Ku nshuro ya mbere u Rwanda rwakiriye ihuriro ry’Inama ya Caritas ku rwego rw’isi

Ni ku nshuro ya mbere u Rwanda rwakiriye iyi nama ikomeye ihuza Caritas zigera ku 161 ku isi, ku nsanganyamatsiko igira iti “Ibikorwa bya Caritas by’ubutabazi bihagaze bite muri iyi isi ya none iri guhura n’ibibazo bitandukanye bikomeye bibangamira ubuzima bwa muntu.”

Ni Inama igamije kurebera hamwe uko ibikorwa by’urukundo n’ubutabazi byakomeza kunozwa mu gihe isi iri mu mpinduka zikomeye zirimo amakimbirane, ibibazo by’ubukungu n’ihindagurika ry’ibihe.

Abitabiriye iyi nama bahawe ikaze na Nyiricyubahiro Musenyeri Anaclet Mwumvaneza, Umwepiskopi wa Diyosezi ya Nyundo akaba na Perezida wa Caritas Rwanda mu Nama y’Abepiskopi Gatolika mu Rwanda.

Mu kiganiro yagiranye na Kinyamateka, Musenyeri Anaclet Mwumvaneza yagaragaje ko kwakira iyi nama ari ishema rikomeye ku Rwanda no kuri Caritas Rwanda by’umwihariko.

Yagize ati “Kuba iyi nama ibereye hano mu Rwanda ni ishema rikomeye kuri twe nka Caritas Rwanda. Kuba twaratoranyijwe kwakira abahagarariye Caritas ku isi yose ni icyubahiro gikomeye. Ibi bizadufasha kungukira ku bunararibonye bw’abandi, natwe tubasangize uko dukora.”

Yongeyeho ko iyi nama ibaye mu gihe isi ihanganye n’ibibazo byinshi birimo intambara, amapfa, ubuhunzi n’ibindi bibazo byugarije ubuzima bw’abantu.

Ati “Hari ibibazo byinshi abantu bahura nabyo bituruka ku ntambara, amapfa, impunzi, imfungwa n’abandi bakeneye ubufasha. Nka Caritas, twiyemeje kubaba hafi. Ni yo mpamvu iyi nama ari umwanya mwiza wo kungurana ibitekerezo no kurebera hamwe uko twakomeza gufasha abo bose.”

Musenyeri Anaclet Mwumvaneza kandi yavuze ko nubwo hari bamwe mu bari biteguye kwitabira batabashije kugera i Kigali bitewe n’umutekano mucye n’intambara ziri kubera mu bice bimwe by’isi, abashoboye kuhagera bazasangira ubunararibonye ku bikorwa byabo, banasure imishinga n’ibikorwa bitandukanye bya Caritas Rwanda kugira ngo barebe uko ibikorwa byayo bishyirwa mu bikorwa.

Iyi nama izibanda ku ngamba zo gukomeza guhangana n’ibibazo by’isi ihinduka umunsi ku wundi, no gushaka uburyo burambye bwo gufasha abatishoboye n’abahura n’ibibazo bitandukanye bakeneye ubutabazi bwihuse n’inkunga y’igihe kirekire.

Kwakira iyi nama ku nshuro ya mbere bishimangira uruhare u Rwanda rukomeje kugira mu bikorwa bya Kiliziya Gatolika no mu bufatanye mpuzamahanga, by’umwihariko mu bikorwa by’urukundo n’iterambere ryuzuye rya muntu.