Myr Filipo Rukamba yashimiwe uko yabaniye abakirisitu mu myaka 50 amaze ahawe ubupadiri.

Ni ibirori byabimburiwe n’igitambo cya Misa yayobowe na Myr Anaclet Mwumvaneza Umwepiskopi wa Diyosezi ya Nyundo ari kumwe na Myr Filipo Rukamba Umwepiskopi wa Diyosezi ya Butare uhimbaza yubile Y'imyaka 50 y'ubusaseredoti, Myr Ntagungira Jean Bosco Umwepiskopi watorewe kuyobora Diyosezi ya Butare, Myr Eduard Sinayobye Umwepiskopi wa Diyosezi ya Cyangugu, Myr Smaragde Mbonyintege Umwepiskopi wa Diyosezi ya Kabgayi uri mu kiruhuko cy’izabukuru, Myr Yohani Mariya Vianney Umwepiskopi wa Diyosezi ya Kibungo, Myr Nzakamwita Servilien Umwepiskopi wa Diyosezi ya Byumba uri mu kiruhuko cy’izabukuru, Myr Anastase Mutabazi Umwepiskopi wa Diyosezi ya kabgayi uri mu Kiruhuko cy’izabukuru, Myr Celestin Hakizimana Umwepiskopi wa Diyosezi ya Gikongoro, Myr Balthazar Ntivuguruzwa Umwepiskopi wa Diyosezi ya Kabgayi na bamwe mu Bisonga byabo.

Ni ibirori kandi byitabiriwe na bamwe mu bayobozi bo mu nzego z’ibanze batandukanye barangajwe imbere na Guverineri w’Intara y’Amajyepfo Madame Kayitesi Alice, Abayobozi b’uturere two mu ntara y’amajyepfo, Abihayimana batandukanye, abakirisitu n’abandi bashyitsi.

Myr Filipo Rukamba Umwepiskopi wa Diyosezi ya Butare mu nyigisho ye yasabye abiyeguriye Imana, Abihayimana, abakirisitu n’abandi ko bakwiye kugira uruhare mu guhindura isi ngo irusheho kuba nziza bayishyiramo ubuvandimwe, kwicisha bugufi gukunda Imana kuba abanyamuhwe, kumenya kubabarira no gukunda abakene, gutera ibiti byiza byera urukundo n’imico myiza, buri wese yibaza ibiti yateye imbuto bibyara kugira ngo arebe neza aho ubuzima bwe buganisha iyi si turimo.

Myr Filipo yeretse abakirisitu umushumba watorewe kuyobora Diyosezi Butare avuga ko ari we mushumba mukuru w’iyi Diyosezi kuva ku wa 05 Ukwakira ubwo azaba yahawe inkoni y’ubushumba. Yavuze kandi ko atagiye mu kiruhuko cy’izabukuru kuko hari akazi kenshi ateganya gukora harimo no wo kwigisha Gatigisimu mu mwaka wa kane w’amashuri abanza azatangira muri uyu umwaka w’amashuri wa 2024 – 2025 ngo kuko yumva agifite imbaraga kandi akomeye.

Myr Filipo Rukamba Umwepiskopi wa Diyosezi ya Butare yashimiye Imana kubera umuryango mwiza yavutsemo abavandimwe bamufashije gukura kwiga no kugera kucyo yifuzaga, ati" Nta kintu na kimwe bigeze bampatira kuko n’ubupadiri ninjye wabwihitiyemo n’umutima wanjye, nakoraga icyo numva ngomba gukora nagikora neza bakabinshimira kandi nagikora nabi bakakimpanira, nakuze ndi umwana wumva afite ubwigenge buhagije, kuko no mu kutwigisha batubwiraga ko turi nk’abigenga kandi dushobora kugera kucyo twifuza, ngeze mu iseminari St Leo nibwo natangiye kwibaza icyo nzaba cyo, uwo nzaberaho cyangwa niba nzaberaho abandi, naje kwiyemeza kujya mu iseminari nkuru nkaberaho abandi. Numvaga nzaba muganga ariko ngatinya amaraso ubanza ubwo bwoba bwanjye ari bwo bwatumye njya mu iseminari."

Yakomeje ashimira Imana kubera ibyiza byinshi yamuhaye n’abantu benshi beza bahuye,yibutsa abakirisitu ko mu bihe byose ari ukwiringira Imana kuko urukundo rwayo rudashira, kandi ko tugomba kurinda imitima yacu, iy’imiryango yacu, avuga ko yakunze byuzuye n’Imana kandi ntawe yigeze yanga, asaba imbabazi kubo batabaniranye neza kandi azagerageza kubaho neza asaba ko bakwiga gukunda nka Kiririsitu kuko bitanga amahoro.

Umwe mu bakirisitukazi ba Diyosezi ya Butare Honorable Eutalie yavuze ko mu myaka 50 Myr Filipo Rukamba amaze ahawe Ubupadiri 27 ayimaze ari Myr wabo, bityo bashimira Imana kuba Imana yaramutoye ikamugira Umusaserdoti, ashimira Diyosezi ya Kibungo yamubarereye ikamubahekera ikamugeza muri Diyosezi yabo, bamushimira kandi uburyo yababereye umushumba mwiza haba mu mashuri, mu bijyanye n’isanamitima, kuko abantu badashobora kubaho mu mitima iganya cyane ko ariho yabasanze aho bamwe bumvaga batazasubira mu Kilziya bitewe n’ingaruka za Jenocide yakorewe Abatutsi mu 1994, ariko uyu munsi bakaba basabana bashimira Imana kuko yongeye kubahuza. Ati ``iyi ni impamvu yo gushimira Myr n’Imana yabimushoboje, yadushishikrije gukura mu kwemera, kuba abaturage nyabo n’abakirisitu nyabo, isengesho ni umugisha kuko ryadufashije gushaka ibisubizo by’ibibazo byacu no gushaka iterambere ry’abantu binyuze muri Caritas n’ahandi’’.

Guverineri w’Intara y’Amajyepfo Kayitesi Alice witabiriye ibi birori yashimiye Umwepiskopi wa Diyosezi ya Butare Myr Filipo Rukamba uruhare rwe mu iterambere ry’Intara y’Amajyepfo n’uko yababaniye, uruhare rwe mu rugendo rwo kubaka Ubumwe n’Ubudaheranwa mu banyarwanda binyuze mu mu rugendo rw’isanamitima byatangiriye muri iyi Diyosezi ibyo bamushimira bazirikana ibiganiro bya Ndi Umunyarwanda bitangwa hirya no hino muri iyi Diyosezi, uruhare rwe mu gushyigikira Gahunda yo kugaburira abana ku mashuri binyuze mu musanzu udasanzwe Diyosezi ya Butare yatangije mu bigo by’amashuri avuga ko ari ibikorwa byiza byabakoze ku mutima kandi bifuza ko byazakomeza bikagera n’ahandi, avuga ko umusanzu wabo bakiwukeneye aboneraho guha ikaze umusimbura we Myr Ntagungira Jean Bosco watorewe kuyobora Diyosezi ya Butare bamwizeza imikoranire hagati ye na Leta.

Myr Anaclet Mwumvaneza Umwepiskopi wa Diyosezi ya Nyundo wayoboye Igitambo cya Misa yo guhimbaza yubile y’imyaka 50 y’ubupadiri ya Myr Filipo Rukamba yavuze ko guhimbaza yubile nk’iyi ari amahirwe adahabwa abantu bose bityo ari umwanya mwiza wo gushimira Imana kubera ingabire ikomeye Imana yahaye Myr Filipo Rukamba igakomeza no kumurinda. Avuga ko ibyo yemereye Umwepiskopi imbere y’imbaga y’abakirisitu ubwo yahabwaga isakaramentu ry’ubusaserdoti bigaragara ko yabihamIje ndetse ashimira Myr Filipo wemeye ugushaka kw’iMana.

Ati “Imirimo y’umusaserdoti harimo kuba umuhuza w’abantu n’Imana, kuyobora imbaga y’Imana no kuyitagatifuza bigatuma umupadiri akora ubutumwa bwe neza, turashimira Myr Filipo wayoboye imbaga y’Imana, akayigisha akayitagatifuza binyuze mu masakaramentu yatanze n’ibindi, kandi bigatanga imbuto nziza, kuko hari abo yatoje kumva ijambo ry’Imana rirabahindura, twe nk’inama y’abepiskopi Gatolika mu Rwanda twabanye nawe dufite byinshi tumushimira yakoze muri Kilizya y’u Rwanda mu maparuwasi cyane cyane mu burezi kuko yakunze kuba mu burezi, yagize n’umwanya wo kuyobora Inama yacu, adufasha gukora neza inshingano zacu, ibyo byose ni byo tumushimira.

Muri iyi minsi nibwo twamenye ko Nyirubutangane Papa yemeye ubusabe bwe atangaza uzamusimbura ari we Myr Ntagungira Jean Bosco, tumushimira ko kandi nyuma yuko Acyuye igihe yiyemeje gukomeza gukora, gufasha abantu n’ibindi nk’uko n’ubundi nta mupadiri ujya mu kiruhuko cy’izabukuru.’’Yakomeje avuga ko Gushimira Myr Filipo Rukamba ni ijambo ryoroshye ariko umuntu yakwandika n’igitabo gikubiyemo umusanzu yatanze, gusa bizera ko bazakomeza kumubona hafi yabo nk’umujyanama, ati “Mu nama y’abepiskopi tugira umwanya wo kuganira naba Senyeri bari mu kiruhuko cy’izabukuru tunamushimira ko ari nawe wabitangije’’, aboneraho guha ikaze Myr Ntagungira Jean Bosco watorewe kuyobora Diyosezi ya Butare ati `` tuguhaye ikaze mu nama y’abepiskopi Gatolika mu Rwanda.’’

Musenyeri Filipo Rukamba yavutse ku itariki ya 26 Gicurasi 1948 i Rwinkwavu, ubu ni mu Karere ka Kayonza, mu Ntara y’Iburasirazuba. Yabatijwe ku itariki 29 Gicurasi 1948. Amashuri abanza yayigiye i Rwinkwavu, Rulindo, Rwamagana na Zaza, mu 1961 yagiye kwiga mu iseminari nto ya Kabgayi, Mu 1965 yagiye mu iseminari Saint-Paul y’i Kigali ari ho yarangirije amashuri yisumbuye mu bijyanye n’ikigereki n’ikilatini, Tariki 14 Nzeri mu 1968 yinjiye mu iseminari nkuru ya Nyakibanda kwiga Filozofiya na Tewolojiya, Tariki 2 Kamena mu 1974 yahawe ubupadiri abuherewe muri Diyosezi ya Nyundo.Mu 1976 Musenyeri Yozefu Sibomana wari umwepiskopi wa Diyosezi ya Kibungo yamwohereje kwiga muri kaminuza, i Roma, arangiza amasomo y’ikirenga (doctorat) yanditse igitabo (thèse) "Saint Cyprien et le martyre".

Kuva mu 1983 kugera mu 1991 yayoboye Seminari nto ya Zaza, mu 1991 kugera mu 1992 yabaye umuyobozi wa roho mu iseminari nkuru ya filozofiya y’i Kabgayi, mu 1992 yabaye padiri mukuru wa Katedarali ya Kibungo, Tariki 18 Mutarama 1997 yagizwe umwepiskopi, tariki 12 Mata 1997 aragizwa Katedarali ya Butare.