Kibungo : Mgr Twagirayezu asaba abihayimana kubaho mu bumwe na Kristu binyuze mu kumvira ababakuriye

Uyu muhango wabereye mu Gitambo cy'Ukaristiya Nyiricyubahiro Mgr Jean Marie Vianney TWAGIRAYEZU, Umwepiskopi wa Diyosezi Gatolika ya Kibungo yaturiye muri Paruwasi Katedrali ya Kibungo.

Ababikira bakoze amasezerano ya mbere barimo: Mama Bonifride ABAGIRAYERA, Mama Demetrie IRADUKUNDA, Mama Marie Grace UWAMAHIRWE na Mama Ange Marie NUMUKOBWA. Abo bashya binjiye mu rugendo rw’ubuzima bwo kwiha Imana binyuze mu isezerano ribasaba kubaho mu bwiyoroshye, mu bumwe n’abandi, no mu bumvira uko bikwiye umugambi w’Imana binyuze mu muryango wabo n’abayobozi bawuyobora.

Mu gihe kimwe, abahimbaje yubile y’imyaka 25 bamaze biyeguriye Imana ni: Mama Leonie KANTENGWA, Mama Elisabeth NYIRAJYAMBERE na Mama Illuminee MUKAKAYONGA.

Mu butumwa yanyujije mu nyigisho ye, Nyiricyubahiro Mgr Jean Marie Vianney TWAGIRAYEZU yahaye impanuro zihamye ababikira bose, baba abashya n’abizihije yubile kimwe n’abandi bihayimana bose bari bateraniye muri uwo muhango.

Yibukije ko isezerano ryo kwiha Imana ritagomba gufatwa nk’ikimenyetso gusa cy’imihango, ahubwo ari ugusubira mu nshingano z’uwabatijwe wese, bityo bikaba isoko yo gusukura roho n’iyubahirizwa ry’ubutumwa bwa Gikristu.

Yagize ati “Aya masezerano yanyu yibutsa inshingano z’uwihayimana, ariko natwe ababatijwe aratwibutsa gusubira mu masezerano yacu. Muri mwe, mugaragaze uyu muryango w’abavisitasiyo mwinjiyemo nk’ishuri ritwibutsa uburyo dukwiye kubaho twiyeguriye Imana, binyuze mu kumvira, kubana neza, no gukomeza ubutumwa Kiliziya iduha.”

Yagize ati “Uwumvira umukuru w’umuryango aba yumvira Kiliziya, kuko ari Kiliziya imutuma. Kubaho wumvira, uba uri mu bumwe na Kristu. Ntibikwiye ko umukuru w’umuryango akubwira ati kora iki, ukamubaza uti kuki? Nta mpamvu yo kubaza 'kuki?' ku mugambi w’Imana utugeraho binyuze mu bayobozi bacu.”

Umwepiskopi wa Kibungo yakomeje ahamagarira abiyeguriye Imana kwihangana, kuko inzira yo kwiha Imana irimo ibigeragezo. Icyakora yatanze igisubizo kidasanzwe ku byo guhangana n’ibyo bikomeye:

Yakomeje ashimangira akamaro ko kurangwa n’ukuri, kwiyoroshya, no kutiharira ijambo nk’uwihayimana.

Yagize ati “Ntugire imitima ibiri. Yego yawe ibe yego, oya ibe oya. Wikiharira ijambo , uvuge igihe bibaye ngombwa, kandi uvuge ibiri ngombwa. Guca bugufi si intege nke, ahubwo ni umurage w’ukuri n’urukundo.”

Mgr Twagirayezu yanagarutse ku kamaro k’amategeko agenga umuryango w’abiyeguriye Imana. Yavuze ko amategeko atakagombye kuba umutwaro, ahubwo akwiye kuba imfashanyigisho ibafasha kumenya inzira nyayo yo kubana, gukora no gutanga umusaruro mu bumwe.

Yagize ati “Umuryango wose ugira amategeko ugenderaho. Muri kominote, mugomba kubahiriza gahunda kugira ngo mutanyuranya n’abandi. Itegeko ntiryakagombye kubaremerera, ahubwo rikabafasha kumva aho mugana n’icyo mugomba gukora.”

Umwepiskopi yasabye ababikira kutagaragaza ibikorwa byabo nk’abashaka kwamamara, ahubwo bakabikora bucece, bubaka abandi mu bwiyoroshye no mu kwicisha bugufi. Yatanze urugero rw’amagambo ya Yezu ati:

Yatanze urugero rw’amagambo ya Yezu ati“Nusenga, jya ahiherereye. Umutima wawe uwerekeze ku Mana. Ntukore ushaka kugaragara, ahubwo ubeho ku buryo abandi bakureberaho batagushinja kwiyemera. Ibyo ukora bijye bivuga, si amagambo.”

Mu gusoza inyigisho ye, Mgr Twagirayezu yibukije ko impanuro atari iz'ababikira bashya cyangwa abizihije yubile gusa.

Yagize ati “Simwe gusa musezeranye bwa mbere, cyangwa mwizihije yubile. Ni abihayimana bose, natwe ababatijwe, biratureba. Turebwa n’aya masezerano kuko tugomba kubaho mu kuri, mu rukundo no mu kwitanga. Abadukikije bajye babona ibyiza dukora, babone impamvu yo gusingiza Imana.”