“Nimuhagarike kumena amaraso”:Papa Leo wa XIV asaba impande zose guhagarika imirwano muri Sudani no gufungura inzira z’ubutabazi
Mu butumwa bwe bwo ku cyumweru ubwo yasomaga Angelus i Vatikani, Umushumba wa Kiliziya Gatolika ku isi, Papa Leo wa XIV, yasabye intambara muri Sudan ihagarikwa ako kanya ndetse no gufungura inzira z’ubutabazi bw’amahanga bugenewe abaturage bamaze amezi menshi bari mu bibazo bikomeye by’intambara.
Papa yavuze mu ijwi ryuzuye agahinda ati “Mbabajwe cyane n’inkuru zituruka muri Sudani, cyane cyane mu mujyi wa El Fasher uri mu gice cya Darfur y’Amajyaruguru, aho ibikorwa by’ubugome bikomeje gukorerwa abasivili batagira kirengera.”
Yongeyeho ko ubugizi bwa nabi bukorerwa abagore n’abana, ibitero ku baturage batitwaje intwaro, n’ibyiciro byinshi byimwa ubufasha bwa kimuntu, bigaragaza “kwirengagiza gukomeye agaciro k’ubuzima bwa muntu.”
Ubu butumwa bwa Papa Leo wa XIV buje nyuma y’aho umujyi wa El Fasher ufunzwe n’imitwe y’inyeshyamba, aho hakomeje kuvugwa ibikorwa bikomeye by’ihohoterwa n’ubwicanyi bukorerwa abaturage basanzwe. Abatangabuhamya bavuga ko ibihumbi by’abantu bataye ingo zabo, abandi bagakomereka cyangwa bagapfa bazize inzara n’imirwano.
Papa yasabye abari ku ruhande rwose rw’intambara guhagarika imirwano, ati “Dusabe Nyagasani yakire abamaze gupfa, asindagize abababaye, kandi akore ku mitima y’abayobozi b’intambara kugira ngo bahagarike ibikorwa by’ubugome.”
Nyuma yo gusaba ihagarikwa ry’intambara, Papa Leo wa XIV yasabye kandi Umuryango mpuzamahanga kugira icyo ukora mu maguru mashya. Ati“Ndongera gusaba ko amahanga atabara atitangiriye itama, agafasha kugeza inkunga aho ikenewe, kandi ashyigikira abakorera ubutabazi muri ibyo bihe bikomeye,”
Yashimangiye ko Kiliziya Gatolika izakomeza gusengera no gushyigikira ibikorwa byose bigamije kubungabunga ubuzima n’agaciro k’umuntu muri Sudani.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
