Papa Leo XIV agiye kugirira uruzinduko rw'ubutumwa muri Afurika

Mu kiganiro n’abanyamakuru cyabaye kuwa Kane tariki ya 09 Mata 2026, Bruni yasobanuye ko uru ruzinduko ruzamara iminsi isaga 11, rukazabera mu bihugu bine bifite amateka, imico n’indimi bitandukanye. Yavuze ko Papa azatanga ubutumwa mu ndimi zitandukanye zirimo Icyongereza, Igifaransa, Igiporutugali n’Icyesipanyolo.

Insanganyamatsiko nyamukuru zizibandwaho harimo amahoro, abimukira, kurengera ibidukikije, urubyiruko n’umuryango.

Uru ruzinduko ni rwo rurerure Papa Leo XIV azaba akoze kuva yatangira umurimo we, kandi ni bwo bwa mbere azaba asuye Algeria. Ni na bwo bwa mbere mu myaka myinshi Papa azaba agiriye uruzinduko muri Cameroun, Angola na Guinée Équatoriale.

Muri Algeria, biteganyijwe ko Papa azibutsa umurage wa Mutagatifu Augustin ndetse n’amateka y’ubukirisitu muri Afurika y’Amajyaruguru, anibande ku biganiro n’Abayisilamu no ku kibazo cy’abimukira.

By’umwihariko, iri tangazo rinibutsa ko mbere gato y’urupfu rwe, yari aherutse kugirirwa icyizere na Papa Pope Leo XIV, amugira umwe mu bagize Urwego rwa Vatikani rushinzwe itumanaho, bikaba byari ikimenyetso cy’icyizere yari afitiwe ku rwego mpuzamahanga.

Muri Cameroun, igihugu gikunze kwitwa Afurika mu ishusho nto kubera ubwinshi bw’umuco n’indimi, Papa azibanda ku mahoro, kubana mu bwumvikane, urubyiruko n’iterambere rirambye ry’umuntu.

Muri Angola, azagaruka ku ruhare rw’urubyiruko, umutungo kamere n’uw’abantu, ndetse n’ingaruka za ruswa n’amateka y’ubukoloni.

Naho muri Guinée Équatoriale, azita ku muco n’uburezi, ndetse n’uruhare rwa Kiliziya mu guteza imbere amahoro mu gihugu gikungahaye ku mutungo kamere.

Abazamuherekeza muri uru ruzinduko barimo abahagarariye inzego zitandukanye za Vatikani n’abakaridinali baturuka muri Afurika.

Ni mu gihe kandi nk’uko bisanzwe, Papa azanasubiza ibibazo by’abanyamakuru mu kiganiro azagirira mu ndege asubira i Roma.