Papa Leo wa XIV: Twige kwakira ibyishimo bivuye mu bigora ubuzima, inyigisho yo kuri uyu wa gatatu

Mu gihe benshi bashobora gutekereza ko Izuka rya Kristu ryagombaga kugaragarira mu bitangaza n’imbaraga zidasanzwe, Papa Leo XIV yagaragaje ko Yezu yahisemo inzira itandukanye n’iyo.

Ati “Yazutse mu bwiyoroshye, atazanywe n’abamarayika cyangwa ibimenyetso bidasanzwe, ahubwo yigaragaje nk’umuhinzi, umugenzi cyangwa umusore utazwi.”

Yongeraho ati “Yezu ntiyifashishije amagambo aremereye cyangwa ibikorwa by’igitangaza, ahubwo yahisemo ururimi rw’ubusabane, ubuzima busanzwe n’isangira risanzwe. Ibyo ni byo bitwereka ko izuka atari impinduka yo hanze, ahubwo ari impinduka y’imbere ituma buri gikorwa cyacu kigira agaciro.”

Papa Leo XIV yasobanuye ko rimwe na rimwe abantu batamenya ko Kristu ari kumwe na bo kuko bibwira ko ibyishimo nyakuri bigomba kuba bitarimo ibikomere. Yibukije urugendo rw’abigishwa bajyaga i Emau, bari babuze icyizere kuko bari batewe agahinda n’urupfu rwa Yezu, ariko nyuma bamumenyeye mu gusangira ifunguro risanzwe.

Ati “Yezu yabafashije gusobanukirwa ko umubabaro n’agahinda atari impamvu yo kwiheba, ahubwo ni inzira Imana ikoresha ngo itwereke urukundo rwayo rutagira urugero.”

Mu butumwa bwe  kandi, Papa Leo XIV yakomeje agira ati “Izuka rya Yezu ritwigisha ko nta muntu n’umwe wagwa ku buryo atazongera kubyuka mu byiringiro. Nta mwijima uzahoraho iteka, nta gikomere kitarashobora gukira, kandi nta ntera ishobora gutandukanya umuntu n’urukundo rw’Imana.”

Yasobanuye ko kandi Kristu adusanga mu bihe bikomeye by’ubuzima bwacu, akatwinginga ngo tumwakire, kugira ngo aduhe imbaraga n’amahoro aturuka ku rukundo rwe.

Papa Leo yasabye abakirisitu bose gusaba ingabire yo kumenya kumva ubusabane bwa Yezu mu buzima busanzwe, aho tumenya ko umubabaro nawo ushobora kuba ahantu Imana ituganirira kandi ikatugira abavandimwe