Ku munsi wa mbere w'Inteko y'Abakaridinali, isi yahamagariwe guca ukubiri n'intambara"

Iyi Nteko yabereye mu Ngoro ya Pawulo wa VI ku wa 26 Kamena 2026. Yatangiye hafatwa umwanya wo gusabira abaturage ba Venezuela bakomeje guhura n'ibihe bikomeye, ndetse n'abahitanywe n'umutingito uherutse kwibasira igihugu cyabo.

Insanganyamatsiko y'ibiganiro iragira iti "Umuco w'Ububasha n'Umuco w'Urukundo", ishingiye ku gice cya gatanu cy'urwandiko rwa Papa Leo XIV rwitwa Magnifica Humanitas. Ibiganiro byayobowe na Karidinali Pablo Virgilio Siongco David, mbere y'uko Karidinali Víctor Manuel Fernández, Umuyobozi w'Urwego rwa Vatikani rushinzwe Inyigisho z'Ukwemera, atanga ikiganiro kibimburira ibiganiro. Papa Leo XIV yitabiriye itangira ry'iyi gahunda, nyuma aza kongera kwifatanya n'abakaridinali mu nama rusange.

Abitabiriye Inteko bavuze ko uwo muco ugabanya agaciro ka muntu, ugatuma abantu bagenda bemera ihohoterwa nk'aho ari ibisanzwe, bityo amakimbirane agashakirwa ibisubizo byihuse ariko bidakemura ikibazo mu buryo burambye.

Abakaridinali bashimangiye ko Kiliziya igomba kuba urugero mu kwimakaza amahoro binyuze mu mvugo no mu bikorwa bishyira imbere kumva abandi, kubabarira, ubwiyunge, ubutabera busana ibyangiritse ndetse n'ibikorwa bifatika bifasha abakomeretse ku mutima kubera intambara.

Banavuze ko ubumwe bw'abagize Kiliziya ari ingenzi kugira ngo ubutumwa bwayo bugire icyizere, banashimangira akamaro ko gukomeza ibiganiro n'andi madini n'amatorero atandukanye, by'umwihariko Islamu.

Ibiganiro byagarutse ku kamaro ko kwizera Kristu no kubaho mu Ivanjili aho kuyigira inyigisho gusa. Abakaridinali bavuze ko hari ibibazo bimwe na bimwe isi ihura na byo bidashobora gukemurwa n'imbaraga z'abantu bonyine, ahubwo bisaba ubufasha bw'Imana.

Abitabiriye iyi Nteko banagarutse ku ruhare rw'abanyapolitiki, basaba ko ubutegetsi budakomeza kugengwa n'inyungu z'ubukungu, kuko bishobora kubangamira gufata ibyemezo bishyira imbere inyungu rusange.

Bagarutse kandi ku ruhare rw'umuryango, uburezi, iyogezabutumwa rikozwe gitwari ndetse n'uruhare rwa dipolomasi ya Vatikani n'Abahagarariye Papa mu bihugu bitandukanye mu gutuma ijwi rya Kiliziya rikomeza kumvikana ku rwego mpuzamahanga.

Mu ngingo zagarutsweho cyane, benshi mu Bakaridinali bavuze ko igihe kigeze ngo harebwe kure inyigisho yiswe "intambara ikwiye" (Just War), kuko Inkuru Nziza idashobora kwamamazwa hifashishijwe imbaraga.

Abakaridinali bagaragaje ishimwe rikomeye kuri Papa Leo XIV kubera urwandiko Magnifica Humanitas, banamushimira uburyo yakomeje kwamagana intambara no guhamagarira amahanga kubaka amahoro.

Ahubwo bashimangiye ko hakwiye kuvugwa uburenganzira bwo kwirwanaho mu rugero bukenewe, igihe umuntu cyangwa igihugu byugarijwe, ariko hagahora hashyirwa imbere inzira z'amahoro.

Banagarutse ku nshingano za Papa nk'Umusimbura wa Mutagatifu Petero, bavuga ko zituma Kiliziya ikomeza kwigenga ku butegetsi bwa politiki, kandi ko ibikorwa bifite ibisobanuro byimbitse bishobora kuba ibimenyetso bifasha kwimakaza amahoro muri iki gihe.

Mu gusoza ibiganiro, bamwe mu Bakaridinali bashimye uburyo Inteko Idasanzwe y'Abakaridinali yabahaye umwanya wo kungurana ibitekerezo ku bibazo bireba Kiliziya n'isi muri rusange.

Banashimangiye ko urwandiko rwa Papa Leo XIV ari ubutumwa bugenewe cyane cyane Inteko y'Abakaridinali kugira ngo ifatanye n'abandi bayobozi b'amadiyosezi n'abafite ubushake bwiza mu kubaka amahoro. Banavuze ko ibikorwa bifite ibisobanuro byihariye, nk'Umunsi Mpuzamahanga wo Gusabira Amahoro watangijwe na Mutagatifu Yohani Pawulo II i Assisi mu 1986, bikomeza kuba urugero rwiza rwo kwimakaza umuco w'amahoro.

Papa Leo XIV yagarutse mu Ngoro ya Pawulo VI ahagana saa moya n'igice z'umugoroba kuwa 26 Kamena 2026, ayobora isengesho ryo gusoza uwo munsi wa mbere w'Inteko Idasanzwe y'Abakaridinali.