Papa Leo XIV yageze muri Cameroun mu gice cya kabiri cy’uruzinduko rwe muri Afurika

Yasesekaye ku Kibuga Mpuzamahanga cy’Indege cya Yaoundé-Nsimalen giherereye hafi y’Umurwa Mukuru, Yaoundé, saa munani n’iminota 57 ku isaha yaho.

Papa Leo XIV yari avuye muri Algeria, igihugu cya mbere yari yatangiriyemo uru ruzinduko, aho yari yageze ku wa Mbere tariki ya 13 Mata 2026. Biteganyijwe ko azamara muri Cameroun iminsi itatu aho azahava kuwa Gatandatu tariki ya 18 Mata, mbere yo gukomereza uruzinduko rwe muri Angola no muri Equatorial Guinea, akazagaruka i Roma ku wa 23 Mata 2026.

Akigera muri Cameroun, Papa yakiriwe na Minisitiri w’Intebe w’iki gihugu, Joseph Dion Ngute, aho yakiranywe n’abana babiri bamuhaye indabo nk’ikimenyetso cy’icyubahiro. Nyuma hacuranzwe indirimbo z’ibihugu byombi, hakurikiraho kumenyekanisha intumwa z’impande zombi, mbere y’uko agirana ibiganiro bigufi na Minisitiri w’Intebe.

Ku munsi we wa mbere muri Cameroun, Papa Léon XIV aratangirira ibikorwa bye ku Ngoro y’Umukuru w’Igihugu, aho aza kwakirwa na Perezida wa Repubulika, Paul Biya, bakagirana ibiganiro byihariye.

Nyuma yaho, arateganya kugeza ijambo ku bayobozi b’igihugu, abahagarariye sosiyete sivile ndetse n’abadipolomate bakorera muri Cameroun.

Azanasura Ikigo cy’imfubyi cya Ngul Zamba, aho azaganira n’abana bahaba ndetse n’abakozi b’icyo kigo. Akazanahura mu muhezo n’Abepisikopi ba Cameroun ku cyicaro cy’Inama y’Abepisikopi.

Uru ruzinduko rwa Papa Leo XIV muri Afurika rugamije gukomeza ubutumwa bwo kwimakaza amahoro, ubumwe n’urukundo, cyane cyane mu bihugu bikiri mu bibazo by’amakimbirane, ubukene n’ubusumbane.