Padiri André Kibanguka yahimbaje Imyaka 50 y’Ubusaseridoti; Arkidiyosezi ya Kigali na College Saint André bamushimira uruhare mu iterambere ryayo

Uyu munsi mukuru wabimburiwe n’Igitambo cya Misa cyabereye muri Paruwasi Mutagatifu Karoli Lwanga i Nyamirambo, cyayobowe na Antoine Karidinali Kambanda, Arkiyepiskopi wa Kigali.

By’umwihariko, ibirori by’uyu munsi byahuriranye no gushimira Padiri André Kibanguka wujuje imyaka 50 amaze ahawe ubupadiri, imyaka ihuriranye kandi n’iy’ishingwa rya Arkidiyosezi ya Kigali, kuko yahawe ubupadiri mu 1976, umwaka umwe Arkidiyosezi ya Kigali yavukiyemo.

Padiri Kibanguka yavuze ko College Saint André Nyamirambo ari hamwe mu hantu hafite umwanya udasanzwe mu rugendo rwe rw’ubusaserdoti.

Yagize ati “Naje gushimira Imana no kubasaba kumfasha kuyishimira imyaka 50 maze ndi umusaserdoti, kuko imyaka myinshi y’ubupadiri bwanjye nayimaze nkiri mu mirimo nashinzwe na Arkidiyosezi ya Kigali, cyane cyane hano muri College Saint André Nyamirambo.”

Padiri Kibanguka yagarutse ku rugendo rwe rwo kwinjira mu iseminari mu 1963, agaragaza ko kuba yarabaye umupadiri mu bo batangiranye urugendo ari ibintu afata nk’ibitangaza by’Imana.

Ati “Mu bo twatangiranye mu iseminari, henshi nasanze nkiri njyenyine wabaye padiri. Iyo ntekereje kuri ibyo byose, mbona ko nta kindi nakora uretse gushimira Imana yankomeje muri uru rugendo.”

Padiri Kibanguka yinjiye kuyobora College Saint André mu 1984, asimbuye abapadiri b’abamisiyoneri bo mu Bubiligi bari barashinze iri shuri mu 1968, bazwi nk’aba- Fidei Donum baturukaga muri Diyosezi ya Namur.

Avuga kuri icyo gihe, yavuze ko nubwo atari yarize uburezi nk’umwuga, yageze muri College Saint André afite intego yo kuyobora mu buryo bwubaka umuntu. Ati“Ninjiye muri College Saint André nkiri muto, nsimbura abazungu bayoboraga ishuri. Ntabwo nari narize iby’ubwarimu, ariko nazanye uburyo bwanjye bwo kuyobora bushingiye ku kurera nk’umubyeyi nyarwanda.”

Yakomeje avuga ko intego ye yari ugutoza abanyeshuri indangagaciro zirimo ubupfura, gukunda siporo, ubwitange, gukunda Kiliziya no kugira inshingano. Ati “Sinashakaga umuco ushaje. Nashakaga ko umwana yumva akunzwe, kandi ko ishuri ritamutoza gusa ubumenyi ahubwo rinamwubaka nk’umuntu.”

Padiri Kibanguka yanagaragaje ko yishimira kubona imyaka ishize ibikorwa yakoze muri College Saint André bikomeje gutanga umusaruro.Ati“Ntabwo nigeze ngira isoni iyo mpuriye n’abanyeshuri banjye aho nkiri hose, haba i Kigali cyangwa no mu Bubiligi. Iyo umuntu ambwiye ati ‘wari Directeur wanjye’, numva ari ishema rikomeye.”

Yanashimiye abamukurikiye ku buyobozi bw’iri shuri kuba bakomeje umurongo waryo.

Ati “Ndashimira abapadiri bansimbuye kuko College Saint André iracyari College, iracyari ku murongo wayo. Ibyo mbifata nk’impano ikomeye Imana yahaye iri shuri.”

Mu izina ry’abize muri College Saint André, Irene, uhagarariye abahize, yashimiye Padiri Kibanguka ku ruhare yagize mu kubaka uburere bw’abanyeshuri benshi banyuze muri iri shuri.

Yagize ati “Nk’abize muri College Saint André twifurije Padiri Kibanguka Yubile nziza y’imyaka 50 y’ubusaserdoti. Twishimira indangagaciro mwadutoje zirimo uburezi bufite ireme, ikinyabupfura, gukunda siporo, ubwitange no gukunda Kiliziya.”

Yakomeje avuga ko uruhare rwa Padiri Kibanguka rukigaragarira mu buzima no mu nshingano z’abanyeshuri benshi bahize.

Ati “Uruhare mwagize mu burezi n’ireme ry’ishuri turarwibuka kandi turarushimira.”

Padiri Kibanguka azizihiriza ku mugaragaro Yubile y’imyaka 50 y’ubusaserdoti ku wa 18 Nyakanga 2026 muri Paruwasi Sainte Famille, hamwe n’abandi bapadiri bizihiza imyaka 25 n’abazahabwa ubupadiri muri uyu mwaka.

College Saint André Nyamirambo yashinzwe mu 1968 n’abapadiri bo muri Diyosezi ya Namur mu Bubiligi, mu rwego rwo gufasha Kiliziya Gatolika mu Rwanda mu burezi. Nyuma y’ishingwa rya Arkidiyosezi ya Kigali mu 1976, iri shuri ryabaye kimwe mu bigo by’uburezi byayo by’ingenzi, rikomeza kubaka izina rikomeye mu burezi no mu kurera urubyiruko rufite indangagaciro.

Yakomeje ashima Padiri Kibanguka ku ruhare yagize mu burezi no mu iyogezabutumwa.

Ati“Padiri Kibanguka ahuza Yubile ya Arkidiyosezi, Yubile y’ubusaserdoti ndetse n’amateka ya College Saint André. Turamushimira imyaka myinshi yamaze mu butumwa muri Saint André n’imbuto yahabibye zikomeje kugaragara mu bahize.”

Yubile ya Padiri André Kibanguka yabaye umwanya wo kongera kwibuka amateka y’iri shuri, no gushimira umusanzu we mu kurigira kimwe mu bigo bifite amateka akomeye mu burezi bw’u Rwanda.