Kinshasa: Karidinali Fridolin Ambongo arahamagarira urubyiruko rwa Congo kubiba imbuto z’amahoro n’ikizere mu gihugu kiremerewe n’ibibazo

Ibi yabigarutseho mu nyigisho ye ku munsi mpuzamahanga w’urubyruko wahuriraranye n’Umunsi Mukuru wa Kristu Umwami , wizihirijwe mu Gitambo cya Misa, cyabereye i Kinshasa ku Cyumweru, tariki ya 23 Ugushyingo. Karidinali Ambongo yagaragaje ko kwemera ubwami bwa Kristu ari ukwemera inzira z’ubwiyunge, ubutabera n’amahoro.

Ati “Bana dukunda, uyu munsi, kwemera ubwami bwa Kristu ni ukwiyemeza kuba abashyira hamwe, abubaka icyizere ku baturage ba Kongo. Kristu Umwami ntiyigeze ategekesha igitugu cyangwa ngo anene umuntu,”

Karidinali Ambongo yibukije ko ubutegetsi bwa Kristu bushingiye ku mahoro, ubutabera n’ubwiyunge nyakuri. Yabwiye urubyiruko ko ubutumwa Kristu yahawe na Se ubu buri mu maboko yabo, abasaba kuba “ibikoresho by’amahoro”, haba mu mvugo, mu mibanire n’abandi, ndetse no mu buhamya bwabo bwa buri munsi.

Ati “Mu gihe isi irangwamo impagarara, no mu gihugu cyacitsemo ibice, ukwemera kwanyu n’ubuhamya bwanyu birakenewe ngo bibe ibimenyetso bigaragara by’ubwiyunge Kristu aha abantu,”.

Uyu Arkiyepiskopi wa Kinshasa, unayoboye Inama z’Abepiskopi muri Afurika na Madagasikari (SECAM), yagarutse ku bihe igihugu kirimo, by’umwihariko amakimbirane yo mu burasirazuba bw'iki gihugu cya Kongo, guhunga kw’abaturage basenyewe n’intambara ndetse n’umutekano muke urushaho kwiyongera mu murwa mukuru Kinshasa.

Yasabye urubyiruko kumvira ijwi ry’ukuri ribahamagarira kugira uruhare mu kubaka igihugu, binyuze mu bikorwa birwanya ruswa, amacakubiri, akarengane n’urugomo, ahubwo bagashyira imbere ubudahemuka, ubwitange n’ubutabera.

Ati" muri iki gihe k’ibibazo aho Kristu Umwami atugaragariza inzira y’icyizere, ubumwe n’ubwiyunge. Ni yo mpamvu mbasaba, rubyiruko, kuba abahamya b’icyo cyizere. Muhamagariwe kugira uruhare rugaragara mu buzima bwa Kiliziya no mu muryango mugize,”

Yibukije kandi akamaro k’umushinga “Amasezerano y’Umuryango ku Mahoro n’Imibanire Myiza”, ugamije gushakira umuti impamvu zifatika z’amakimbirane mu karere k’Ibiyaga Bigari. Ni umushinga uhuje Inama y’Abepiskopi Gatolika ya Congo (CENCO) n’Itorero ry’Abaporotesitanti (ECC).

Karidinali Ambongo yavuze ko imishinga ya politiki idafatira ku mpamvu z’ubukene, akarengane n’ubusumbane bwugarije abaturage izahora itsindwa.

Ati “Iyi gahunda yacu ishingiye ku ihame ry’ uko umuntu aba umuntu abikesha abandi. Ikindi gikorwa cyaba icyo ari cyo cyose gikozwe hatitawe ku mpamvu z’akababaro k’abaturage ntaho cyatugeza, ahubwo cyateza izindi ngaruka n’ibindi bibazo,”

Karidinali Ambongo yasabye urubyiruko kudaheranwa n’ibyago igihugu kirimo, ahubwo bagahinduka abaremyi b’amahoro, ubwiyunge n’ikizere, bakabitoza abandi banyagihugu babana na bo.

Mu ijambo rye risoza, yagize ati “Rubyiruko rwacu, muhamagariwe gutwara ubutumwa bwa Kristu Umwami aho muri hose: mu muryango, mu mashuri, mu kazi no mu nzira munyuramo. Mubibe imbuto z’amahoro n’icyizere, mutange icyerekezo gishya ku hazaza ha Repubulika Iharanira Demokarasi ya Kongo.”