Kiliziya yatangiye imyiteguro y’Inama Mpuzamahanga ya SIGNIS izabera i Kigali muri 2026

Inama yayobowe na Mgr Baltazar Ntivuguruzwa, Umwepiskopi wa Diyosezi ya Kabgayi akaba n’Umuyobozi wa Komisiyo y’Itangazamakuru mu Nama y’Abepiskopi Gatolika mu Rwanda. Yagarutse ku ngingo z’ibanze ziganisha ku gutegura neza iyi kongere ikomeye, harimo: Imyiteguro y’ahazakira inama n’ibikorwaremezo bizakenerwa, ndetse na gahunda yo kwakira abazasaga 500 baturutse mu bihugu bitandukanye byo ku isi,

Mu kiganiro kirambuye yahaye Kinyamateka, Mgr Baltazar yavuze ko iyi nama yari intangiriro y’urugendo rwo kwinjira mu myiteguro y’iyi kongere iri ku rwego mpuzamahanga.

Yagize ati“Ni inama ya mbere ya komite ku rwego rw’igihugu ishinzwe gutegura iri huriro mpuzamahanga ry’abakora mu itangazamakuru Gatolika rizabera mu Rwanda muri Kanama 2026. Twahuye kugira ngo dutangire urugendo rushya rwo gutegura iri huriro rikomeye, ridusize ishema ariko rikadushyiraho n’inshingano zikomeye.”

Yongeyeho ati“Twibukiranyije intumbero y’iri huriro, tureba uburyo rifite uburemere mu rwego mpuzamahanga, cyane ko ari ubwa mbere rigiye kubera muri Afurika. Ibyo bituma natwe mu Rwanda twumva ko ari icyubahiro gikomeye twahawe, ariko nanone tukumva neza ubushobozi n’uburemere bw’inshingano Kiliziya yacu ishyiriweho.”

Mgr Baltazar yagaragaje kandi ko u Rwanda rudateganya kwakira iyi kongere gusa, ahubwo ko runaheraho rwiyubaka mu bijyanye n’itangazamakuru Gatolika.

Ati“Twaje nk’itsinda rishinzwe gushyiraho amakomisiyo azakurikirana ibyiciro byose by’imyiteguro—iby’ubutumwa, n'iby’abashyitsi,n' iby’imikorere rusange. Intego ni ugutegura kongere itekerejweho neza, izagira uruhare mu guteza imbere itangazamakuru rifite indangagaciro za gikristu, ryujuje ireme kandi ryitezweho gutanga icyerekezo ku bakora itangazamakuru muri Kiliziya ku isi yose.”

Ku bijyanye n’ubufatanye n’imiryango mpuzamahanga, Mgr Baltazar yasobanuye ko kwitegura iyi kongere ari igikorwa gifite urwego mpuzamahanga, rugizwe n’ubuyobozi bukuru bwa SIGNIS n’itsinda ry’Afurika ritegura iyi nama.

Yagize ati“Turi mu rugendo rwo gukorana bya hafi n’urwego rwa SIGNIS Africa rwashinzwe na SIGNIS ku rwego rw’isi kugira ngo rufashe gukurikirana imyiteguro yose yo ku mugabane wa Afurika. Ni ubufatanye bw’ingenzi, kuko n’ubuyobozi mpuzamahanga bwa SIGNIS bwifuza ko Afurika ibigiramo uruhare rufatika. Twebwe nk’ikipe izakira inama hano mu Rwanda, turimo gutangira gutegura iby’ibanze byose kugira ngo ibikorwa bizagende neza.”

Mgr Baltazar yanavuze ko kuba iyi kongere ari iya mbere ibereye muri Afurika, ari umwanya w’iterambere ry’itangazamakuru Gatolika ku mugabane.

Ati“Ni ubwa mbere iri huriro rigamije kwimakaza amahoro, ukuri, ubutabera n’ubusabane rigiye kubera muri Afurika. Ni ubutumwa bwiza ku mugabane wacu kandi ni umwanya wo kwereka amahanga uruhare rw’umugabane mu itumanaho rifite indangagaciro nzima. Ni amahirwe akomeye yo kumurika iterambere ry’itangazamakuru Gatolika mu Rwanda no muri Afurika, n’uburyo dukomeje gutera intambwe mu guhuza ikoranabuhanga n’ubutumwa bwa Kiliziya.”

Inama yo kuri uyu wa Gatanu yari igamije gutangira kurebera hamwe aho ibikorwa bigeze, gutanga umurongo ngenderwaho w’imyiteguro, no gushyiraho ingamba zizayobora iminsi yose y’inama. CEPR n’abagize Komite batangaje ko u Rwanda rwiteguye mu buryo bwose kwakira iki gikorwa mpuzamahanga gitegerejwe kwitabirwa n’abarenga 500 baturutse ku isi yose.

Iyi kongere izaba n’umwanya wo kumurika ibikorwa n’intambwe imaze guterwa n’itangazamakuru Gatolika mu Rwanda no muri Afrika , no kongera umubano n’ubufatanye mpuzamahanga mu itangazamakuru rifite indangagaciro za gikristu.

SIGNIS World Congress iheruka yabereye muri Aziya (Seoul, Koreya y’Epfo, 2022), mbere yahoo yari yabereye muri Amerika (Quebec, Kanada, 2017), no mu Burayi (Roma, Ubutaliyani, 2014). Icyemezo cyo kuyimurira muri Afurika, by’umwihariko mu Rwanda, cyafatiwe mu nama y’Inama Nyobozi ya SIGNIS yabereye i Bangkok, muri Tayilandi.

U Rwanda rwiyongereye ku rutonde rw’ibihugu bikomeje kwerekana ubushobozi mu kwakira inama mpuzamahanga,binyuze mu mutekano, imikorere y’igihugu n’ubukerarugendo bushingiye ku muco n’urusobe rw’ibidukikije.