Kenya: Umwepiskopi wa Diyosezi ya Maralal yahagaritse abapadiri barindwi, ashyiraho amabwiriza mashya arimo kubuza kunywera inzoga mu tubari

Mu ibaruwa ya gishumba yasohoye ku Cyumweru, tariki ya 12 Nyakanga 2026, Myr Joya yavuze ko ibi byemezo byafashwe nyuma yo gusuzuma imikorere ya Diyosezi no kubona amakuru yizewe ku myitwarire ya bamwe mu bapadiri ndetse no ku micungire y'umutungo wa Kiliziya.

Agaruka ku myaka hafi ine amaze ayobora Diyosezi ya Maralal kuva yayishingwa mu Ukwakira 2022, Myr Joya yavuze ko yahasanze ibibazo byinshi by'imiyoborere, iby'ubukungu n'iby'iyogezabutumwa.

Yagize ati "Birambabaza kuvuga ko nasanze Diyosezi ifite ibibazo byinshi, ariko nta n'umwe wari witeguye kumbwira inkomoko yabyo cyangwa uburyo byakemurwa."

Myr Joya yanasubije abamunengaga bavuga ko yakunze gusaba inkunga y'amafaranga ariko ntafate ingamba ku bapadiri bakekwagaho kubaho mu buryo bunyuranyije n'indahiro za gisaserdoti cyangwa gutunga imitungo idafite inkomoko igaragara.

Yasobanuye ko, uretse gushaka inkunga n'impano zo gufasha Diyosezi yo mu majyaruguru ya Kenya, yanakoze igenzura ry'imikorere ya Diyosezi, igenzuramari muri paruwasi zose n'ibigo biyishamikiyeho, ashyiraho uburyo bushya bw'imiyoborere, avugurura imikorere ndetse anatangira kwishyura imyenda yari ifite.

Ku bijyanye n'ibihano yafatiye abapadiri, Myr Joya yavuze ko nta mupadiri afataho icyemezo adafite amakuru yizewe.

Yagize ati"Sinigeze nshinja cyangwa ngo mfatire umupadiri icyemezo nta makuru yizewe mfite. Ubu ayo makuru narayabonye kandi namenye abo bireba."

Yavuze ko mu gihe amaze ayobora Diyosezi yashoboye gushaka inkunga y'amafaranga menshi kurusha ayakusanyijwe n'abakristu b'iyo Diyosezi mu bihe byashize, atabariyemo n'indi mishinga yatewe inkunga ku buryo butaziguye muri paruwasi n'ibigo bitandukanye.

Myr Joya yanatangaje amabwiriza mashya agomba kubahirizwa n'abapadiri bose ba Diyosezi ya Maralal, hashingiwe ku ngingo ya 277 §3 y'Amategeko ya Kiliziya Gatolika (Code of Canon Law).

Mu mabwiriza mashya yashyizweho, Musenyeri Joya yategetse ko abapadiri bose bagomba kuba bageze mu ngo zabo mbere ya saa moya z'umugoroba kugira ngo bifatanye mu isengesho rya nimugoroba. Yanategetse ko nta mupadiri wemerewe kurara ahandi hatari iwe atabiherewe uburenganzira n'Umwepiskopi, ndetse ko nta muntu usanzwe (utari umupadiri cyangwa umubikira) ugomba kurara mu rugo rw'umupadiri cyangwa mu nzu y'ababikira atabifitiye uburenganzira

Aya mabwiriza anabuza abapadiri kunywera inzoga mu tubari cyangwa kuyobora imihango ya liturujiya basinze cyangwa bagifite ingaruka z'inzoga. Ikindi, abapadiri babujijwe gukora ubucuruzi bwigenga butajyanye n'inshingano za Kiliziya, gutunga umutungo badashobora gusobanura inkomoko yawo, ndetse no kugirana umubano unyuranyije n'indahiro za gisaserdoti, yaba n'uwo badahuje igitsina cyangwa uwo bahuje igitsina.

Aya mabwiriza anagena uburyo bushya bwo gucunga umutungo wa paruwasi n'ibindi bigo bya Diyosezi, imikorere y'inama z'ubukungu n'inama za paruwasi, itegurwa ry'ingengo y'imari, igenzuramari, ikoreshwa ry'imodoka za Diyosezi ndetse no kubahiriza amategeko ya Kiliziya n'ay'igihugu.

Myr Joya yahagaritse by'agateganyo abapadiri barindwi, ari bo Padiri Paul Maina, Padiri Peter Musau, Padiri Stephen Lekasuyan, Padiri Peter Nderitu, Padiri Christopher Letikirich, Padiri John Dida na Padiri Jonathan Namoni, wari waramaze guhagarikwa kuva ku wa 10 Nyakanga.

Yavuze ko ihagarikwa ryabo rizakomeza kugeza igihe hazakemurirwa ibibazo bifitanye isano no gukoresha nabi ububasha bwa Kiliziya, uburangare mu buyobozi no gucunga nabi umutungo wa Kiliziya.

Icyakora, ibaruwa ya Myr ntiyasobanuye ibyaha cyangwa ibirego byihariye biregwa buri mupadiri ku giti cye, ndetse ntiyanagaragaje niba bose bahagaritswe kubera impamvu imwe. Ntiyanasobanuye niba buri wese yarashyikirijwe icyemezo cya Kiliziya gisobanura impamvu z'ihagarikwa rye, ibihano bimureba n'ibyo asabwa kuzuza kugira ngo yongere gukora umurimo wa gisaserdoti.

Myr Joya yasabye abakristu gusabira abo bapadiri, avuga ko iki ari igihe cyo kwisuzuma no kuzirikana agaciro k'umuhamagaro wabo ndetse n'akamaro ko gukorera inyungu rusange za Kiliziya.

Asoza ibaruwa ye, Myr Joya yasabye abakristu gukomeza kumusabira kugira ngo ashobore gukomeza guhangana n'ibibazo Diyosezi ya Maralal ikomeje guhura na byo.

Uretse ibi bihano, yanatangaje inshingano nshya z'abapadiri batanu muri Diyosezi ya Maralal, harimo abazayobora paruwasi, ibigo by'iyogezabutumwa n'urwego rw'itangazamakuru rwa Diyosezi.