Komisiyo y’Ubutabera n’Amahoro mu Rwanda CEJP yatangaje ko hari intambwe imaze guterwa mu myaka isaga 30 isubukuye ibikorwa.

Padiri Valens NIRAGIRE, Umunyamabanga mukuru wa Komisiyo y'Abepiskopi y'Ubutabera n'Amahoro mu Rwanda no muri Afurika yo hagati yatangarije Kinyamateka ko hari intambwe nziza imaze guterwa muri iyi myaka isaga 30. Yagize ati’’ Muri uru rugendo rw’imyaka isaga 30 Komisiyo y’Ubutabera n’Amahoro yagiye yiyubaka mu buryo butandukanye yubaka inzego zayo kuva ku rwego rwo hasi rw’umuryangoremezo kugera ku rw’Igihugu, turishimira ko mu bijyanye no gufasha umuryango nyarwanda kwiyubaka, gukira ibikomere muri gahunda y’Ubumwe, Ubwiyunge n’Ubudaheranwa Komisiyo y’Ubutabera n’Amahoro ifitemo umwanya ukomeye.’’

Padiri Valens yakomeje avuga ko ibi bigaragarira mu bikorwa bakora bitandukanye muri za Paruwasi na Diyosezi bagamije gufasha abantu kwiyunga, kwegerana no gukira ibikomere.

Agaruka ku bikorwa bishimira bijyanye no kurwanya ihohoterwa rikorerwa abari n’abategarugori mu miryango no kugira uruhare mu kubaka umuryango utekanye, yagize ati ‘’ Kuri ubu iyo tubonye ubuhamya batanga biduha kumva ko nta terambere rishoboka igihe abantu badatekanye mu mutima.’’

Padiri Valens NIRAGIRE yanakomoje ku ruhare rwa CEJP mu karere k’ibiyaga bigari avuga ko bakunze guhura kenshi kugira ngo baganire ku bibazo by’amakimbirane n’umwuka mubi no gufasha abaturage uburyo bw’imigenderanire.

Ati ‘’Ubu turishimira ko ari natwe turi guhuza ibikorwa bya Komisiyo y’Ubutabera n’Amahoro ku rwego rwa Afurika yo hagati, n’ubwo urujya n’uruza rwahuye n’ibibazo by’intambara ariko turacyafite ubushake bwo gufasha abantu.’’

Myr Anaclet Mwumvaneza, Umwepiskopi wa Diyosezi ya Nyundo akaba n’Umuyobozi wa Komisiyo y’Ubutabera n’Amahoro mu nama y’Abepiskopi Gatolika mu Rwanda agaruka ku bikorwa bya Komisiyo y’Ubutabera n’Amahoro muri Kiliziya y’u Rwanda yavuze ko komisiyo y’ubutabera n’amahoro ifatanyije n’izindi nzego za leta yagize uruhare rukomeye mu gufasha abantu kongera kwiyunga. Yagize ati ’’Mpereye kuri Jenoside yakorewe Abatutsi mu 1994, CEJP yagize uruhare rukomeye ifatanyije n’izindi nzego za Leta kugira ngo abantu bongere biyunge, basabane imbabazi kandi banazitange. Kuri ubu no mu karere k’ibiyaga bigari iyi Komisiyo ikomeje gufashanya n’iyo mu Gihugu cy’u Burundi ndetse n’ iyo muri RDC turahura kugira ngo turebe uko twafatanya kubaka no kugarura amahoro.’’

Myr Anaclet akomeza avuga ko hari byinshi bamaze kugeraho nk’imishinga ya Mupaka Shamba Letu ihuza abagore n’abakobwa baturiye imipaka nka Bukavu na Cyangugu barahura bagakorana, Bujumbura na Uvira nabo bagakorana, Gisenyi na Goma nabo bagakorana mu bucuruzi hagamijwe kubaka amahoro.

Padiri Hyacinth Irakoze uyobora Komisiyo y’Ubutabera n’Amahoro muri Diyosezi ya Cyangugu yabwiye Kinyamateka ko umushinga Mupaka Shamba Letu ukorera ku mipaka yo mu karere k’ibiyaga bigari ukomeje gutanga umusaruro mwiza mu iterambere ry’abagore n’abakobwa baturiye imipaka. Yagize ati ‘’Muri Diyosezi ya Cyangugu uyu mushinga ufasha abagore n’urubyiruko bakorera ubucuruzi ku mupaka wa Bugarama na Rusizi ya Mbere n’iya Kabiri.

K’umupaka wa Bugarama hari amatsinda 26 ari mu nzira yo kuba Koperative ndetse na Koperative 13 zamaze kuvuka. Naho k’umupaka wa Rusizi ya mbere n’iya kabiri hari amatsinda 21 na Koperative 17zikora neza, aha hose hakorerwamo ibikorwa byo kubahugura uburyo bwo gucyemura amakimbirane ku ruhande rw’abanyarwanda na Congo, ndetse no kubigisha imibanire myiza, kandi tubona byaratanze umusaruro mwinshi ugaragara.”

Padiri Hyacinth akomeza avuga ko hagaragaye ubunyakuri hagati yabo no kwizerana mu bucuruzi bakorana. Ikindi kiza twabonye mu gihe i Bukavu hari ibibazo by’umutekano mucye hari bamwe mu bagore bajyaga gucumbika kuri bagenzi babo kandi bakabafasha.’’

Komisiyo y’Ubutabera n’Amahoro CEJP itangaza ko ibikorwa byayo ikora bishingiye ku nkingi 5 ari zo imibanire myiza, Ubumwe n’Ubwiyunge, kwimakaza no kurengera uburenganzira bwa muntu, kwimakaza imibanire nyambukiranyamipaka y'abatuye akarere k'ibiyaga bigari, kubaka urwego rwa Komisiyo y'Ubutabera n'amahoro, no kwimakaza imibanire ya muntu n'ibimukikije.

Iyi Komisiyo ivuga ko mu mwaka wa 2024 yahuguye abapadiri bagera ku 120 ku bijyanye no gutega amatwi, gufasha mu guherekeza abantu gukira ibikomere muri gahunda y’Ubumwe n’Ubwiyunge, abagore basaga 500 bafashijwe guherekejwe mu bijyanye no gukira ibikomere bahuye nabyo, naho abagera kuri 400 muri bo bongererwa ubushobozi mu bijyanye no gutegura imishinga iciriritse yabafashije kwiteza imbere.

Naho mu mushinga Mupaka Shamba Letu bafasha abagore basaga 600 n’abakobwa 400 bose babashije kwiteza imbere. Ibi bikorwa byose bikaba byaratwaye amafaranga arenga Miliyari imwe y’amafranga y’U Rwanda.