Papa Leo wa XIV yifatanyije n’ishuri rya Pontifical Paul II mu gitaramo cya Noheli

Iki gitaramo cyabaye umwanya wo kwifurizanya Noheli nziza, hanashimangirwa ubutumwa bw’uko ubutunzi nyabwo butari mu byo umuntu atunga, ahubwo buri mu mahoro ashobora kwiremera mu mutima no mu mibanire myiza n’abandi.

Abanyeshuri, bahimbaje igitaramo cya Noheli baririmba indirimbo zitandukanye za Noheli zirimo Adeste fideles, Joy to the World, Noël Noël na Astro del ciel. Izi ndirimbo zumvikanye mu ndimi zitandukanye zirimo Igitaliyani, Ikilatini, Icyongereza n’Icyesipanyolo, ibintu Papa yavuze ko bigaragaza ko Noheli ikangura ibyishimo n’amahoro mu mitima ya bose.

Mu bitabiriye iki gitaramo harimo Umwepiskopi wa Diyosezi ya Albano, Musenyeri Vincenzo Viva, Perezida w’Urwego rushinzwe Umutungo wa Kiliziya (APSA), Musenyeri Giordano Piccinotti, ndetse n’abandi bayobozi b’ishuri.

Papa Leo yashimiye abana n’ubuyobozi bw’ishuri bwamutumiye muri iki gitaramo, avuga ko yishimiye kuba yifatanyije na bo muri uyu mwanya wihariye wa Noheli.

Agaruka ku ndirimbo zavugaga ku bamalayika bazana urukundo, Papa Leo yavuze ko abana ubwabo babaye intumwa z’urukundo binyuze mu ndirimbo n’umuziki. Yibukije amagambo ya Mutagatifu Augustini agira ati “Ukunda araririmba,” asobanura ko urukundo rutuma umutima ubona iby’ingenzi nyakuri.

Papa yagize ati “Noheli ni igihe Imana yihaye abantu, ibaha impano y’urukundo.” Yongeyeho ko Imana yegera cyane cyane abato n’abanyantege nke, bityo asaba ko umwuka wa Noheli utarangirira mu minsi mikuru gusa, ahubwo wakomeza kubaho mu buzima bwa buri munsi.

Yasoje asaba buri wese gukomeza gukora ibirenzeho mu kwamamaza amahoro, urukundo n’ubumwe mu muryango mugari no ku isi hose.

Papa Leo wa XIV yasoje kandi aha umugisha abana n’imiryango yabo, abashishikariza gusengera hamwe no gufungura imitima yabo kugira ngo babone Imana mu bandi, cyane cyane mu bato n’abanyantege nke.

Ishuri rya Pontifical Paul VI ryo muri Castel Gandolfo ryashinzwe ku gitekerezo cya Papa Pawulo wa VI nk’impano yahaye abaturage baho, rinavugururwa ku mugaragaro ku wa 12 Nzeri 1968. Ubu ryigamo abanyeshuri bagera kuri 300, rikabaha uburezi bushingiye ku ndangagaciro za Kiliziya Gatolika, bufashijwe n’ibikorwa by’inyongera birimo siporo, umuziki, indimi z’amahanga n’uburezi ku bwenegihugu.