Papa Leo XIV yagaragaje ko ubutumwa bw’abalayiki butagarukira gusa muri Kiliziya

Mu nyigisho yatanze kuri uyu wa Gatatu tariki ya 01 Werurwe 2026, mu Nama rusange yabereye ku rubuga rwa St. Peter’s Square, Papa Leo XIV yagaragaje ko abalayiki bafite uruhare rukomeye mu gufasha Kiliziya kugera kuri bose no kwimakaza amahoro n’ubutabera mu isi.

Papa Leo XIV yavuze ko ubutumwa bw’abalayiki butagarukira gusa muri Kiliziya, ahubwo bugera no mu buzima bwa buri munsi aho bari hose. Yagize ati “Ubutumwa bw’abalayiki si ubw’imbere muri Kiliziya gusa, ahubwo bugera no mu isi hose.”

Yasobanuye ko Kiliziya igaragara aho hose abakristu bari, by’umwihariko mu kazi, mu muryango no mu buzima rusange, aho bagaragaza indangagaciro z’Ivanjili mu bikorwa byabo.

Ati “Kiliziya iba iri aho abana bayo batangariza Ivanjili kandi bakayihamya mu buzima bwabo bwa buri munsi.”

Mu gukomeza inyigisho ze zishingiye ku nyandiko ya Lumen gentium yo mu 1964, Papa Leo XIV yibukije ko abalayiki bagize igice kinini cy’abantu b’Imana kandi bafite agaciro kangana n’abandi bose babatijwe.

Ati “Mbere y’uko tuvuga itandukaniro ry’imirimo cyangwa imibereho, bose babatijwe bafite agaciro kangana muri Kristu.”

Papa Leo XIV yakomeje agaragaza ko abalayiki basangiye na Kristu inshingano zo kuba abahanuzi, abami n’abapadiri mu buryo bwabo. Ati “Abalayiki bagira uruhare mu butumwa bwa Kristu bwo kuba umuhanuzi, umwami n’umupadiri, buri wese mu buryo bwe.”

Yibukije ko abantu b’Imana atari itsinda ridafite imiterere, ahubwo ari umubiri wa Kristu ufite imikoranire ihamye hagati y’abalayiki n’abihayimana. Ibi ngo bituma Kiliziya irushaho kuba umuryango uhuje kandi ukora neza.

Mu gusoza, Papa Leo XIV yahamagariye abalayiki kurushaho kugira uruhare rugaragara mu buzima bwa Kiliziya no mu kwamamaza Ivanjili, asaba ko Pasika yegereje yabafasha kongera imbaraga mu kwemera.

Ati “Nimusangire Pasika nshya, mubashe kuba abahamya ba Yezu wazutse, nk’uko Mariya Magadalena, Petero na Yohani babigenje.”