Myr Jean Bosco Ntagungira yasoje kurambagira Paruwase zose zigize Diyosezi ya Butare yaragijwe.
Kuri iki Cyumweru tariki ya 03 Ugushyingo 2024, Umwepiskopi wa Diyosezi ya Butare Myr Jean Bosco Ntagungira yasoje uruzinduko rwe yagiriraga mu maparuwasi agize Diyosezi yaragijwe hagamijwe kuzimenya, ni urugendo yasoreje muri paruwase ya Save ari nayo marembo y’ivanjiri mu Rwanda kuko ari nayo paruwase ya mbere mu Rwanda. Uru rugendo Myr Ntagungira akaba yararukoze ari kumwe na Myr Filipo Rukamba Umwepiskopi wa Diyosezi ya Butare uri mu kiruhuko cy’izabukuru wagendaga amwereka abakristu bagize paruwase za Diyosezi ya Buatare.
Uruzinduko rw’umwepisikopi muri Paruwase ya Save yitiriwe umutima mutagatifu wa Yezu rwabanjirijwe n’Igitambo cya Misa yaturiye muri paruwase ya Save ari kumwe na Myr Filipo Rukamba uri mu kiruhuko cy’izabukuru,hamwe n’abasaseredoti bahakorera ubutumwa .
Myr Jean Bosco Ntagungira Umwepiskopi wa Diyosezi ya Butare, Yavuze ko yishimiye kuba yaturiye igitambo cya Misa i Save ahatangiriye Ubukirisitu. Ati ‘’Nishimiye kuba naturiye igitambo cya Misa hano muri Paruwasi ya Save ahatangiriye inkuru nziza mu Rwanda, ikindi kandi nishimiye ni uko Padiri mukuru wayo Kyebambe Medard ari we wanansabiye Ubwepiskopi ku munsi nabuhaweho, ubwo yagiraga ati ‘’ Nyiricyubahiro Antoni Karidinali turasaba ko Padiri Jean Bosco Ntagungira mumuha ubwepiskopi.’’
Myr Ntagungira akomeza avuga ko ashimira cyane Myr Filipo Rukamba uri mu kiruhuko cy’izabukuru wamufashe akaboko muri iyi minsi akajyenda anwerekana mu maparuwasi agize Diyosezi ya Butare yaragijwe uko ari 26, none ubu akaba ayarangije, usibye Paruwasi Universitaire Saint Dominique igifunze.’’
Myr Jean Bosco Ntagungira kandi yasabye abakirisitu ba Paruwasi ya Save gukomeza gukorera hamwe nk’ amaboko ya Paruwasi no gusigasira amateka yabo, kuko ari nabo andi maparuwasi n’abandi bakirisitu barangamiye, cyane ko ari ho hageze inkuru nziza bwa mbere. Yabasabye ko gukomeza kwitegura neza umunsi wo kwizihiza Yubile y’imyaka 125 inkuru nziza igeze mu Rwanda kuko izabera muri Paruwasi yabo.
Uruzinduko rwo kurambagira paruwase zose za Diyosezi ya Butare rwari rumaze ibyumweru bigera kuri 2, aho umwepisikopi yahuraga n’abamwe mu bakirisitu bahagarariye abandi barimo abagize inama nkuru ya Paruwasi, abayobozi ba Santarali, abayobozi ba za Komisiyo zitandukanye, abihayimana n’abapadiri.
Myr Filipo Rukamba Umwepiskopi wa Butare uri mu kiruhuko cy’izabukuru mu ijambo rye yavuze ko Paruwasi ya Save ari ikigugu mu yandi maparuwasi yo mu Rwanda bityo ko kuba ari bo mbere bakiriye inkuru nziza mu Rwanda bakwiye gukomeza kuba aba mbere mu gusigasira ubukirisitu kuko gusenga ari ikintu gikomeye cyane muri Kilizya bityo bakwiye kubigira umuco. Yanavuze ko nkuko bigaragazwa n’ibarura bigaragra ko ari nabo bakirisitu benshi ugereranyije n’abandi bo mu yandi maparuwasi uko baba bangana, ibyo byose bakwiye kubyifashisha bakomeza kuba koko igicumbi cy’ubukirisitu kandi bakabera abandi urugero.
Padiri mukuru wa paruwasi ya Save Kyebambe Medard, yavuze ko bishimiye kuba batuye Igitambo cya Misa bari kumwe n’abepiskopi babiri, avuga ko bishimiye kuba baje kubaturira igitambo cya Misa abakiriristu bose bahari bakababona aboneraho kwizeza Myr Jean Bosco Ntagungira ko bazamushyigikira ndetse bakamubera intama nziza.
Amwe mu mateka yihariye ya Paruwase ya Save ni uko yashinzwe tariki ya 08 Gashyantare 1900, ishingwa n’abapadiri b’abamisiyoneri b’ Afurika aribo Padiri Brard, Alias Terebura, Padiri Barthelemy na Frere Anselme. Mu myaka irindwi gusa Kiliziya yari imaze kuzura, aho tariki ya 26 Gashyantare 1907 yahawe umugisha iragizwa Umutima Mutagatifu wa Yezu.
Batisimu ya mbere yabaye hashize imyaka itatu, icyo gihe hari kuri Pasika tariki ya 11 Mata 1903 habatizwa abasore 22 n’abakobwa 4.
Paruwasi ya save ikikijwe na Paruwasi Kiruhura mu majyaruguru y’i Burengerezuba, Paruwasi ya Byiza mu ma Jyaruguru, Paruwasi Gisaraga mu Burasirazuba, Paruwasi Mbazi mu Burengerazuba na Paruwasi Katederali ya Butare mu Majyepfo.
Ifite abakirisitu barenga ibihumbi 34, ibarizwamo santarali 5; Save, Zivu, Mugogwe, Munazi na Tamba.
Igirwa na Sikirisale 3; Karama, Rwanza na Shyanda, ikagira uturere tw’ubutumwa 26 n’Imiryangoremezo 186. Ifite kandi Imiryango y’abihayimana 11 ari yo: Freres Mariste Noviciat, Freres Mariste TTC, Ababikira baba Visitandines, Les Militantes de la Vierge Marie, Benebikira Communaute Paroisse/ Gatoki, Benebikira Noviciat, Benebikira Communaute Sainte Bernadette, Institut Saint Boniface, Incarnet Worldsisters na Freres de Saint Gabriel.
Mu bijyanye n’ubuzima ifite Ikigo Nderabuzima cya Save, Mu burezi ikagira amashuri ya Kiliziya Gatolika 16 ; mu mashuri abanza ifite 7, mu mashuri y’imyuga n’ubumenyingiro ifite 1 ikaba inabarizwamo ishuri 1 rya Kaminuza Gatolika ishami rya Save.
Ni mu gihe ubukungu bwayo bushingiye ku buhinzi n’Ubworozi ndetse n’ubucuruzi
Abakirisitu ba Paruwasi ya Save kandi ku ncuro ya mbere basuwe n’Umwepiskopi wabo Myr Jean Bosco Ntagungira bamugabiye inka bamwifuriza ubutumwa bwiza.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
