti. Mu banyeshuri 11 babisabye, umunani bamaze gutangira amasomo yabo mu Iseminari Nkuru ya Rutongo, mu gihe abandi batatu bitegura gukomereza amasomo mu bihugu byo hanze bikoresha ururimi rw’igifaransa, aho bari kubanza kongeramo ubumenyi bw’urwo rurimi.

Uhagarariye abize muri iyi seminari yashimiye iri shuri ku ruhare ryarwo mu kurera abantu benshi bagiriye Kiliziya n’igihugu akamaro. Yagaragaje ko mu myaka 70 ishize, iyi seminari yavuyemo abepisikopi batatu barimo Musenyeri Servilien Nzakamwita wayoboye Diyosezi ya Byumba, Musenyeri Augustin Misago wayoboye Diyosezi ya Gikongoro ndetse na Musenyeri Thaddée wayoboye Diyosezi ya Kabgayi mu myaka yatambutse.

Yavuze kandi ko iyi seminari yavuyemo abapadiri benshi ndetse n’abalayiki bagize uruhare rukomeye mu iterambere ry’igihugu mu nzego zitandukanye.

Ambasaderi Uwihanganye Jean de Dieu, umunyamabanga wa Leta muri Minisiteri y’Ibikorwaremezo, wari uhagarariye inzego za Leta ndetse akaba n’umwe mu bize muri iri shuri, yashimye uruhare Kiliziya igira mu burezi bw’u Rwanda, anizeza ubufatanye bukomeza hagati ya Leta na Kiliziya.

Mu butumwa bwe, Musenyeri Papias Musengamana yasabye abanyeshuri gushaka ubuhanga nyabwo bushingiye ku kumenya Imana, kumenya abantu ndetse no gusobanukirwa isi n’ibiyirimo. Yanashimangiye ko Kiliziya yifuza ko amaseminari akomeza kuba ku ruhembe rw’imbere mu gutanga uburere n’uburezi bufite ireme.

Yasabye kandi abarezi gukomeza kwita ku bana barera no kubakunda, agaragaza ko kumenya neza umwana ari byo bituma umurezi amufasha mu buryo bwuzuye.

Yagize ati “Barezi, mukunde abana murera kandi mubamenye. Iyo wakunze umwana ukamumenya, umenya icyo akeneye yaba yishimye cyangwa ababaye, nk’uko bavuga ko umushumba mwiza amenya intama ze.”

Myr Musengamana yanibukije ko umwe mu mwihariko wa Seminari ya Rwesero ari ukwita ku kwigisha indimi, asaba ko uwo mwihariko wakomeza gusigasirwa no kunozwa kurushaho.

Mu gusoza ubutumwa bwe, yatangije ku mugaragaro urugendo rw’imyaka itanu rwo kwizihiza Yubile y’imyaka 75 Seminari nto ya Rwesero izaba imaze ishinzwe, ruzasozwa ku wa 15 Nzeri 2031. Iyi yubile izahurirana kandi n’iy’imyaka 50 Diyosezi ya Byumba izaba imaze ishinzwe.