Nyuma y’amakimbirane ya Trump n’ibitangazamakuru, Papa Leo XIV yashimangiye ubwisanzure bw’abanyamakuru

Ibi Papa Leo XIV yabigarutseho kuri uyu wa Gatanu tariki ya 25 Nzeri 2026, ubwo yari mu ndege imujyanye i Paris mu Bufaransa mu ruzinduko rwe rwa gitumwa rw’iminsi ine rufite insanganyamatsiko igira iti “Kugira ngo isi igire ubuzima.”

Mu gihe yahaga ikaze abanyamakuru bari kumwe na we muri uru rugendo, umunyamakuru wa CNN yabajije Papa Leo XIV ku kibazo cy’abanyamakuru bagenzi be bari bamaze iminsi bafite imbogamizi zo kugera ku ngoro y’Umukuru w’Igihugu cya Leta Zunze Ubumwe za Amerika, White House.

Iki kibazo cyari kimaze guteza impaka muri Leta Zunze Ubumwe za Amerika, nyuma y’uko abanyamakuru ba CNN, MS NOW na POLITICO babujijwe kugera muri White House.

Perezida Donald Trump yatangaje ko ibyo binyamakuru bibujijwe kwinjira muri White House, abishinja gutangaza amakuru y’ibinyoma ku bagize ubutegetsi bwe.

Ibi bitangazamakuru byahise bivuga ko bigiye kurega ubutegetsi bwa Trump mu nkiko, mu rwego rwo kurengera ihame ry’uko Leta itagomba kugena ibyo itangazamakuru rigomba gutangaza.

Ku wa 24 Nzeri 2026, aba banyamakuru bongeye kwemererwa kuhagera nyuma y’icyemezo cy’urukiko rwa Leta cyasabye ko uburenganzira bwabo bwo kuhakorera busubizwa.

Mu gusubiza uwo munyamakuru, Papa Leo XIV yavuze ko yishimiye ko abanyamakuru bari kumwe na we bemerewe gukomeza umurimo wabo wo gutanga amakuru.

Ati “Nishimiye cyane ko hano mwese mwakiriwe neza. Ntekereza ko gutanga amakuru neza ari ingenzi cyane, kandi ko ibyo bigomba kubaho hirya no hino, ku bantu bose.”

Amagambo ya Papa Leo XIV aje mu gihe ikibazo cy’ubwisanzure bw’itangazamakuru n’imikoranire hagati y’inzego za Leta n’abanyamakuru cyari kimaze iminsi kiri mu biganiro muri Amerika.

Papa Leo XIV ubwe yahaye umwanya abanyamakuru bamuherekeza mu ngendo ze mpuzamahanga. Ku wa 25 Nzeri, yuriye indege ya ITA Airways imujyana i Paris, ari kumwe n’abagize itsinda rimuherekeza ndetse n’abanyamakuru.

Ni umuco usanzwe mu ngendo za Papa ko aganira n’abanyamakuru bamuherekeza, ndetse n’Urwego rushinzwe Itangazamakuru muri Vatican rukaba rutanga uburyo abanyamakuru bemerewe kwitabira ingendo za Papa no gukurikirana ibikorwa bye.

Ibi kandi bihura n’ubutumwa Papa Leo XIV yagiye atanga ku ruhare rw’abanyamakuru. Mu butumwa yagejeje ku banyamakuru nyuma gato yo gutorwa, yashimangiye ko abantu bakeneye amakuru kugira ngo bashobore gufata ibyemezo bafite ubumenyi, anasaba ko ubwisanzure bwo gutanga amakuru n’ubwisanzure bw’itangazamakuru birindwa.

Amagambo Papa Leo XIV yavuze ku bwisanzure bw’abanyamakuru yongeye kugaragaza umwanya itangazamakuru rifite mu gufasha abantu kubona amakuru no kumenya ibibera mu nzego zinyuranye z’ubuyobozi n’imibereho y’abaturage.