Komisiyo y’Ubutabera n’Amahoro yatangije umushinga “Amani Kwetu” ugamije kwimakaza amahoro mu karere k’Ibiyaga bigari

Uyu mushinga “Amani Kwetu”, bisobanuye “Amahoro iwacu”, ni uwa komisiyo y’ubutabera n’amahoro iterwamo inkunga na Trocaire,  wateguwe mu rwego rwo guteza imbere ubumwe n’ubwiyunge hagati y’abaturage bo ku mipaka y’ibihugu by’u Rwanda, Kongo, n’ u  Burundi. Ibi bigamije gukumira no kurwanya imvugo z’urwango, guteza imbere ibiganiro byubaka, no gushimangira ubumwe n’imibanire myiza hagati y’abatuye akarere k’ibiyaga bigari.

Mu gutangiza uyu mushinga, hari abahagarariye Komisiyo z’Ubutabera n’Amahoro zituruka mu Rwanda, u Burundi na Repubulika Iharanira Demokarasi ya Kongo. Padiri Valens, umunyamabanga mukuru wa  Komisiyo y’Ubutabera n’Amahoro mu Rwanda no mu karere k’ibiyaga bigari, yasobanuye intego nyamukuru y’uyu mushinga n’uburyo uzafasha abaturage bo ku mipaka y’ibi bihugu kubana mu mahoro.

Padiri Valens yagize ati “Nk'uko mwabibonye, turi kumwe n'abaturutse mu Burundi ndetse n'abaturutse muri Repubulika Iharanira Demokarasi ya Kongo, mu gice cya Bukavu no muri diyosezi ya Goma. Hari kandi n'abaturutse mu Rwanda baturutse muri Diyosezi ya Cyangugu na Diyosezi ya Nyundo. Ni diyosezi zihana imipaka — Nyundo na Goma, Bukavu na Cyangugu, ndetse n'i Bujumbura na Diyosezi ya Ngozi mu Burundi. Bijyana n'umurongo mugari w’abepiskopi Gatolika muri aka karere k’ibiyaga bigari mu kubaka amahoro.”

Yakomeje avuga ko uyu mushinga uhuza Kiliziya Gatolika mu karere mu rugendo rwo kubaka amahoro arambye.

Ati“ Uyu rero ni umushinga munini ugamije gufasha abaturage b’aka karere k’ibiyaga bigari, abakristu by’umwihariko kumva ko bahamagariwe kuba ibiraro by’amahoro aho kuba inkuta zitanya abantu. Muri ibi bihe akarere kacu karimo ibibazo by’intambara n’ubwumvikane bucye, Kiliziya ifite uruhare rukomeye mu kubanisha abantu: Abanyarwanda, Abanyekongo, Abaganda n’Abarundi. Tugomba kwirinda mvugo zibiba urwango cyangwa amacakubiri, ahubwo tukubaka amahoro n’ubufatanye.”

Padiri Valens yavuze ko Komisiyo y’Ubutabera n’Amahoro izifashisha abihayimana n’abasaseridoti mu kugeza ubu butumwa ku baturage, by’umwihariko mu mashuri, muri paruwasi no mu muryango mugari.

Ati “Abo tuzabifashisha ni abasaserdoti, abiyeguriyimana n’abandi bakora ubutumwa mu bice bitandukanye. Tuvuge tuti: abo ngabo batangirire abandi kuba umusemburo w’amahoro n’imibanire myiza. Kandi n’ubusanzwe, ubutumwa bwacu nk’abihayimana ni ukuvuga amahoro, ariko muri iki gihe turahamagarirwa kuba ijwi rivuga ubwumvikane n’ubworoherana.”

Muri ibi  biganiro  , abitabiriye basangiye ibitekerezo ku bibazo bitandukanye byugarije akarere k’ibiyaga bigari, birimo politiki, ubukungu n’imibanire y’abantu. Padiri Valens yavuze ko Kiliziya ifite inshingano zo gukoresha ijambo ry’Imana n’isengesho mu gushakira umuti urambye ikibazo cy'intambara n'umubano mubi gikomeje kurangwa mu Biyaga bigari.

Ku ruhande rw’u Burundi, Padiri Emile Ndayizigiye, Umunyamabanga Mukuru wa Komisiyo y’Ubutabera n’Amahoro mu Nama y’Abepiskopi Gatolika mu Burundi, yashimangiye akamaro k’uyu mushinga mu kubaka amahoro arambye mu karere.

Padiri Emile yagize ati “Icya mbere ni uko tuzafatanya gukomeza amahoro, mu kuyarondera, kuyaharanira no mu kuyakomeza. Muri Kiliziya, ubutumwa tujejwe mu bukomeye burimo icyo gisata cy’Ubutabera n’Amahoro, bukomoka kuri Yezu Kristu ubwe wagize ati: ‘Ndabahaye amahoro yanjye.’”

Yongeyeho ati “Akarere turimo karangwamo amahoro make, karimo intambara n’ibibazo by’ubwumvikane buke. Ariko twemera ko uruhare rwa buri wese ari ingenzi. Binyuze  muri uyu mushinga Amani Kwetu, amahoro tuzayashikako. Kiliziya ntiyigira ku bakristu bayo gusa, ahubwo ireba abantu bose — yaba abagatolika, andi madini yemera Yezu Kristu, ndetse n’abatemera Imana. Twese tugomba kugerwaho n’ubutumwa bw’amahoro twigisha, kandi ubwo butumwa ntibuzasiga ntacyo bukoze.”

Uyu mushinga "Amani Kwetu" ni igikorwa kiri mu murongo mugari w’abepiskopi Gatolika bo mu karere k’ibiyaga bigari, bise “Paix au Grand Lacs”, kigamije gufasha abaturage kubaka amahoro, gukemura amakimbirane mu nzira y’ubwumvikane, no guteza imbere ibiganiro byubaka hagati y’imiryango n’amadini atandukanye.