Kiliziya Gatolika muri RDC iri gutegura gutangaza aho ihagaze ku ivugururwa ry’Itegeko Nshinga

Iyi nama yitabiriwe n’Abepisikopi Gatolika bo mu madiyosezi atandukanye yo muri RDC hamwe n’impuguke zituruka mu nzego zitandukanye za politiki n’amategeko. Yari igamije gufasha Kiliziya Gatolika muri icyo gihugu kugera ku mwanzuro usobanutse ku kibazo gikomeje guteza impaka zikomeye mu banyapolitiki no mu baturage.

Umunyamabanga Mukuru wa CENCO, Musenyeri Donatien Nshole, yavuze ko iyi nama yateguwe hagamijwe ibiganiro ku hazaza h’Itegeko Nshinga bikomeje gukaza umwuka wa politiki mu gihugu.

Muri iyo nama hatumiwemo impuguke ku itegeko nshinga, abarimu ba za kaminuza n’abasesenguzi ba politiki, barimo abafatwa nk’abegereye ubutegetsi buriho ndetse n’abegereye abatavuga rumwe na bwo. Ibyo byakozwe mu rwego rwo guha abepiskopi amakuru n’isesengura bishingiye ku bitekerezo bitandukanye ku ngaruka zishobora guterwa no guhindura cyangwa kuvugurura Itegeko Nshinga.

CENCO yatangaje ko intego nyamukuru y’iyi nama ari ukumva no kugereranya ibitekerezo binyuranye kugira ngo hirindwe gufata umwanzuro ushingiye ku ruhande rumwe gusa. Abateguye iyi nama bavuga ko kumva impande zose bizafasha abepisikopi gusobanukirwa neza amahirwe n’imbogamizi bishobora guterwa n’ivugururwa ry’Itegeko Nshinga, ndetse n’ingaruka byagira ku miyoborere n’iterambere rya RDC.

Uretse ibiganiro n’inyigisho zatanzwe n’impuguke, abepisikopi banasuzumye uko igihugu gihagaze muri iki gihe mu rwego rwa politiki, umutekano n’imibereho y’abaturage, ndetse n’amasomo bakuye mu bitekerezo bitandukanye byatanzwe muri iyo nama.

Muri urwo rwego, CENCO ivuga ko ibyavuye muri iri sesengura bishobora kuvamo itangazo cyangwa umwanzuro wa Kiliziya Gatolika muri RDC ku kibazo cy’ivugururwa ry’Itegeko Nshinga. Uwo mwanzuro utegerejwe na benshi, mu gihe iki kibazo gikomeje kuba kimwe mu bikomeye kandi bikurikiranwe cyane mu buzima bwa politiki bw’icyo gihugu.