Myr Jean Bosco Ntagungira yakiriye amasezerano y’abiyeguriyimana ba kominote ingoro y’urukundo ari nabo mfura ze.

Hanahimbajwe yubile y’imyaka 25 ya Mama Beatha Gasengayire uvukaa muri Paruwasi ya Busanze, Mama Domithille Nibagwire uvuka muri Paruwasi ya Ruyenzi, Mama Eugenie Mukandinda wo muri Paruwasi Nyamiyaga, Mama Immaculée Mukabizimana uvuka muri Paruwasi ya Ruhuha, Mama Perpétue Uwamariya wo muri Paruwasi ya Gisagara na Mama Veneranda Mukaruyange uvuka muri Paruwasi ya Karama. Igitambo cya Misa cyabereyemo aya masezerano no kwizihiza Yubile cyayobowe n’Umwepiskopi wa Diyosezi ya Butare Myr Jean Bosco Ntagungira ari kumwe na Myr Filipo Rukamba uri mu Kiruhuko cy’izabukuru.

Myr Jean Bosco Ntagungira umwepiskopi mushya wa Diyosezi ya Butare yakiriye amasezerano ya burundu ku biyeguriyimana ba Kominote Ingoro y’Urukundo 7 ari nabo ba mbere ahaye amasezerano nyuma y’uko ahawe inkoni y’Ubushumba. Abakoze amasezerano ya Burundu, Mu gihe cyo gusezerana buri wese yavuze isezerano rye yanditse n’umukono we bwite, nyuma umukuru w’umuryango n’umwepiskopi bashyira umukono ku masezerano yabo.

Mu ijambo ry’umwe mu bakoze amasezerano bishimiye ko bakoze amasezerano yo kwiyegurira Imana burundu bavuga ko banejejwe cyane n'urugendo rurerure bafashijwemo na Yezu Kristu n'ubwo bagiye bahura na byinshi bica intege ariko Imana yabafashije kubinyuramo gitwari. Bavuga ko bemeye kumugaragaro gukurikira Yezu Kristu, bashimira kandi n'abepiskopi babo babanye nabo, banishimira ko ari bo bahawe amasezerano bwa mbere n'Umwepiskopi mushya Myr Jean Bosco Ntagungira nyuma yo guhabwa inkoni y'ubushumba nk'Umwepiskopi wa Diyosezi ya Butare, bakaba babaye imfura ze.

Hamwe n'abahimbaje yubile y'imyaka 25 bashimiye Myr Filipo Rukamba wababaye hafi na nyuma yuko Myr Blaise Forissier washinze uyu muryango yitabye Imana, bashimiye kandi umukuru w'umuryango wabo, abarezi babo batandukanye babahaye uburere n'ubumenyi.

Bashimiye abasaseridoti, Abiyeguriyimana n'abandi bose baje kubashyigikira hamwe n'abavandimwe b'Ingoro y'Urukundo bababaye hafi bakaba biyeguriye Imana burundu imbere ya Kiliziya. Bashimiye ababyeyi babo babatoje gukunda no gukurikira Imana, n'abakirisitu baje kubashyigikira.

Umwe mu babyeyi b'abahawe amasezerano ya burundu yavuze ko bishimiye intambwe abana babo bateye, bashimira Kiliziya Gatolika yashyizeho Imiryango itandukanye ifasha abantu kubona aho bitagatifuriza, bashimira Kominote Ingoro y'Urukundo yabakiririye abana, ndetse bashimira abana babo babashije kwemerera Imana. Yabasabye gukomeza gukora batizigama, kandi imirimo yabo bakajya bayitura Imana buri munsi bakamenya no kugisha inama bakuru babo.

Mama mukuru w'umuryango Ingoro y'urukundo Sr Mukamugema Germaine, yashimiye Myr Jean Bosco Ntagungira wemeye kubakirira amasezerano kandi neza ashimira Myr Filipo Rukamba wabashyikirije Myr mushya Jean Bosco bakiri bose bashimira n'uwabashinze Myr Blaise Forissier n'ubwo atakiriho avuga ko nawe yishimiye kuba bamwe mu bana babo babaye imfura za Myr Jean Bosco Ntagungira avuga ko ari igihango gikomeye kitazibagirana.

Umwepiskopi wa Diyosezi ya Butare Myr Filipo Rukamba uri mu kiruhuko cy’izabukuru agaruka ku ntego z’uyu muryango, Yavuze ko mu ntego zabo harimo gusingiza Imana ibituma ubuzima bwacu tubamo buri gihe twibanda mu mibanire n’Imana yo buzima budashira, kumenya Yezu Kristu no kumwiyegurira kandi avuga ko bigomba gusumba ibindi byose byiza, kuko bigaragaza ko wemeye kubana n’Imana no kuyiyegurira yo yonyine.

Agaruka ku isezerano bagirana n’Imana ari ryo ubukene, kumvira n’ubusugi yagize ati ”Isezerano riruta ayandi ni iryo kumvira, kuko umukiro twawuronkeye muri uko kumvira. Iri sezerano ni naryo ryo kwitanga ubwanyu ho igitambo. Isezerano ryo kumvira ryibutsa ubwitange bwa Yezu Kristu witanze ku musaraba, Kumvira Imana niko gutuma kubana kivandimwe bishoboka, abiyegurira Imana banayiha kugira ngo bere imbuto kandi imbuto yabo ikagumaho, ntawikubira umugisha w’Imana ahubwo mugomba kuwukwiza hose.’’

Myr Filipo Rukamba Umwepiskopi wa Diyosezi ya Butare uri mu kiruhuko cy'izabukuru kandi yashimiye ababyeyi bemeye gutanga abana babo bakabatanga batitangiriye itama kugira ngo biyegurire Imana. Ati '' Guha Imana uko yaguhaye udashaka inka, amafaranga n'ibindi ni by'agaciro gakomeye, ndashima umuryango w'Ingoro y'Urukundo ku bw'iki cyiciro cyane ko abamaze gusezerana burundu muri uyu muryango bamaze kugera kuri 51, mumaze no kugera hirya no hino, ni byiza kuko ari iyo Kiliziya yaguka, ndabifuriza gukura, gukomera no kujya mbere, ibikorwa byanyu bibe iby'umugisha bigaragarira abantu bose.''

Myr Jean Bosco Ntagungira Umwepiskopi wa Diyosezi ya Butare mu ijambo rye yashimiye mugenzi we Myr Filipo Rukamba wagendanye n'ababikira basezeranye burundu akaba yabahaye inyigisho nziza, yibutsa abasezeranye burundu ko urugendo aribwo rutangiye, naho abahimbaje yubile y'imyaka 25 ababwira ko bakwiye gukomeza kugira inyota barangamira noneho urugendo rwa yubile y'imyaka 50, ababwira ko ubwiza bw'Imana ari impano idasanzwe

Amasezerano bakoreye mu ruhame rw’abavandimwe, Imbere y’Imana Data, imbere ya Kilizya n’imbere y’umukuru w’umuryango basezeranye burundu Gukurikira Yezu Kristu mu nzira y’ubusugi, ubukene no kumvira, bayobowe n’amategeko y’abiyeguriyimana bo mu ngoro y’Urukundo.