Papa Leo XIV yakiriye abadipolomate bashya 8 barimo Ambasaderi w’u Rwanda Urujeni Bakuramutsa bagiye guhagararira ibihugu byabo i Vatikani

Papa Leo XIV yasabye abo badipolomate kugeza ku bayobozi b’ibihugu byabo ubutumwa bw’ubucuti, icyubahiro ndetse n’amasengesho abafitiye bo n’abaturage babo.

Papa Leo XIV yasabye ibihugu n’abadipolomate kongera kubaka icyizere mu mubano mpuzamahanga, ashimangira ko ibiganiro byubakiye gusa ku mvugo nziza no gusobanura ibintu neza bidahagije, ahubwo ko bikwiye guherekezwa no “guhinduka ku mutima” no gushyira imbere icyagirira bose akamaro aho gushyira imbere inyungu bwite.

Mu ijambo rye, Papa yanagarutse ku munsi mukuru wa Pentekosti wegereje, yibutsa uburyo Roho Mutagatifu yamanukiye intumwa maze ubwoba bukavamo ubutwari, amacakubiri agasimburwa n’ubumwe, binyuze mu bushobozi bwo kuvuga indimi z’amahanga yose.

Papa yavuze ko yifuza ko uwo “mwuka w’ubumwe” wakomeza kubera urugero isi ya dipolomasi, aho ibihugu bikwiye kubaka umubano ushingiye ku bwubahane, gufungurirana no kugira inshingano zihuriweho zo guteza imbere inyokomuntu.

Yanongeye gushimangira ubutumwa yagejeje ku rwego rwa dipolomasi muri Mutarama uyu mwaka, aho yavuze ko muri iki gihe amahoro menshi ashakishwa hifashishijwe intwaro kugira ngo ibihugu byigaragazeho imbaraga, ari ingenzi kongera kwimakaza “dipolomasi yubakiye ku biganiro no gushaka ubwumvikane.”

Papa Leo XIV yavuze ko ibiganiro nyabyo bisaba kuvuga ukuri nta kugoreka ibintu cyangwa amagambo yuzuyemo urwango, kuko ari bwo buryo bwo gukemura amakimbirane no kongera kubaka icyizere hagati y’ibihugu n’abaturage.

Yagize ati “Nta gihugu, nta muryango cyangwa se urwego mpuzamahanga rwavuga ko rurangwa n’ubutabera n’ubumuntu niba rupima intsinzi yarwo rushingiye gusa ku mbaraga cyangwa ubukungu, rukirengagiza abakene n’abari ku ruhande.”

Papa yashimangiye ko urukundo Kristu afitiye abakene, abanyantege nke n’abibagiranye rugomba gutuma abantu banga ubwikunde bwose butuma abatishoboye basa n’abatagira agaciro mu muryango mugari w’abantu.

Yongeyeho ko uwo muco w’ubufatanye no kwitangira abandi ari wo ukwiriye kuranga umurimo w’abadipolomate ndetse n’imikorere y’imiryango mpuzamahanga, kugira ngo ibe urubuga rwo guhuza abantu no gukemura amakimbirane binyuze mu bwumvikane.

Papa Leo XIV yavuze kandi ko muri iki gihe isi ikomeje gucibwamo ibice n’amakimbirane ashingiye kuri politiki n’inyungu z’ibihugu, hakenewe ko imiryango mpuzamahanga irushaho kugira ubushobozi, guhagararira bose no gukorera ubumwe bw’umuryango mugari w’abatuye isi.

Mu gusoza, Papa Leo XIV yijeje abo badipolomate ubufasha bwa Leta ya Vatican ndetse n’izindi nzego za Kiliziya, abasabira ko ubutumwa bwabo bwakomeza guteza imbere ibiganiro, ubwumvikane n’amahoro isi ikomeje gukenera cyane.