Musenyeri Balthazar yibukije abanyeshuri ba Saint Jean Nyarusange ko impamyabumenyi idaherekejwe n’indangagaciro nta cyo imaze

Mu butumwa yabagejejeho, Musenyeri Balthazar Ntivuguruzwa, Umwepiskopi wa Diyosezi Gatolika ya Kabgayi, yasabye abanyeshuri kurangwa n’ubunyangamugayo, gukoresha neza impano bahawe n’Imana no kuyiringira by’umwihariko muri ibi bihe byo gusoza umwaka w’amashuri anabibutsa ko impamyabumenyi idaherekejwe n’indangagaciro nta cyo imaze .

Mu nyigisho ye, yavuze ko kwizihiza umunsi mukuru wa Mutagatifu Yohani Batisita bibaye mu mpera z’umwaka w’amashuri, bityo abanyeshuri bakwiye kumwigiraho no kwitegura neza ibizamini bibategereje.

Ati “Bana bacu, mugiye kwinjira mu bihe bikomeye by’ibizamini, ndetse harimo bamwe babitangiye. Mwige nta bwoba, ntimuri mwenyine. Nimwiringire Imana kandi mukore icyo ibereka cyose. Imana ntibeshya, ntijya iyobya kandi iraduherekeza mu nzira z’ubuzima bwacu bwose. N’ahahandi tutishoboreye, Imana irahadushoboza, n’ahahandi twumva nta cyo dufite twatanga cyangwa twakora, Imana ikatwibuka ikaba ari yo yikorera ibikorwa byose.”

Musenyeri Balthazar yakomeje asobanura ko uburezi nyabwo budashingiye gusa ku bumenyi bwo mu mutwe, ahubwo bunarera umutima, bukinjiza umuntu mu ndangagaciro zimufasha kuba umuntu wuzuye.

Ati “Ntabwo twigira kubona impamyabushobozi gusa cyangwa impamyabumenyi gusa. Impamyabumenyi n’impamyabushobozi bidaherekejwe n’indangagaciro nta cyo bimaze, nta cyo bivuze. Hari abantu benshi barangije amashuri bafite impamyabumenyi nyinshi n’amagarade menshi, ariko batsinzwe n’ishuri ry’ubuzima, batsindwa urugamba rw’ubuzima kuko nta ndangagaciro bifitemo. Ahubwo izo mpamyabushobozi zababereye inzira y’urupfu kuri bo ubwabo no kuri bagenzi babo.”

Yahereye kuri ibi asaba abanyeshuri kwakira uburere n’inama bahabwa, bakibanda ku ndangagaciro zituruka mu kwemera kwa gikristu no mu iyobokamana.

Ati “Muharanire kubaka uwo mutimanama urangwa n’ubunyangamugayo, urukundo, kwihangana n’ubwitange. Ibyo ni byo bifasha umuntu gukomera mu buzima no kugirira abandi akamaro.”

Yakomeje agira ati “Nimureke rero ishuri ryacu ribe inzira yo kubaka umuntu uzigirira akamaro ubwe, akakagirira umuryango, akakagirira igihugu ndetse na Kiliziya.”

Musenyeri Balthazar yongeye kwibutsa abanyeshuri ko bafite impano nyinshi bahawe n’Imana, abasaba kuzikoresha neza kugira ngo biyubake kandi bategure ejo hazaza habo.

Ati “Mwirinde uburangare. Mugiye kwinjira mu bihe by’ibizamini, buri munota muwukoreshe uko bikwiye. Ntihagire urangara cyangwa urangaze mugenzi we, kandi ntihagire ucika intege ngo avuge ati: ‘Umwaka ushize ntibyagenze neza, reka mbyihorere, ibizamini nta cyo bizamarira.’”

Arongera ati “Wihisha cyangwa wishyira mu gitaka, cyangwa wicecekesha impano Nyagasani yaguhaye, kuko Nyagasani yayiguhaye azi neza ko izabyara umusaruro.”

College Saint Jean Nyarusange ni ishuri rya Diyosezi Gatolika ya Kabgayi ryashinzwe na Padiri Jean Baptiste Ripoll, rikaba ryaragijwe Mutagatifu Yohani Batisita. Ryatangijwe ku mugaragaro ku wa 3 Gashyantare 1997, rifite inshingano zo gutanga uburezi bufite ireme bushingiye ku ndangagaciro za Kiliziya Gatolika.

Iri shuri rifite icyiciro rusange cy’amashuri yisumbuye n’icyiciro cya kabiri cy’amashuri yisumbuye mu mashami ya Siyansi arimo; Mathematics, Chemistry, Biology (MCB), Physics, Chemistry, Biology (PCB) Mathematics, Computer Science, Economics (MCE), History, Geography, Literature (HGL).

Riherereye mu Murenge wa Nyarusange, Akarere ka Muhanga, mu Ntara y’Amajyepfo.