Myr Celestin Hakizimana yifatanyije n'amashuri Gatolika ari i Kibeho mu gikorwa cyo kwibuka ku nshuro ya 29

Ni igikorwa cyitabiriwe n'abakozi n'abanyeshuri bo muri ibi bigo ndetse n'abarokokeye i Kibeho n'abafite ababo biciwe i Kibeho. Iki gikorwa kandi kitabiriwe n'abashyitsi batandukanye barimo Myr Celestin Hakizimana, Umwepiskopi wa Gikongoro, wanayoboye Igitambo cya Misa cyabimburiye iki gikorwa. Hari kandi umuyobozi w'Akarere ka Nyaruguru n'abandi bashyitsi batandukanye.

Amateka avuga ko Abari Abatutsi bigaga icyo gihe cyibiruhuko mu Kigo Marie Merci Kibeho birukanwe bakoherezwa mu Kigo cya G.S Mère du verbe kibeho ari naho abagera kuri 94 barimo n'abari abakozi biciwe. Bakaba bashyinguye mu rwibutso rwa Jenoside yakorewe Abatutsi rwa Kibeho.

Yakomeje ashimira abateguye iki gikorwa cyo kwibuka kuko ari ugusubiza agaciro abakambuwe avuga ko kwibuka aya mateka bifasha gufata ingamba kugira ngo ibyabaye ntibizasubire.

Musenyeri Celestin HAKIZIMANA Umushumba wa Diyosezi ya Gikongoro mu butumwa yatanze yavuze ko Marie Merci ari ijambo ryiza bitari bikwiye ko harangwamo ubwicanyi. Yasabiye imbabazi abayobozi babi bagize uruhare muri aya mahano kandi bari bahagarariye Kiliziya.

Yagize ati" Dukwiye kwigira kuri aya mateka tukubaka Igihugu cyacu, ababyeyi bakigiraho konsa abana babo ibyiza bibafitiye akamaro aho kubonsa ibyabaviramo kugirira nabi abandi".

Myr Celestin yasabye abitabiriye iki gikorwa kunga ubumwe bazirikana ko ari abana b'Imana imwe. Bakaba amabuye mazima ku rugero rwa Kristu. Amashuri agaharanira kuba amashuri azira amacakubiri n'ingengabitekerezo ya Jenoside.