Mgr Sinayobye arashishikariza abashinzwe umuryango gukomeza kuwitangira batizigamye

Iyi nama ni iya kabiri ibaye mu mwaka w’ubutumwa wa 2025–2026, mu gihe buri mwaka hateganywa inama enye zifasha iyi Komisiyo gukurikirana inshingano zayo no kunoza umurongo w’ibikorwa byayo. Yitabiriwe n’abagize Komisiyo uko ari 15, iyobowe na Nyiricyubahiro Mgr Edouard Sinayobye, Umwepiskopi wa Diyosezi Gatolika ya Cyangugu akaba n’umuyobozi wa Komisiyo y’Umuryango mu Nama y’Abepiskopi Gatolika mu Rwanda.

Mu ngingo z’ingenzi zaganiriweho, hibanzwe ku gusuzuma uko ibikorwa by’ikenurabushyo ry’umuryango bihagaze muri za diyosezi zitandukanye kugeza ubu, hagamijwe kureba ibimaze kugerwaho n’ibikiri imbogamizi.

Mu biganiro byabaye, abagize Komisiyo bagiye bagaragaza uko ibikorwa bihagaze muri za diyosezi zabo, basangira ubunararibonye ku byagezweho, bagaragaza ibikomeje gutanga umusaruro n’ahakiri intege nke. Ibi byafashije kurebera hamwe icyakongerwamo imbaraga, hagamijwe kunoza imikorere ya Komisiyo ku rwego rw’igihugu no kurushaho gusohoza neza ubutumwa bwayo.

Mu butumwa yatanze, Nyiricyubahiro Mgr Edouard Sinayobye, Perezida wa Komisiyo y’Umuryango mu Nama Y’Abepiskopi Gatolika mu Rwanda, yagarutse ku kamaro ko kwitangira umuryango, asaba abagize Komisiyo gukora uwo murimo batizigamye. Yashimangiye ko kwitangira umuryango ari umuhamagaro usaba ubwitange n’umutima ukunda.

Yagize ati “Mukomeze mwitangire umuryango mutizigamye. Uwitangira umuryango ntaretsa, ntahuga, ntaruha. Ndabibutsa ko kuba muri iyi Komisiyo ari igikorwa cy’ubwitange.”

Yakomeje abasaba gukomeza gushyira imbaraga mu murimo wabo, bakita ku muryango nk’ishingiro ry’ubuzima bwa Kiliziya n’Igihugu, bagafatanya gutekereza ibibazo byugarije umuryango no kubishakira ibisubizo birambye.

Ati“Mukomeze kwitangira umuryango ubutaretse. Mutekerereze hamwe umuryango, mushakire hamwe ibisubizo by’ibibazo biwugarije, kandi mubikore mutagamije inyungu, ahubwo mubitewe n’urukundo n’umuhamagaro.”

Iyi nama ishimangira umuhate wa Kiliziya Gatolika mu Rwanda mu gukomeza gushyira imbaraga mu kwita ku muryango, nk’urufatiro rw’ubuzima bw’umukristu n’iterambere ry’umuryango nyarwanda muri rusange. Abayitabiriye basoje biyemeje gukomeza gukorana no gushyira mu bikorwa ibyaganiriweho, kugira ngo umuryango urusheho gukomera no kuba ishingiro ry’ukwemera n’iterambere rirambye.