Papa Leo XIV yakiriye Maria Corina Machado wahawe igihembo cy’amahoro cya Nobel

Mu biganiro bagiranye , Papa Leo XIV na Maria Corina Machado byagarutse ku kibazo cya Venezuela, by’umwihariko ku kubahiriza uburenganzira bwa muntu, gushaka inzira z’amahoro n’ubutabera, no kubahiriza ubushake bw’abaturage mu kubaka inzibacyuho ya politiki ishobora kugarura ituze n’icyizere mu gihugu.

Mu kiganiro n’abanyamakuru cyabaye ku wa Kabiri, tariki ya 13 Mutarama 2026, Arikiyepiskopi Kryspin Witold Dubiel, Intumwa ya Papa muri Angola no muri São Tomé na Príncipe, yatangaje ko Papa Leo XIV yamaze kwemera ubutumire bwatanzwe n’Inama y’Abepiskopi ba Angola ndetse na Perezida wa Repubulika, João Lourenço.

Maria Corina Machado, wahoze ari umudepite mu Nteko Ishinga Amategeko ya Venezuela, yatsindiye igihembo cy’amahoro cya Nobel mu Ukwakira 2025, ashimirwa uruhare rwe mu guharanira demokarasi, ukwishyira ukizana n’uburenganzira bwa muntu mu gihugu cye kimaze imyaka myinshi mu bibazo bya politiki n’ubukungu.

Maria Corina Machado ayoboye ishyaka rya politiki Vente Venezuela, rifite umurongo wa politiki wibanda kuri demokarasi, ubwisanzure n’imiyoborere ishingiye ku mategeko. Ni umwe mu banyapolitiki bamaganye ku mugaragaro ubutegetsi bwa Nicolás Maduro, ibintu byatumye ahura n’itotezwa rikomeye ryatumye ahunga igihugu cye.

Mu Ukuboza 2025, Machado yagiye i Oslo kwakira ku mugaragaro igihembo cy’amahoro cya Nobel, anatangaza ko agituye abaturage ba Venezuela bose bakomeje kwihanganira imibabaro n’akarengane.

Maria Corina ahuye na Papa mu gihe kuri ubu, Venezuela iri mu bihe bidasanzwe, nyuma y’ifatwa rya Nicolás Maduro n’umugore we Cilia Flores, aho bafatiwe i Caracas ku wa 3 Mutarama mu gikorwa cya gisirikare cy’ingabo za Leta Zunze Ubumwe za Amerika cyiswe Operation Absolute Resolve.

Venezuela iri kuyoborwa by’agateganyo na Delcy Rodríguez, mu gihe ibiganiro bigamije inzibacyuho ya politiki bikomeje, bishyigikiwe n’umuryango mpuzamahanga.

Biteganyijwe ko muri iki cyumweru Maria Corina Machado azasura i Washington, aho ateganya kugirana ibiganiro na Perezida wa Leta Zunze Ubumwe za Amerika, Donald Trump, nk’uko byatangajwe n’Ibiro bye. Iyi nama izibanda ku hazaza h’imiyoborere ya Venezuela n’uruhare rw’amahanga mu kugarura amahoro n’ubusugire bw’igihugu.

Papa Leo XIV yakunze kugaruka ku kibazo cya Venezuela mu butumwa bwe. Mu ijambo rya Angelus ryo ku wa 4 Mutarama, umunsi umwe nyuma y’ifatwa rya Maduro, Papa yavuze ko akurikirana ibiri kubera muri Venezuela akaba afite impungenge zikomeye, cyane cyane nyuma y’uko abantu bagera kuri 80 bapfiriye mu mirwano yakurikiyeho, barimo abasirikare n’abasivili.

Papa yaragize ati “ubwisanzure bw’abaturage ba Venezuela bugomba kuza imbere y’ibindi byose. Hakenewe kureka inzira y’ihohoterwa, hagashakwa inzira z’ubutabera n’amahoro, hubahirizwa ubusugire n’ubwigenge bw’igihugu.”

Yanashimangiye ko kubahiriza uburenganzira bwa muntu n’ubw’abaturage ari ingenzi, anasaba amahanga n’abaturage gukorera hamwe mu kubaka ejo hazaza huzuye amahoro, ubufatanye n’ubwumvikane, by’umwihariko hibandwa ku bakene bakomeje kugerwaho n’ingaruka z’ibibazo by’ubukungu.

Papa Leo XIV yasabye ko hashyirwa imbere ubushake bw’abaturage ba Venezuela, hakabungabungwa uburenganzira bwa muntu n’ubw’abaturage bose, mu rwego rwo gushakira igihugu ejo hazaza huzuye amahoro n’ubwumvikane burambye.