Papa Leo XIV yakiriye Perezida wa Koreya y’Epfo i Vatikani, baganira ku mubano mwiza w’impande zombi
Papa Leo XIV yakiriye Perezida wa Repubulika ya Koreya y’Epfo, Lee Jae-myung, mu Ngoro ya Apostolika i Vatikani, mu biganiro byagarutse ku mubano mwiza usanzwe hagati ya Vatikani na Koreya y’Epfo ndetse n’uruhare Kiliziya Gatolika ikomeje kugira mu iterambere ry’icyo gihugu.
Mu kiganiro cyabereye mu Bunyamabanga bwa Leta ya Vatikani kuri uyu wa Mbere tariki ya 15 Kamena 2026, impande zombi zashimangiye umubano mwiza umaze imyaka 63 hagati ya Vatikani na Koreya y’Epfo, watangiye mu mwaka wa 1963.
Bagarutse kandi ku mateka y’uru ruzinduko rwa Kiliziya muri Koreya y’Epfo, bibutsa ko Papa John Paul II yasuye icyo gihugu inshuro ebyiri mu 1984 no mu 1989, mu gihe Papa Francis na we yagisuye mu 2014 mu rwego rwo kwizihiza Asian Youth Day.
Nk’uko byatangajwe n’Ibiro Ntaramakuru bya Vatikani, impande zombi zashimye umusanzu Kiliziya Gatolika yo muri Koreya y’Epfo itanga mu mibereho y’abaturage.
Mu ijambo ryatangajwe nyuma y’ibi biganiro, hasobanuwe ko impande zombi zagarutse ku musanzu mwiza Kiliziya Gatolika yo muri Koreya itanga muri sosiyete, cyane cyane mu rwego rw’uburezi no gufasha imibereho myiza y’abaturage.
Ibiganiro byabo byanagarutse ku myiteguro ya World Youth Day 2027, uzahuza urubyiruko Gatolika ruturutse hirya no hino ku isi, ndetse no ku bibazo bimwe by’akarere n’iby’isi bikomeje gukurikiranwa n’impande zombi.
Uruzinduko rwa Perezida Lee Jae-myung i Vatikani rugaragaza ubushake bwo gukomeza gutsura umubano hagati ya Koreya y’Epfo na Vatikani, no gukomeza ubufatanye mu bikorwa biteza imbere amahoro, uburezi n’imibereho myiza y’abaturage.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
