Mushaka : Uwari Diyakoni, Arsène Irakoze yinjiye mu muryango w'abasaserdoti ba Diyosezi ya Cyangugu

Mu muhango wo gutanga Isakaramentu ry'Ubusaserdoti, Diyakoni Arsène Irakoze yagizwe Padiri, yiyongera ku mubare w'abasaserdoti ba Diyosezi ya Cyangugu bafite ubutumwa bwo kwamamaza Inkuru Nziza no kuyobora Umuryango w'Imana.

Uretse Padiri mushya, hanatanzwe umurimo w'Ubusomyi ku bafaratiri batatu ari bo Fratri Nshimiyimana Léonce, Fratri Jean Niyihabose na Fratri Niyigirimpuhwe Fabrice.Hatanzwe kandi umurimo w'Ubuhereza ku bafaratiri batanu ari bo Fratri Niyogushimwa Patrick, Fratri Kwizera Jean Claude, Fratri Ugirimana Eric, Fratri Igiraneza Alain na Fratri Rukundo Honoré.

Ni ibirori byitabiriwe n'abapadiri, abihayimana, abakristu benshi, inshuti n'imiryango y'abahawe izi mpano, bahuriye hamwe mu gushimira Imana ku mpano y'umuhamagaro ndetse no gushyigikira abakomeje urugendo rubaganisha ku Busaserdoti.

Mu nyigisho yagejeje ku bitabiriye uwo muhango, Musenyeri Edouard Sinayobye, Umwepiskopi wa Diyosezi ya Cyangugu, yagarutse ku busobanuro bw'ubusaserdoti, ashimangira ko ari umuhamagaro usaba kwitangira Imana n'abantu, aho yasabye abahawe izi nshingano kurangwa n'ubudahemuka, kwicisha bugufi no guhora baharanira ubutungane.

Yagize ati "Dufatanye n'aba baseminari bacu bahawe imirimo ya gitumwa ibaganisha ku Busaserdoti; Ubusomyi n'Ubuhereza."

Yakomeje agira ati"Dufatanye ku buryo bw'umwihariko na Diyakoni Irakoze Arsène, uhawe Ubusaserdoti. Twese tuzirikane ku ibanga ry'Ubusaserdoti. Umusaserdoti turumviramo ko ari intore y'Imana. Ni nka Salomoni wavugaga abwira Imana yamutoye ati 'Ni wowe Nyagasani wahaye umugaragu wawe kwima ingoma.' Padiri ni intore, asigwa amavuta akegurirwa Imana, agahamagarirwa kuba umuhamya n'umugabuzi, agahora yirinda iteka kwishushanya n'isi.

Musenyeri Sinayobye yakomeje agaragaza ko ubusaserdoti bushingiye ku mubano ukomeye na Kristu, agira ati"Umusaserdoti wa Kristu ni umuntu wahuye na we kandi agahora iteka amushakashaka ubutarambirwa. Padiri ni umunyahirwe wabonye isaro ry'agaciro karuta byose, ari ryo Kristu. Igisigaye kuri we, nk'uko Intumwa Pawulo abivuga, ni ukumumenya no kwishushanya na we."

Yakomeje agira ati: "Kubera ko Kristu aba amubereye byose, ni yo mpamvu padiri yigomwa byinshi kugira ngo mu mibereho ye hatinjiramo ibigirwamana."

Asobanura ko ubusaserdoti atari ubuzima bwo kwishakira ibyiza gusa, Musenyeri Sinayobye yagize ati "Umusaserdoti si bya bindi abajene b'iki gihe bita uburyohere cyangwa ubusosere. Mu Busaserdoti bwa Kristu hashushanyijemo ibanga ry'umusaraba, umusaraba witwa ubwitange. Ubwitange ni irindi jambo ryo kuvuga umusaserdoti. Umusaserdoti ni nk'umuntu utekera abandi, uhora ku mashyiga atekeye abakristu kugira ngo abazimanire, abafungurire ibibatungira roho."

Yakomeje agaragaza isura nyakuri y'umusaserdoti agira ati"Si umutware. Umusaserdoti twamugereranya n'umubyeyi wonsa abana be. Umusaserdoti yambaye isura ya Kristu, nk'uko Intumwa Pawulo abivuga ati 'Abo yamenye yarabahamagaye, abaha kwambara isura y'Umwana we.' Padiri atwaye ubwo bukungu burenze ubwenge, bukomeye, ariko akabutwara mu tubindi tumeneka ubusa, ari yo kamere ya muntu. Kugira ngo kamere ye itavuguruza imirimo mitagatifu, padiri agomba guhora ku rugamba rwo guharanira ubutungane."

Mu gusoza ubutumwa bwe, Musenyeri Sinayobye yasabye abakristu gukomeza gusabira abasaserdoti n'abakiri mu rugendo rw'uyu muhamagaro, agira ati "Umunsi nk'uyu ni n'umunsi wo gushyira mu isengesho izo ntore z'Imana zose. Twese uko turi mudusabire kugira ngo duhore koko turi ishusho ya Kristu rwagati mu bantu."

Padiri mushya Arsène Irakoze ni mwene Minani Cyprien na Françoise Nyirantore. Yavutse ku wa 10 Gicurasi 1996, avukira mu Mudugudu wa Buganza, Akagari ka Murya, Umurenge wa Nzahaha, mu Karere ka Rusizi. Ni muri Paruwasi Gatolika ya Mushaka muri Diyosezi ya Cyangugu

Uyu munsi wabaye uw'ibyishimo ku muryango wa Diyosezi ya Cyangugu muri rusange, by'umwihariko ku bakristu ba Paruwasi ya Mushaka, bishimiye kwakira umusaserdoti mushya no guherekeza abandi bafaratiri bateye intambwe zibategurira kwakira Isakaramentu ry'Ubusaserdoti.