Musenyeri Papias yakiriye urubyiruko muri Forum, arusaba kuba abahamya b’ubuvandimwe butagira imbibi

Mu nyigisho yabagejejeho ubwo yatangizaga ku mugaragaro iri huriro, Musenyeri Papias yibukije urubyiruko ko ubuhamya nyabwo rwahamagariwe gutanga ari ukubaka isi ishingiye ku kwizera, ubuvandimwe n’amahoro.

Yagize ati "Rubyiruko rwacu, ibi bintu uko ari bitatu turamutse rwose tubyakiriye tukabigira ibyacu mu buzima bwacu bwa buri munsi, isi yacu yahinduka Paradizo na buri wese akabaho mu mutekano neza mu buzima bwe bwa buri munsi."

Yakomeje agira ati "Tubashije kubakira ukwizera kuri Kristu, ubuvandimwe n’amahoro, buri wese muri za ndangagaciro batubwira zubakiye ku Ivanjiri byakubaka isi yacu ikaba nziza tukabaho mu byishimo, mu munezero no mu iterambere twifuza ryo kuri Roho no ku mubiri."

Musenyeri Papias yagaragaje kandi ko umukirisitu wese afite inshingano yo guhamya ukwizera kwe muri Kristu, cyane cyane mu bihe bikomeye, kuko kutabikora bishobora gutuma hari abacika intege cyangwa bagateshuka ku kwemera.

Yongeye kwibutsa urubyiruko ko mu gihe isi igaragaramo amacakubiri n’ukwishishanya, abakirisitu bakwiye kuba abantu bahuza abandi aho kubatandukanya.

Yagize ati "Turi abavandimwe mu izina rya Yezu ku bwa Batisimu yacu kandi tugomba kuba abubatsi b’amateme ahuza abantu kandi akomeye adashobora kuba yamenwa n’umutingito cyangwa se n’imodoka zifite uburemere."

Yanashimangiye ko kuba iri huriro ryitabiriwe n’urubyiruko rwaturutse mu Rwanda, muri Repubulika Iharanira Demokarasi ya Congo, muri Uganda n'Ubutaliyani, ari ikimenyetso cy’uko ubuvandimwe burenga imipaka.

Ati "Tube abahamya b’ubuvandimwe butagira imbibi. Igihe hari abubaka inkuta zitandukanya abantu, twe tube abubatsi b’amateme."

Yakomeje asaba urubyiruko gutekereza ku buryo rwakomeza kubaka ayo mateme y’ubuvandimwe, rugera aho abandi batinya kugera, rukabagezaho ijambo ribahumuriza kandi ribaha icyizere.

Mu gusoza ubutumwa bwe, Musenyeri Papias yabwiye urubyiruko ko ibiganiro by’iri huriro bitagomba kugarukira aho gusa, ahubwo ko bikwiye no kubafasha gukuramo amasomo mu mubano bazagirana hagati yabo.

Yagize ati "Ni n’umwanya wo guhura nk’urubyiruko, na byo ni ibindi biganiro byiyongera ku byo baduhaye. Ntituzagarukire gusa ku biganiro ngo tuvuge tuti iki ni cyo nakuyemo, ahubwo uzavuge uti kuba naraje hano nkabana n’abandi nakuyemo iki? Byamfashije gute kuba umuhamya w’aya mizero, ubuvandimwe n’amahoro?"

Mu bikorwa biteganyijwe muri iyi minsi, urubyiruko ruzasura bagenzi babo bo muri paruwasi zegereye Katederali ya Byumba basangire ubuzima, ndetse runasure abana bari mu Igororero ry’Abana bato bari munsi y’imyaka 16 riherereye muri Paruwasi ya Nyagatare, ahagororerwa abana barenga 800. Ibi bikorwa byose bigamije kubagezaho ubutumwa bwo kuba abahamya b’amizero, ubuvandimwe n’amahoro.

Mu gutangiza iyi Forum ku mugaragaro, ni umuhango witabiriwe n’Abepiskopi batandukanye barimo Nyiricyubahiro Musenyeri Vincent Harolimana wa Diyosezi Gatolika ya Ruhengeri, Musenyeri Célestin Hakizimana wa Diyosezi ya Gikongoro, Musenyeri Servilien Nzakamwita, Umwepiskopi wa Byumba uri mu kiruhuko cy’izabukuru, hamwe n’abapadiri bashinzwe Ikenurabushyo ry’Urubyiruko mu madiyosezi na paruwasi zitandukanye mu Rwanda, bari baherekeje urubyiruko rwitabiriye iri huriro.

Iri Huriro ry’Urubyiruko ku rwego rw’Igihugu ririmo kubera muri Diyosezi Gatolika ya Byumba rizasozwa ku Cyumweru, tariki ya 23 Kanama 2026.