Kiliziya Gatolika mu Rwanda yatangije ku mugaragaro umwaka w’ubucamanza wa 2025–2026

Uyu muhango wari witabiriwe n’Abepiskopi Gatolika bose bo mu Rwanda, abapadiri n’abalayiki bakora ubutumwa mu nzego zitandukanye z’ubucamanza bwa Kiliziya, ndetse n’abandi batumirwa b’ingeri zitandukanye, bagarutse ku ruhare rw’ubutabera bwa Kiliziya mu kubungabunga umuryango no gufasha abakristu.

Mu butumwa bwo gutangiza ku mugaragaro uyu mwaka w’ubucamanza, Mgr Jean Bosco Ntagungira, Umwepiskopi wa Diyosezi ya Butare akaba na moderateri w’Urukiko rwa Kiliziya Gatolika mu Rwanda (TECIR), yasobanuye ko uyu muhango ari ngarukamwaka kandi ugamije gusuzuma uko umwaka ushize wagenze no gufata ingamba zo kunoza imikorere y’ubutabera bwa Kiliziya.

Yagize ati “Si ubwa mbere habayeho umuhango nk’uyu, kuko buri mwaka dufata umwanya wo gusubiza amaso inyuma tukareba uko umwaka ushize wagenze, tukishimira ibyiza byakozwe, tugasuzuma ingorane twahuye na zo, maze tugafatanya ingamba zo kurushaho kunoza imikorere n’imikoranire y’inzego zose zirebwa n’ubutabera bwa Kiliziya.”

Mgr Ntagungira yashimangiye ko abakorera mu rukiko rwa Kiliziya Gatolika mu Rwanda ari abantu babifitiye ubumenyi n’ubushobozi buhagije.

Agaruka ku bikorwa by’ingenzi byaranzwe umwaka ushize, Mgr Ntagungira yasobanuye ko urukiko rwa Kiliziya rwibanze cyane ku gukemura ibibazo birebana n’izerano ryo gushyingirwa gikristu.

Yagize ati “Muri iki gihe, abakora ubutumwa mu rukiko rwa Kiliziya Gatolika mu Rwanda (TECIR) ni abantu bize neza amategeko ya Kiliziya, kandi bazwiho ubushishozi n’ubushobozi bwo gusesengura neza ibibazo by’abakristu.”

Yagize ati “Urukiko rwacu rwakira cyane cyane ibibazo birebana n’izerano ryo gushyingirwa gikristu. Iyo umwe mu bashakanye akeka ko ugushyingirwa kwe kutari gushyitse, atanga ikirego mu rukiko rwa Kiliziya, hagasuzumwa ingingo ashingiraho, maze agahabwa umwanzuro w’urubanza.”

Yakomeje asobanura uko urubanza ruburanishwa agira ati “Umucamanza atega amatwi abashakanye bombi atabahungabanya, kuko aba azi neza ibyabaye mbere yo gushyingirwa kw’abarebwa n’ikirego. Asuzuma inyandiko n’ibimenyetso byatanzwe, kandi byaba ngombwa akiyambaza ibimenyetso bya gihanga (AND) cyangwa abandi banyamwuga nk’abaganga.”

Mgr Ntagungira yagaragaje ko uyu murimo usaba ubunyamwuga buhambaye, agira ati“Ni umurimo usaba kumenya neza amategeko, kugira ubushishozi ku mibereho y’Abanyarwanda, no kugira ubushobozi bwo gufata umwanzuro w’ukuri uvuye mu gusesengura ibimenyetso binyuranye.”

Yanagarutse ku mbogamizi nyinshi zigaragara mu gutegura abageni, avuga ko ari imwe mu mpamvu z’ugushyingirwa kudashyitse.

Yagize ati “Uko bigaragara hari ikibazo gikomeye mu gutegura abageni. Hari abasezerana batizeranye neza, hari ababeshyana ku bushake, hari abagamije inyungu z’imitungo, abandi bakasezerana bagamije gukemura ibibazo nk’inda zitunguranye. Hari n’abahisha ingeso mbi nk’ubuharike, ibiyobyabwenge, uburaya, ndetse n’ingeso z’ubutinganyi zitangiye kugaragara muri iyi minsi.”

Yashimangiye ko ibi bibazo bikwiye kubera abandi isomo agira ati“Mu rwego rwo kubungabunga umuryango, ni byiza ko ibibazo bigaragara mu rukiko bibera abandi isomo kugira ngo abakristu birinde ugushyingirwa kudashyitse.”

Ku ruhande rwe, Padiri Sylvère Komezusenge, ofisiyeri w’Urukiko rwa Kiliziya Gatolika mu Rwanda, yasobanuye impamvu hashyizweho inzego zo kwakira ibibazo mu madiyosezi.

Yagize ati“Muri Kiliziya Gatolika mu Rwanda, hari urukiko rumwe rukorera ku rwego rw’igihugu rwitwa TECIR. Kugira ngo rubashe kwakira ibirego byateguwe neza, byabaye ngombwa ko muri buri diyosezi hashyirwaho ikipe y’abantu batatu cyangwa bane barimo n’umunyamabanga wa diyosezi, bakitwa ‘section locale’.”

Yakomeje agira ati “Abo bashinzwe kwakira ibibazo by’abantu bo muri diyosezi bashaka ubutabera, bakabatega amatwi, bakareba niba bifite ishingiro, bakabashakira ingingo z’itegeko zibemerera gukomeza, bakabafasha no kwandika ibaruwa itanga ikirego mbere y’uko kigezwa mu rukiko.”

Padiri Sylvère Komezusenge yongeyeho ko izi nzego zifite n’inshingano yo kuyungurura ibibazo. Yagize ati “Section locale iyungurura ibibazo kuko hari n’abagera aho bagasanga bakeneye kugirwa inama isanzwe, bitari ngombwa ko ikibazo kijya mu rukiko.”

Mu butumwa bwe, Nyiricyubahiro Antoine Karidinali Kambanda ,yasabye ko izi nzego zo mu madiyosezi zishyirwamo imbaraga nyinshi, anibutsa ko intego nyamukuru ari ukubungabunga umuryango.

Yagize ati “Si ngombwa ko ibibazo byose bijya mu rukiko. Hari abashoboraga kwiyunga cyangwa se gukoresha ubundi buryo bubafasha kubana batagombye gutandukana. Gutandukana si cyo gisubizo.”

Yakomeje agira ati “Ku bashakanye bafite ibibazo bikomeye, ntibivuze ko ugushyingirwa kwabo kudashyitse, kandi ntibikuraho inshingano zo kubana iteka. Ni yo mpamvu mbere yo kwiyambaza inkiko bagomba kubanza kwiyunga, gusabana imbabazi, kubabarirana, kwihangana no gushakisha izindi nzira zo gukemura ibibazo bafitanye.”

Karidinali Kambanda yasabye abihayimana n’abakorera ubutumwa mu miryango kugira uruhare rufatika muri uru rugendo.Ati “Abasaseridoti n’abandi bakora muri uru rwego rw’ubutumwa bagomba gufasha abashakanye kuko gutandukana ari igihombo gikomeye ku muryango no kuri Kiliziya.”

Kiliziya Gatolika mu Rwanda, ifite urukiko rumwe rukorera ku rwego rw’igihugu rwitwa TECIR, rugizwe n’abacamanza 12, umurengezi w’Isakaramentu umwe, umwanditsi mukuru w’urukiko umwe, umwanditsi w’ibivugwa umwe n’umurengezi w’ubutabera. Aba bose bashimiwe ku bwitange n’umurava bakorana ubutumwa bwabo, bakorera Imana n’abantu.”