Karidinali Kambanda yasabye urubyiruko gufasha bagenzi babo bangirikira ku mbuga nkoranyambaga.

Yagize ati “Mu gitabo cy’iyimukamisiri Musa yagiye guhura n’Imana ku musozi wa Sinayi aratinda, agarutse asanga Abayisiraheri baravuze bati Musa yaragiye ubanza atazanagaruka batangira gukora ibigirwamana no kubiramya, Musa agarutse biramubabaza cyane ararakara. N’urubyiruko rero iyo turutereranye dusanga rwagiye mu byarwo bikatubabaza ababyeyi, abarezi ndetse tukababwira nabi cyangwa tukabahana narwo rukababara nyamara iyo turi kumwe bituma duhora dusabana neza mu byishimo."

Ati: “Mu gitabo cy’iyimukamisiri Musa yagiye guhura n’Imana ku musozi wa Sinayi aratinda, agarutse asanga Abayisiraheri baravuze bati Musa yaragiye ubanza atazanagaruka batangira gukora ibigirwamana no kubiramya, Musa agarutse biramubabaza cyane ararakara. N’urubyiruko rero iyo turutereranye dusanga rwagiye mu byarwo bikatubabaza ababyeyi, abarezi ndetse tukababwira nabi cyangwa tukabahana narwo rukababara nyamara iyo turi kumwe bituma duhora dusabana neza mu byishimo.

Karidinali Kambanda kandi yashimiye Abasaseridoti bitanga kugira ngo babe hafi y’urubyiruko, nk’uko urubyiruko rwagiye rubisaba kenshi kugira ngo Abapadiri babegere bajye bakunda kuba bari kumwe.

Avuga ko n’ubwo biba bitoroshye bitewe n’inshingano nyinshi baba bafite, bitanga bakaba hafi yabo kandi byatangiye gutanga umusaruro, abibutsa ko urubyiruko ari wo mubare mwinshi ugize Abakirisitu babo n’u Rwanda muri rusange bityo kubitaho baba bahisemo neza.

Bamwe mu rubyiruko barimo Joseline Niwomwungeri na Dushimiyimana Jean Baptiste, Baganiriza Kinyamateka bahurije kukuba bamwe muri bo bakoresha imbuga nkoranyambaga bashaka kunguka ubumenyi abandi bakazikoresha bashaka kuyobya abandi.

Joseline Niwomwungeri avuga ko abazikoresha bagamije gusenya urubyiruko muri rusange, kuko mu babibona hari abatwarwa nabyo gusa ngo abenshi babona ko bibaganisha ahantu habi ntibabibonemo inyigisho nziza. Nyuma y’ibyo basabwe Nyiricyubaho Antoni Karidinali Kambanda avuga ko biyemeje gukangurira bagenzi babo bakoresha nabi imbuga nkoranyambaga kugira ngo bagaruke babashe kwigishirizwa hamwe kuzikoresha ibibafitiye inyungu n’igihugu muri rusange.

Dushimiyimana Jean Baptiste yagize ati: ‘’ burya urubyiruko turi mu byiciro bibiri bitandukanye, hari urubyiruko rw’Abakirisitu n’abandi baba bari aho ngaho bataragira aho bafatira, kandi imbuga nkoranyambaga zigira ibyiza n’ibibi, bityo muri ibyo byiciro bibiri bamwe bagahitamo ibyo bakurikira, ugasanga hari abari gushaka ibibateza imbere bashaka akazi, abandi bari kwirebera ibibasubiza inyuma mu buzima bwabo.

Duhereye muri Paruwasi yacu tugiye gushyira imbaraga muri bagenzi bacu tubona batari mu nzira nziza mu gukoresha imbuga nkoranyambaga ariko duhereye mu kubafasha kumenya Imana, tubereke kwa Yezu abe ariho duhera tubahindurira”.

Dushimimana avuga ko bagiye gukora ibikorwa bya gitumwa bifashishije izo mbuga nkoranyambaga nka Tiktok, Youtube, Whatsapp n’izindi bashyiraho isengesho, ijambo ry’Imana rya buri munsi kugira ngo bashobore kubaka Kiliziya bahindura abo bantu.

Karidinali Kambanda asanga kugira ngo ibyo byose bigerweho amaparuwasi no mu turere tw’ikenurabushyo bakwiye gushyira imbaraga mu rubyiruko no guha imbaraga amahuriro yarwo no kubashyira mu miryango ya Agisiyo Gatolika kugira ngo urubyiruko rudafite aho rubarizwa ruhabone.