Myr Ntagungira yarambagiye Amayaga: Menya paruwasi za Busoro, Nyamiyaga na Ruyenzi yasuye

Paruwasi ya Busoro, yahereyeho ari na yo yashinzwe bwa mbere na Myr Filipo Rukamba mu 1998 ibyawe na Paruwasi ya Nyamiyaga.

Abakristu bishimiye kwakira Myr Ntagungira banamugezaho amwe mu mateka y'izi paruwasi.

Iyi paruwasi ifite abakirisitu barenga ibihumbi 10, ku baturage bagera ku bihumbi 44 batuye ku buso bw'ubutaka bwayo. Igizwe na Santalari 5 ari zo: Busoro, Mututu, na Quasi Paruwasi ya Rwanamiza, irimo Santalari 2 iya Murinja na Kareba.

Mu bijyanye n'ibikorwaremezo paruwasi ifite ishuri ribanza rya Kareba, Urwunge rw'Amashuri rwa Munyinya n'urwa Mulinja bakaba bafite na Centre de Sante ya Busoro iherereye hafi y'iyi Paruwasi.

Paruwasi ya Busoro iherereye mu karere ka Nyanza ihana imbibi n'Igihugu cy'u Burindi, Akarere ka Bugesera n'aka Ruhango.

Padiri mukuru wa Paruwasi ya Busoro Mbagurire Jean Marie Vianney, mu ijambo rye yagarutse ku iyogezabutumwa rikorerwa muri iyi paruwasi inatuwemo n'abo mu yandi madini biganjemo Abadiventiste b'Umunsi wa Karindwi.

Nyuma yo gusura paruwasi ya Busoro, Myr Jean Bosco Ntagungira yakomereje muri paruwasi ya Nyamiyaga na yo yo muri aka gace k'amayaga.

Paruwasi ya Nyamiyaga yashinzwe tariki 12 Kanama 1961 ikaba iherereye mu karere ka Nyanza. Ihana imbibi na Paruwasi ya Ruyenzi, Nyanza, Kigoma igakora no ku gihugu cy'u Burundi.

Ifite amasantalari 4 ariyo: Mbuye, Matara, Kayanza, na Santalari yo kucyicaro ya Nyamiyaga. Nyamiyaga kandi ifite Uturere tw'ubutumwa 22 n'imiryango remezo 80 n'abakirisitu bagera ku bihumbi 26.

Mu bikorwaremezo iyi paruwasi ifite harimo: Ibigo by'amashuri 7 birimo: Urwunge rw'amashuri rwa Ruyenzi, Urwunge rw'Amashuri rwa Katarara, ishuri ribanza rya Ruteme, Ishuri ribanza rya Ntyazo, Ishuri ribanza rya Gitovu, Urwunge rw'Amashuri rwa Buremera n'Ishuri ribanza rya Kagunga. Ifite kandi Centre de Sante imwe iyoborwa n'ababikira b'aba sainte Marie.

Urugendo rwa Myr Jean Bosco mu mayaga rwasorejwe muri Paruwasi ya Ruyenzi. Iyi paruwasi iherereye mu Karere ka Nyanza ikaba yarashinzwe Tariki 02 Kamena 1989. Ifite abakirisitu basaga ibihumbi 28. Igizwe na Santarali 4 ari zo: Ruyenzi, Katarara, Ruteme na Bugali, ikagira uturere tw'ubutumwa 15 n'imiryangoremezo 78. Ifite abakirisitu bari kwiyubaka aho iterambere ryabo rishingiye ku buhinzi.

Mu bikorwa by'iterambere bakora ibijyanye n'Ubuhinzi n'Ubworozi hakiyongeraho n'Ubucuruzi. Mu burezi bafite ibigo by'amashuri 4, ari byo: Urwunge rw'amashuri rwa Mbuye, ishuri ribanza rya Butara, EAV Mayaga n'urwunge rw'amashuri rwa Kayanza.

Ikorera mu mirenge ya Muyira, Kibilizi na Kigoma ikaba ari Paruwasi ikuze yanibarutse Paruwasi ya Busoro.

Myr Jean Bosco Ntagungira, muri izi Paruwasi zose yakiriwe n'abapadiri bahakorera ubutumwa, bamwe mu bihayimana n'abakirisitu bahagarariye abandi. Aho yageraga hose kandi babanzaga gushengerera isakaramentu ry'Ukaristiya mbere yo kugirana ibiganiro n'abakristu.